އީރާނުން ބައިނަލްއަޤުވާމީ ޤާނޫނާ ޚިލާފުވެފައިވާ ކަމަށް ބުނެ، ގަތަރުން ނުރުހުން ފާޅު ކޮށްފި

ގަތަރުގެ އެކި ސަރަހައްދު ތަކާއި، އެ ސަރަހައްދުގެ އެހެން ޤައުމު ތަކަށް އަމާޒުކޮށް އީރާން އިން ދެމުން އަންނަ ހަމަލާތައް ގަތަރުން ކުށްވެރި ކޮށްފި އެވެ.

ގަތަރުގެ ފޮރިން މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، އީރާންގެ އެ އަމަލު ތަކަކީ ސަރަހައްދީ ސަލާމަތަށް އޮތް ނުރައްކަލެއް ކަމަށާއި، އެއީ ބައިނަލްއަޤުވާމީ ޤާނޫނުތަކާ ކަނޑަ އެޅިގެން ޚިލާފު އަމަލު ތަކެއް ކަމަށެވެ. 

ފޮރިން މިނިސްޓްރީގެ ބަޔާނުގައި ބުނެފައި ވަނީ، މިފަދަ ހަމަލާތައް މެދު ނުކެނޑި ކުރިއަށް ދިޔުމަކީ މަސްރަހު އިތުރަށް ގޯސްވެ، ނުތަނަވަސްކަން ކުޑަ ކުރުމަށް ކުރަމުން އަންނަ މަސައްކަތް ތަކެއް އެޅޭ ވަރަށް ބޮޑު ހުރަހެއް ކަމަށެވެ. އަދި އެކަމުގެ ސަބަބުން ސަރަހައްދީ ހަމަޖެހުމާއި، ސަލާމަތްތެރިކަން ގާއިމު ކުރުމަށް ސިޔާސީ އަދި ޑިޕްލޮމެޓިކް ދާއިރާ އިން ކުރަމުން އަންނަ މަސައްކަތް ތަކަށް ބުރޫ އަރާނެ ކަމަށް ވެސް ގަތަރުން ވަނީ ބުނެފައި އެވެ.

މީގެ އިތުރުން އީރާން އިން ދެމުންދާ މި ހަމަލާ ތަކާއި، އޭގެ ސަބަބުން ކުރިމަތި ވެދާނެ އެންމެހާ ނަތީޖާ ތަކާއި، ގާނޫނީ ޒިންމާ އެ ޤައުމުން ފުރިހަމަ އަށް އުފުލަަން ޖެހޭނެ ކަމަށް ވެސް ގަތަރުން ވަނީ ބުނެފައި އެވެ. ގަތަރުން ވަނީ މި ހަމަލާ ތަކަކީ ޤައުމެއްގެ މިނިވަންކަމާއި، އިސްތިޤުލާލަށް އަރައި ގަތުން ކަަމަށް ސިފަކޮށް، އެއީ ބައިނަލްއަޤުވާމީ އެންމެހާ އުސޫލުތަކާ ޚިލާފު އަމަލެއް ކަމަށް ބުނެފައި އެވެ. 

ގަތަރުގެ ފޮރިން މިނިސްޓްރީ އިން އިތުރަށް ބުނެފައި ވަނީ، މިފަދަ ހަމަލާ ތަކަށް ރައްދު ދިނުމުގެ ހައްގު އެ ގައުމަށް ލިބިގެންވާ ކަމަށެވެ. ހަމައެއާ އެކު، މުޅި ސަރަހައްދުގައި ހިނގަމުންދާ އަސްކަރީ ކުރިމަތިލުން ތަކާއި، ހަމަލާތައް ވަގުތުން ހުއްޓާލުމަށް ވެސް ގަތަރުން ވަނީ ގޮވާލާފައި އެވެ.

މި ހަމަލާތަކާ ގުޅިގެން މެދު އިރުމަތީގެ މަސްރަހު ވަނީ ވަރަށް ބޮޑަށް ހޫނުވެފައި އެވެ. ބައިނަލްއަގުވާމީ މުޖުތަމައުން ވެސް ދަނީ މި ހަމަލާތަކާ މެދު ކަންބޮޑުވުން ފާޅު ކުރަމުންނެވެ. ގަތަރުން ބުނެފައި ވަނީ ސަރަހައްދީ ހަމަޖެހުން ގާއިމު ކުރެވޭނީ ބައިނަލްއަގުވާމީ ގާނޫނު ތަކަށް އިހުތިރާމްކޮށް، ހަމަ ނުޖެހުންތައް ހުއްޓާލައިގެން ކަމަށެވެ.