ހުރްމުޒް ކަނޑު އޮޅީގެ ނުރައްކާ އޮތީ އެންމެ މަތީ ދަރަޖައިގައި
12 ޖުލައި 2026 | އާދީއްތަ 09:57މި ސަރަހައްދުން ދަތުރު ކުރާ ބޯޓު ތަކުން ސަމާލުކަން ދިނުމަށް ވެސް ޔޫކޭއެމްޓީއޯ އިން ވަނީ އިލްތިމާސް ކޮށްފައި. އެ އިދާރާ އިން ވަނީ ރައްކާތެރިކަމުގެ ހުރިހާ ފިޔަވަޅު ތަކެއް އެޅުމަށް ޚާއްސަ އިރުޝާދު ދީފައި.
ހުރްމުޒް ކަނޑު އޮޅި ހިމެނޭ ސަރަހައްދުން އުޅަނދު ތަކެއް ދަތުރު ކުރާ މަންޒަރު ފެންނަ ފައިލް ފޮޓޯއެއް. | ރޮއިޓާސް
ހުރްމުޒް ކަނޑު އޮޅީގެ ނުރައްކާތެރިކަން އޮތީ އެންމެ މަތީ ދަރަޖައިގައި ކަމަށް، އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންްސް (ޔޫކޭއެމްޓީއޯ) އިން ހާމަކޮށްފި އެވެ.
އެ އިދާރާ އިން ބުނެފައި ވަނީ ހުރްމުޒް ކަނޑު އޮޅީ މުޅިން ބަންދު ކުރާނެ ކަމަށް އީރާން އިން ބުނެފައިވީ ނަމަވެސް، ދެކުނު ދިމާލުގެ މަގު މިހާރު ވެސް ހުޅުވާލެވިފައިވާ ކަމަށެވެ. އީރާން އިން ވަނީ މުއްދަތެއް ނެތް ގޮތަށް ހުރްމުޒް ކަނޑު އޮޅި ބަންދު ކުރަން ނިންމާފައިވާކަން އިއުލާން ކޮށްފައި އެވެ.
އީރާނުން ހުރްމުޒް ކަނޑުއޮޅި ވަކި މުއްދަތެއް ނެތް ގޮތަށް ބަންދުކޮށްފި
ނަމަވެސް، ޔޫކޭއެމްޓީއޯ އިން ބުނީ ދެކުނު ދިމާލުގެ މަގު ވަނީ ފުޅާ ކޮށްފައި ކަމަށާއި، މިހާރު ދެ ދިމާލަކުން ދަތުރު ކުރެވޭނެ ކަމަށެވެ. މިއީ މި ސަރަހައްދުގައި ދަތުރުކުރާ ބޯޓު ތަަކަށް ލުއި ފަސޭހަ ކަމެއް ކަމަށް އެ އިދާރާ އިން ވަނީ ފާހަގަ ކޮށްފައި އެވެ.
ހުރްމުޒް ކަނޑު އޮޅި އަކީ ދުނިޔޭގެ ތެލުގެ ވިޔަފާރީގައި އެންމެ މުހިންމު ދައުރު އަދާ ކުރާ ސަރަހައްދެވެ. މި ސަރަހައްދުގައި ރައްކާތެރި ކަމުގެ ނުރައްކާ އިތުރުވުމަކީ ބައިނަލްއަޤުވާމީ ވިޔަފާރި އަށް ބޮޑު އަސަރެއް ކުރާނެ ކަމެކެވެ. ޚާއްސަކޮށް ތެލާއި ގޭހުގެ ވިޔަފާރި އަށް ބޮޑެތި ބަދަލު ތަކެއް އަތުވެދާނެ އެވެ.
މީގެ އިތުރުން މި ސަރަހައްދުން ދަތުރު ކުރާ ބޯޓު ތަކުން ސަމާލުކަން ދިނުމަށް ވެސް ޔޫކޭއެމްޓީއޯ އިން ވަނީ އިލްތިމާސް ކޮށްފައި އެވެ. އެ އިދާރާ އިން ވަނީ ރައްކާތެރިކަމުގެ ހުރިހާ ފިޔަވަޅު ތަކެއް އެޅުމަށް ޚާއްސަ އިރުޝާދު ދީފައި އެވެ. އެއާ އެކު، މި ސަރަހައްދުން ދަތުރު ކުރާ ބޯޓު ތަކުން ރައްކާތެރިކަމުގެ ޙާލަތު ވަރަށް ގާތުން ބަލަމުން އަންނަ ކަމަށް ރިޕޯޓު ތަކުގައި ވަނީ ފާހަގަ ކޮށްފައި އެވެ.
ހޮނިހިރު ދުވަހު އައިއާރުޖީސީގެ ކަނޑުގެ ސިފައިން ނެރުނު ބަޔާނެއްގައި ބުނެފައި ވަނީ، ހުރްމުޒް ކަނޑު އޮޅި ބަންދު ކުރަން ނިންމީ ބޭރުގެ ބާރު ތަކުން ގަވާއިދާ ޚިލާފަށް އެ ސަރަހައްދަށް ވަދެގަތުމުގެ ސަބަބުން އުފެދިފައިވާ ސަލާމަތީ ނުރައްކާ ތަކަށް ރިއާޔަތްކޮށް ކަމަށެވެ.
އެގޮތުން ވަކި ގޮތެއް އަންގަންދެން ހުރްމުޒް ކަނޑު އޮޅި ބަންދު ކުރެވިފައިވާ ކަމަށާއި، އެމެރިކާ އިން އެ ސަރަހައްދަށް ނުފޫޒު ފޯރުވުން ހުއްޓާލަންދެން އެކަން ދެމި އޮންނާނެ ކަަމަށް ބުނެފައިވެ އެވެ. އަދި އެއްވެސް އުޅަނދަކަށް ހުރްމުޒް ކަނޑު އޮޅިން ދަތުރު ކުރުމުގެ ހުއްދަ ނުދެވޭނެ ކަމަށް ވެސް ވަނީ ބުނެފައި އެވެ.
މަސްދަރު: އަލް ޖަޒީރާ
