ކަނޑުދަތުރުތައް ވަގުތީ ގޮތުން ހުއްޓާލަން ގަތަރުން އަންގައިފި

އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި، ކަނޑު ދަތުރުފަތުރާއި ކަނޑުމަތީގެ ހުރިހާ ހަރަކާތްތަކެއް ވަގުތީގޮތުން މެދުކަނޑާލަން ނިންމައި އެކަން އާދިއްތަ ދުވަހު ގަތަރުގެ މިނިސްޓްރީ އޮފް ޓްރާންސްޕޯޓުން އިއުލާންކޮށްފި އެވެ. މި ނިންމުމަށް އަމަލުކުރަން ފަށާފައިވަނީ ވަކި ގޮތެއް އަންގަންދެނެވެ.

މިނިސްޓްރީން ނެރުނު ބަޔާނެއްގައި، މުނިފޫހިފިލުވުމަށް ބޭނުންކުރާ ބޯޓުފަހަރާއި، މަސްވެރި އުޅަނދުފަހަރާއި، ޖެޓްސްކީގެ އިތުރުން ކަނޑުމަތީގައި ބޭނުންކުރާ އެހެނިހެން އުޅަނދުފަހަރު ގެންގުޅޭ ފަރާތްތަކުންނާއި އެ ތަކެތި ބޭނުންކުރާ ފަރާތްތަކުން، ދަތުރުފަތުރު ކުރުމާއި ކަނޑުމަތީގެ ހުރިހާ ހަރަކާތްތަކެއް ވަގުތީގޮތުން ހުއްޓާލުމަށް ވަނީ އިރުޝާދު ދީފަ އެވެ.

އެ މިނިސްޓްރީން ހާމަކުރި ގޮތުގައި، ބައިނަލްއަގުވާމީ ކަނޑުމަތީގެ މުއާހަދާތަކުގެ ދަށުން ހިންގާ އުޅަނދުފަހަރާއި، ކަނޑައެޅިފައިވާ ގަވާއިދުތަކާއި އުސޫލުތަކާ އެއްގޮތަށް ދަތުރުކުރާ އުޅަނދުފަހަރު މި މެދުކަނޑާލުމުން އިސްތިސްނާވާނެ އެވެ.

މީގެ އިތުރުން، މި ރައްކާތެރިކަމުގެ ފިޔަވަޅަކީ ކަމާބެހޭ ސަލާމަތީ އިދާރާތަކާ ގުޅިގެން އަޅާފައިވާ ފިޔަވަޅެއް ކަމަށް އެ ބަޔާނުގައި ބުނެފައިވެ އެވެ. އަދި މި އެންގުމަށް ފުރިހަމައަށް ބޯލަނބައި އަމަލުކުރުމަށް އާންމު ރައްޔިތުންނަށް ވަނީ އިލްތިމާސްކޮށްފަ އެވެ.

މި ފިޔަވަޅު އަޅާފައި މިވަނީ، ސަރަހައްދީ މަސްރަހަށް އައި ބަދަލުތަކާ ގުޅިގެން މީގެ ކުރިން ކަނޑުމަތީގެ ހަރަކާތްތައް މެދުކަނޑާލުމަށްފަހު، އަލުން އެ ހަރަކާތްތައް ފެށުމަށް ގަތަރުން ހުއްދަ ދީފައި ވަނިކޮށެވެ.