ޕާޓީތަކުން ހިންގިޔަސް އަޚުލާގީ ގޮތުން ދަށުދަރަޖައިގެ ކަންކަމަށް އެއްބާރުލުމެއް ނުލިބޭނެ: ޝަކީލް

ސިޔާސީ ޕާޓީތަކުން ހިންގިޔަސް އަޚުލާގީ ގޮތުން ދަށުދަރަޖައިގެ ކަންކަމާއި ކުށްތަކަށް އަރައިގަތުން ކަހަލަ ކަންކަމަށް އިލެކްޝަންސް ކޮމިޝަނުގެ އެއްބާރުލުން ނުލިބޭނެ ކަމަށް އެ ކޮމިޝަނަށް ރައީސް މުއިއްޒު އައްޔަނު ކުރެއްވި އައު ރައީސް މުހައްމަދު ޝަކީލް ވިދާޅުވެއްޖެ އެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން ޝަކީލް ވިދާޅުވީ، ގާނޫނީ އިމުގެ ތެރެއިން ސިޔާސީ ޕާޓީތަކުން ހިންގާ ހަރަކާތްތަކަށް ކޮމިޝަނުން ފުރިހަމަ އެއްބާރުލުން ދޭނެ ކަމުގެ ޔަގީންކަން ދެއްވާ ކަމަށެވެ. އެހެން ނަމަވެސް ސިޔާސީ ޕާޓީތަކުން ހިންގިޔަސް އަޚުލާގީ ގޮތުން ދަށުދަރަޖައިގެ ކަންކަމާއި ކުށްތަކަށް އަރައިގަތުން ކަހަލަ ކަންކަމަށް ކޮމިޝަނުގެ އެއްބާރުލުމެއް ނުލިބޭނެ ކަމަށެވެ. 

ޝަކީލް އެހެން ވިދާޅުވިއިރު، ސިޔާސީ ޕާޓީގެ ގާނޫނާ ޚިލާފަށް ބައެއް ސިޔާސީ ޕާޓީތަކުން ހިންގަމުންދާ ކަމަށް ބުނާ ހަރަކާތްތައް ހުއްޓުވައި އެ ފަރާތްތަކާމެދު ގާނޫނާ އެއްގޮތަށް ފިޔަވަޅު އެޅުމަށް ގޮވާލާ، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ގަރާރުގެ މަސައްކަތް ދަނީ ކުރަމުންނެވެ. 

އެ ގަރާރުގައި ބުނީ ސިޔާސީ ޕާޓީތަކުން ސިޔާސީ ހަރަކާތްތައް ހިންގާއިރު ގާނޫނު އަސާސީ އާ ސިޔާސީ ޕާޓީގެ ގާނޫނު އިން ކަނޑައަޅާފައިވާ އިންތަކުގެ ތެރޭގައި އެފަދަ ހަރަކާތްތައް ހިންގުމަކީ ގައުމުގެ މަސްލަހަތާއި އަމަންއަމާން ކަމަށް މުހިއްމު ކަމެއް ކަމަށެވެ. އަދި ސިޔާސީ ޕާޓީގެ ގާނޫނުގެ 45 ވަނަ މާއްދާ އާ ޚިލާފަށް ބައެއް ސިޔާސީ ޕާޓީތަކުން ސިޔާސީ ހަރަކާތްތައް ހިންގައި، މަސްލަހަތު ނަގާލައި، ގާނޫނުގައި ކަނޑައަޅާފައިވާ އުސޫލުތަކާ ހަމަތަކާ ޚިލާފަށް ހިންގަމުންދާ ގާނޫނާ ޚިލާފު ސިޔާސީ ހަރަކާތްތަކުގެ ސަބަބުން މާލޭގައި ދިރިއުޅޭ އެތައް ހާސް ރައްޔިތުންނަށް އެކަމުގެ ދަތި އުނދަގޫތައް ތަހައްމަލު ކުރަން ޖެހިފައިވާތީ އެފަދަ ފަރާތްތަކުން ހިންގަމުން ގެންދާ ގާނޫނާ ޚިލާފު ކަންކަން ހުއްޓުވައި، އެފަދަ ފަރާތްތަކާ މެދު ދައުލަތުގެ ކަމާ ގުޅުންހުރި އިދާރާތަކުން ގާނޫނާ އެއްގޮތަށް ފިޔަވަޅު އެޅުމަށް ގޮވާލާ ކަމަށެވެ.

ޝަކީލް އެންމެފަހުން ހުންނެވީ، މޯލްޑިވްސް ޙައްޖު ކޯޕަރޭޝަންގެ މެނޭޖިންގ ޑިރެކްޓަރ ކަމުގެ މަޤާމުގަ އެވެ.  ކޮމިޝަންގެ ޑިރެކްޓަރ ޖެނެރަލްގެ މަގާމުގެ އިތުރުން ކޮމިޝަނުގެ މެމްބަރުކަން ވެސް ކުރައްވާފައި ޝަކީލް އަކީ ވެރިކަން ކުރާ ޕާޓީ ޕީއެންސީގެ ރަޖިސްޓްރާގެ މަގާމު އެންމެ ފަހުން ފުރުއްވި ފަރާތްކަން ވެސް ފާހަގަ ކުރެވެ އެވެ.

އިންސާފުވެރިކަމާ އެކު އިންތިޚާބުތައް ބޭއްވުމުގެ ޒިންމާ މަތިކޮށްފައިވާ އިލެކްޝަންސް ކޮމިޝަންގެ އެންމެ މަތީ މަގާމަށް ޝަކީލް އައްޔަން ކުރި އިރު އޭނާ އަކީ ވަރަށް ފާޅުގައި އިދިކޮޅު އެންމެ ބޮޑު ޕާޓީ، އެމްޑީޕީ އަށް ވަރަށް ބޮޑަށް މީސްމީޑިއާ ގައި ފާޑުކިޔާފައިވާ ފަރާތެއްކަން ފާހަގަ ކުރެވެ އެވެ. އޭގެ އިތުރުން އެންމެ ފަހުން އޮތް އެމްޑީޕީގެ ސަރުކާރުގެ ދުވަސްވަރު އެ ސަރުކާރާ ދެކޮޅަށް އޭރުގެ އިދިކޮޅު ފަރާތްތަކުން ހިންގި "އިންޑިއާ އައުޓް" ކެމްޕޭނަށް ވެސް ވަރަށް ފާޅުގައި ތާއީދު ކުރައްވާ އިންޑިއާ އަށާއި ދިވެހި ސަރުކާރަށް ބަދުބަސްތައް ވިދާޅުވެފައިވާ ފަރާތެއްކަން ވެސް ފާހަގަ ކުރެވެ އެވެ.