އާންމުންގެ ޝަކުވާގެ ރާޅެއް: ތަކެތީގެ އަގު އުޑަށް، ބޭސްލިބުން ދަތިވެއްޖެ، ކަރަންޓު ބިލްތައް ދެގުނަ!

މި ސަރުކާރު އައި ފަހުން ވިޔަފާރިތައް ބަނގުރޫޓުވެ، ދިރިއުޅުމުގެ ޚަރަދުތައް އަތްނުފޯރާ ފަށަށް އުފުލެމުންދާތީ ހދ. ހަނިމާދޫގެ ރައްޔިތުންނާއި ވިޔަފާރިވެރިން އިންތިހާއަށް ކަންބޮޑުވުން ފާޅުކޮށްފި އެވެ.

ރާއްޖެޓީވީގެ "ހާލު ކިހިނިހެއް؟" ޕްރޮގްރާމްގައި ވާހަކަދައްކައި ރަށުގެ އާންމު ހާލަތާ ބެހޭގޮތުން މައުލޫމާތު ދިން ގިނަ ބަޔަކު ސިފަކުރި ގޮތުގައި، އިއްޔެއަށް ވުރެ މިއަދު ކޮންމެ އެއްޗެއްގެ އަގު ވެސް މިވަނީ ބޮޑުވެ، ރައްޔިތުންގެ ޖީބުތަކަށް ނުކަތާ ވަރު ވެފަ އެވެ.

ރަށުގެ ވިޔަފާރިވެރިން ބުނާ ގޮތުގައި ބާޒާރުން ތަކެތި ލިބުން ދަތިވެ، މުދަލުގެ އަގު ވަނީ އިންތިހާއަށް އުފުލިފަ އެވެ. ކުރިން 20 ރުފިޔާ އަށް ލިބުނު އާންމު މުދާ މިހާރު 25 އާއި 30 ރުފިޔާއާ ދެމެދުގެ އަގުތަކެއްގައި އުޅޭއިރު، ބައެއް ޒަރޫރީ ތަކެތީގެ އަގު ވަނީ މުޅިން ދެގުނަވެފަ އެވެ. މީގެ ކުރިން ގާތްގަނޑަކަށް 290 ރުފިޔާ އަށް ލިބުނު ކައްކާ ތެޔޮ ކޭހެއްގެ އަގު މިހާރު ހުރީ ޑަބަލްވެފަ އެވެ. މިކަމާ ގުޅިގެން ކަންބޮޑުވުން ފާޅުކުރި ވިޔަފާރިވެރިއަކު ބުނީ، އެއްޗެހި ވިއްކަން ބަލާއިރު އެ ތަކެތި ގަންނަން ތިބެނީ ވެސް ހަމަ އާންމު ނިކަމެތި ރައްޔިތުން ކަމަށާއި، ކިރިޔާ ވެސް ފޫބެއްދޭނަމަ ބޮޑުއަގުތަކެއް ނަގަން އެމީހުންގެ ހިތަށް ކުޅަދާނަ ނޫން ކަމަށެވެ.

ދަނޑުވެރިކަން ދެން ވަރަށް ދަތި. އެކި ފާޑުފާޑުގެ ބަލިބައްޔާ އެކި ފާޑުފާޑުގެ ކަންތައްތަކުގެ ސަބަބުން ދަނޑުވެރިކަމުގެ މަސައްްކަތް ވަރަށް ދަށް. ގަސް ކާނާގެ އަގު އުޅެނީ ވަރަށް މަތީގައި. އެންމެފަހުން މިހާރު އަޅުގަނޑުމެން 60 ރުފިޔާ އަށް ލިބުނު ގަސް ކާނާ މި ގެންނަނީ 130 ރުފިޔާ އަށް. ހުރިހާ އެއްޗެއް ވެސް އަގުބޮޑު. އެއްޗެހި ވިއްކަންވާއިރު އެއްޗެހި ގަންނަން ވެސް ތިބެނީ ވެސް ރުފިޔާ ޖަހާ މީހުންނެއް ނޫން ދޯ. ދެން އަހަރުމެންނަކަށް ވެސް ހިތަށް ކުޅަދާނައެއް ނުވޭ އެމީހުންނަށް ބޮޑެތި އަގުތަކުގަ ވިއްކާކަށް. އަޅުގަނޑުމެން ބޭނުމެއް ނޫން ކިރިޔާ ވެސް ފޫބެއްދޭނަމަ ބޮޑުއަގުތަކެއް ނަގާކަށް. އަހަރަމެންނަށް ވެސް އެނގޭ ހަމަ އަހަރެމެން ކަހަލަ މީހުންކަން ގަންނަން ތިބެނީ. 

ހދ. ހަނިމާދޫ ދަނޑުވެރިއެއް

އާންމު ދިރިއުޅުމަށް ދިމާވެފައިވާ އަނެއް ބޮޑު ހުރަހަކީ ކަރަންޓު ބިލްތަކަށް އައި ބޮޑު ބަދަލެވެ. ބޭނުންކުރާ ކަރަންޓުގެ މިންވަރަށް ނުވަތަ ގޭގެ ތަނަވަސްކަމާއި ބޭނުންކުރާ ތަކެއްޗަށް އެއްވެސް ބަދަލެއް ނައިސް، ކުރިން 5,000 އާއި 6,000 ރުފިޔާއާ ދެމެދު ހިފެހެއްޓިފައި ހުރި ކަރަންޓު ބިލްތައް މިހާރު ވަނީ 12,000 އާއި 13,000 ރުފިޔާ އަށް އަރާފަ އެވެ. މީގެ އިތުރުން ރަށުން ކަރަންޓު ކަނޑާތީ ރައްޔިތުންގެ މެދުގައި ނުރުހުން ވަނީ ވަރަށް ބޮޑަށް އިތުރުވެފަ އެވެ.

ރަށުގައި އެސްޓީއޯގެ ބޭސްފިހާރައެއް ހުރި ނަމަވެސް، ވޭތުވެދިޔަ 6 މަސްދުވަހުގެ ތެރޭގައި އާންމުކޮށް ބޭނުންކުރާ "އަފަމޯލް" ފަދަ އެއްވެސް ބޭހެއް އަދި ބޭސް މަލަން ފަދަ އާދައިގެ ސިމްޕަލް އެއްޗެއް ވެސް ލިބެން ނެތް ކަމަށް ރައްޔިތުން ބުނެ އެވެ. ފިހާރަ ހުއްޓަސް ބޭސް ނުހުންނާތީ، ބޮޑެތި އޮޕަރޭޝަންތައް ކޮށްގެން ދާއިމީ ގޮތެއްގައި ދުވާލަކު 16 ގުޅަ ބޭސް ކާންޖެހޭ ބަލިމީހުން ވެސް މިހާރު ބޭސް ގެންނަން ޖެހެނީ މާލެއިން ނުވަތަ ކުޅުދުއްފުށިންނެވެ.

ބޭސް ކަން ވަރަށް ގިނައިން. 16 ގުޅަ ކާން ޖެހޭ. ވަރަށް ބޮޑު އޮޕަރޭޝަނެއް ކޮށްފަ. ބޭސް ލިބޭ އެކަމު މިރަށަކުން ބޭހެއް ނުލިބޭ. މާލެ އިންނާ ކުޅުދުއްފުށިން ގެންނަނީ. މިރަށުގަ ބޭސް ފިހާރަ އެއް ހުރޭ. އެކަމު ނުލިބެނީ. ފިހާރަ ހުރޭ ބޭސް ނުހުންނަނީ. ކުރިން ތަރައްގީވި، ކުރިން ވެރިކަމުގަ ވި. މިހާރު ތަރައްގީ ހުއްޓުނީ ކަމެއް ހުއްޓާލީ ކަމެއް ނޭނގެ. ލާރި ނެތީކީ ވެސް ނޫން. ކުރަން ބޭނުން ނުވަނީ. ހުރިހާ އެއްޗެއް އަގު ބޮޑު. އިއްޔެ އަށް ވުރެ މިއަދު އަގުބޮޑު. 

ހދ. ހަނިމާދޫ އިން ވާހަކަދެއްކި ރައްޔިތެއް

ހަނިމާދޫގެ ގިނަ ރައްޔިތުން ގަބޫލުކުރާ ގޮތުގައި ކުރީގެ ސަރުކާރުގައި ރަށަށް އައި ތަރައްގީގެ ދުވެލި މިހާރު ވަނީ މުޅިން ހުއްޓިފަ އެވެ. ރަށުގެ އާންމުންގެ މީހަކު ސަރުކާރުގެ ސިޔާސަތުތަކަށް ފާޑުކިޔަމުން ބުނީ، ރައީސް އިބްރާހިމް މުހައްމަދު ސޯލިިހުގެ ވެރިކަމުގައި އެ ރަށް ތަރައްގީ ވި ކަމަށެވެ.

ނަމަވެސް މިހާރު ތަރައްގީ ހުއްޓުނީ ކަމެއް ހުއްޓާލީ ކަމެއް ނޭނގޭ ކަމަށާ ލާރި ނެތީ ނޫން ކަމަށެވެ. ރައްޔިތުން ބުނީ މި ސަރުކާރުން އެ ރަށް ތަރައްގީ ކުރަން ބޭނުން ނުވަނީ ކަމަށެވެ. ހަނިމާދޫ ރައްޔިތުން މިހާރު ގޮވާލަމުންދަނީ، އަސާސީ ބޭހާއި، ކަރަންޓުގެ ޚިދުމަތް އެކަށީގެންވާ އަގެއްގައި ފޯރުކޮށްދީ، ތަކެތީގެ އަގުތައް ކޮންޓްރޯލް ކުރުމަށް ސަރުކާރުން އަވަސް ފިޔަވަޅުތަކެއް އެޅުމަށެވެ.