އެމެރިކާއިން އީރާނަށް ހުރްމުޒް ކަނޑުއޮޅި ހުޅުވާލުމަށް މުހުލަތު ދީފި

ހުރްމުޒް ކަނޑުއޮޅި އެއްކޮށް ހުޅުވާލުމަށް އެމެރިކާ އިން އީރާނަށް މުހުލަތު ދީފި ކަމަށް އެކްސިއޯސް އިން ރިޕޯޓްކޮށްފި އެވެ. ދުނިޔޭގެ ކަނޑުމަގުން ކުރާ ތެލާއި އެލް.އެން.ޖީ ވިޔަފާރީގެ ހަތަރުބައިކުޅަ އެއްބައި ހިއްސާކުރާ މި މުހިންމު ކަނޑުއޮޅި، ދަތުރުފަތުރަށް ފުރިހަމައަށް ހުޅުވާލާފައިވާކަން އާންމުކޮށް އިއުލާނުކުރުމަށާއި، އެ ސަރަހައްދުން ދަތުރުކުރާ އުޅަނދުފަހަރަށް ހަމަލާނުދޭނެ ކަމުގެ ޔަގީންކަން ދިނުމަށް އެމެރިކާއިން އީރާނަށް އަންގާފައިވާ ކަމަށް ހުކުރު ދުވަހު ގިނަ މީޑިއާތަކަކުން ވަނީ ރިޕޯޓްކޮށްފަ އެވެ.

ހުރްމުޒް ކަނޑުއޮޅި ބެލެހެއްޓުމާ ގުޅޭގޮތުން ޖޫން މަހުގެ 17 ވަނަ ދުވަހު ސޮއިކުރި ފަހުމުނާމާ (އެމް.އޯ.ޔޫ) މާނަކުރުމުގައި އުފެދުނު ހިޔާލުތަފާތުވުންތަކާ ގުޅިގެން އެމެރިކާއާއި އީރާނާ ދެމެދު ވަނީ ކުރިމަތިލުންތަކެއް ހިނގާފަ އެވެ. ވިޔަފާރިކުރާ ތިން އުޅަނދަކަށް ދިން ހަމަލާތަކުގެ ޒިންމާ ވޮޝިންޓަނާއި ގަލްފުގެ ގައުމުތަކުން ތެހެރާންގެ ބޮލުގައި އެޅުވުމާ ގުޅިގެން، ބުދަ އަދި ބުރާސްފަތި ދުވަހު ދެ ގައުމުގެ ދެމެދުގައި ވަނީ ހަމަލާތަކެއް ބަދަލުކޮށްފަ އެވެ.

އެކްސިއޯސް އިން ރިޕޯޓްކޮށްފައިވާ ގޮތުގައި، ހުކުރު ދުވަހު ނޫސްވެރިންނާ ވާހަކަދައްކަވަމުން އެމެރިކާގެ އޮފިޝަލަކު ވިދާޅުވީ، ކަނޑުއޮޅީގެ ހުރިހާ މަގުތަކެއް ހުޅުވާލާފައިވާ ކަމަށާއި، އެއްވެސް ފީއަކާ ނުލައި ދަތުރުކުރެވޭނެ ކަމަށް އީރާނުން ބުނާނެ ކަމަށް އުންމީދުކުރާ ކަމަށެވެ. ހޮނިހިރު ދުވަހު އޮމާންގައި މަޝްވަރާ ކުރާ ފަރާތްތަކުން ބައްދަލުކުރުމަށްފަހު، އެމެރިކާއިން ހުށަހަޅާފައިވާ މި ޝަރުތުތައް ގަބޫލުކޮށް އީރާނުން ބަޔާނެއް ނެރޭނެ ކަމަށް ބެލެވޭ ކަމަށް އެމެރިކާގެ އޮފިޝަލުން މީޑިއާއަށް މައުލޫމާތު ދީފައިވެ އެވެ.

އެމެރިކާގެ އޮފިޝަލަކު ވިދާޅުވީ، މާދަމާ އީރާނުން މިގޮތަށް އަމަލުނުކޮށްފިނަމަ، އެ ގައުމަށް އެއީ "އުފާވެރި ދުވަހަކަށް ނުވާނެ" ކަމަށެވެ. ހުކުރު ދުވަހު "ޓްރުތް ސޯޝަލް" ގައި ކުރެއްވި ޕޯސްޓެއްގައި އެމެރިކާގެ ރައީސް ޑޮނަލްޑް ޓްރަމްޕް ވަނީ މަޝްވަރާތައް ކުރިއަށްދާނެ ކަމަށާއި، ނަމަވެސް "ހަމަލާ ބަދަލުކުރުން ހުއްޓާލުމުގެ އެއްބަސްވުން މިހާރު ނިމިއްޖެ" ކަމަށް ވިދާޅުވެ އިންޒާރު ދެއްވާފަ އެވެ.

އީރާނުގެ ޚާރިޖީ ވުޒާރާގެ ތަރުޖަމާނު އިސްމާއީލް ބަޣާއީ ވަނީ، އާ ބުރުގެ މަޝްވަރާތަކަކަށް ތެހެރާނުން އެދުނު ކަމަށް ޓްރަމްޕް ކުރެއްވި ދައުވާ ދޮގުކުރައްވާފަ އެވެ. އޭނާ ވިދާޅުވީ އެމެރިކާއިން ހަމަލާ ބަދަލުކުރުން ހުއްޓާލުމުގެ އެއްބަސްވުމާ ޚިލާފުވެއްޖެނަމަ، އޭގެ ރައްދު ހަމަ އެގޮތަށް ދޭނެ ކަމަށެވެ.

އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި، ސަރަހައްދީ މެދުވެރިންނާ ބައްދަލުކުރެއްވުމަށް އީރާނުގެ ޚާރިޖީ ވަޒީރު އައްބާސް އަރާގްޗީ ހޮނިހިރު ދުވަހު އޮމާނަށް ވަޑައިގަންނަވާނެ އެވެ.

އީރާނުގެ އިސް މަންދޫބު މުހައްމަދު ބާގިރު ޣާލީބާފް ހުކުރު ދުވަހު ވިދާޅުވީ، ތެހެރާނުން އަދިވެސް "އެމެރިކާ އަށް އިތުބާރު ނުކުރާ" ކަމަށާއި، "އީރާނުގެ ރައްޔިތުން ދުވަހަކުވެސް އަނިޔާވެރިކަމަށް ބޯނުލަނބާނެ" ކަމަށެވެ.

ފެބްރުއަރީ 28 ވަނަ ދުވަހު އެމެރިކާއާއި އިސްރާއީލުން ދިން ހަމަލާއާ ގުޅިގެން އީރާނުން ވަނީ ގިނަ އުޅަނދުފަހަރަށް އެ ކަނޑުއޮޅި ބަންދުކޮށްފަ އެވެ. އޭގެ ފަހުން ތެހެރާނުން ބާރުއަޅަމުންދަނީ ހުރިހާ އުޅަނދަކުންވެސް އެ ގައުމުގެ އިރުޝާދުތަކަށް ތަބާވުމަށާއި، ކަނޑައަޅާފައިވާ ވަކި މަގުތަކަކުން ދަތުރުކުރުމަށެވެ.

ސޮއިކޮށްފައިވާ ފަހުމުނާމާގެ ދަށުން، ވިޔަފާރި އުޅަނދުފަހަރަށް ރައްކާތެރިކަމާއެކު ދަތުރުކުރެވޭނެ އިންތިޒާމުތައް 60 ދުވަހުގެ މުއްދަތަށް ހަމަޖެއްސުމަށާއި، ހުރްމުޒް ކަނޑުއޮޅި ކުރިމަގުގައި ބަލަހައްޓާނެ ގޮތަކާ މެދު އޮމާނާއެކު މަޝްވަރާކުރުމަށް އީރާނުން ވަނީ އެއްބަސްވެފަ އެވެ.