ކުދިންނަށް ތަރުކާރީ ކާންދޭން ސައިންސްގެ ލަފާ
ކުޑަކުދިން ތަރުކާރީ ކެއުމަށް އާދަކުރުވުމަށްޓަކައި އެންމެ މުހިންމީ އުންމީދު ކަނޑާނުލައި ތަކުރާރުކޮށް އެ ބާވަތްތައް ކުދިންނަށް ދިނުމާއި، ބެލެނިވެރިން އަމިއްލައަށް ކައިގެން ނަމޫނާ ދެއްކުން. މީގެ އިތުރުން ކެއްކުމާއި ބާޒާރުކުރުމުގައި ކުދިން ބައިވެރިކުރުވުމަކީ ކާނާއަށް ހުންނަ ބިރުވެރިކަން ކުޑަވެ ޝައުގުވެރިކަން އިތުރުވާނެ ކަމެއް. ކެއުމަށް މަޖުބޫރުކުރުމުގެ ބަދަލުގައި އުފާވެރި މާހައުލެއްގައި ކެތްތެރިކަމާއެކު މިކަން ކުރުމުން، ދިގު މުއްދަތަކަށް ސިއްހީ ރަނގަޅު އާދަތައް ކުއްޖާގެ ކިބައިގައި ހަރުލާނެ.
ކުޑަކުއްޖަކު ކިއުކަންބާ ކުޅެއް ކަނީ | ގެޓީ އިމޭޖަސް
ކުޑަކުދިންނަށް ތަރުކާރީ ކެއުމަށް ބާރުއެޅުމަކީ ގިނަ ބެލެނިވެރިންނަށް ކުރިމަތިވާ ބޮޑު ގޮންޖެހުމަކަށް ވީނަމަވެސް، ސައިންސީ ދިރާސާތަކުގެ އެހީގައި މިކަމަށް ހައްލު ހޯދިދާނެ ކަމަށް ބީބީސީ ފިއުޗަރ އިން ރިޕޯޓުކޮށްފި އެވެ. ދިރާސާވެރިން ބުނާ ގޮތުގައި ކުދިން ތަރުކާރީއަށް ނޫނެކޭ ބުނަނީ އޭގެ ރަހަ ނުބައިވެގެން އެކަންޏެއް ނޫނެވެ. މިއީ އިންސާނާގެ ތަރައްގީގެ މަރުހަލާގައި "ނިއޯފޯބިއާ" ނުވަތަ އާ ކާނާއަށް ބިރުގަތުމުގެ ސަބަބުން ދިމާވާ ކަމެއް ކަމަށް ރިޕޯޓުތައް ބުނެ އެވެ.
ކުދިން ތަރުކާރީއަށް އާދަކުރުވުމަށްޓަކައި އެންމެ މުހިންމު ކަމަކީ ތަކުރާރުކޮށް އެ ތަރުކާރީއެއް ކުއްޖާއަށް ދެއްކުމެވެ. ދިރާސާތަކުން ދައްކާ ގޮތުގައި ވަކި ބާވަތެއްގެ ތަރުކާރީއެއް ކުއްޖާއަށް ކަމުދިއުމުގެ ކުރިން 10 ފަހަރާއި 15 ފަހަރާ ދެމެދުގެ އަދަދަކަށް އެ ތަރުކާރީއެއް ރަހަބަލަން ޖެހިދާނެ އެވެ. އެހެންކަމުން ފުރަތަމަ ފަހަރު ކުއްޖާ ދެކޮޅު ހެދި ނަމަވެސް، އުންމީދު ކަނޑާނުލައި ތަފާތު ދުވަސްތަކުގައި އެ ތަރުކާރީއެއް ކުއްޖާއަށް ދިނުމަކީ މުހިންމު ކަމެއް ކަމަށް ތަޖުރިބާކާރުން ބުނެ އެވެ.
މީގެ އިތުރުން، ކުދިންނަށް ތަރުކާރީ ދޭއިރު އެކަމުގައި އެކުދިން ބައިވެރިކުރުވުމަކީ ވެސް ނަތީޖާ ފެންނަ ކަމެކެވެ. އެގޮތުން ތަރުކާރީ ގަންނަން ދާއިރު ކުއްޖާ ގޮވައިގެން ދިއުމާއި، ކެއްކުމުގައި ކުދިން ބައިވެރިކުރުވުމުން އެ ކާނާއާ މެދު ކުދިންގެ ހިތުގައި އޮންނަ ބިރުވެރިކަން ކުޑަވެ، އެ ކެއުމަށް ޝައުގުވެރިކަން އުފެދޭ ކަމަށް އޮފިޝަލުން ބުނެ އެވެ. އަދި ތަރުކާރީގެ ރަހަ މީރުކުރުމަށްޓަކައި ކުޑަ ހަކުރުކޮޅެއް ނުވަތަ ލޮނުކޮޅެއް ބޭނުންކުރުމަކީ ވެސް ފެށުމެއްގެ ގޮތުން ކުރެވިދާނެ ކަމެއް ކަމަށް ދިރާސާވެރިން ފާހަގަކުރެ އެވެ.
ކުދިންނަށް ނަމޫނާ ދެއްކުމަކީ ވެސް މިކަމުގައި ވަރަށް މުހިންމު ދައުރެއް އަދާކުރާ ކަމެކެވެ. ބެލެނިވެރިން އަމިއްލައަށް ތަރުކާރީ ކައި، އެއީ މީރު އެއްޗެއްކަން ކުދިންނަށް ދެއްކުމުން، ކުދިން އެކަން ނަކަލުކުރުމުގެ ފުރުސަތު ބޮޑުވެ އެވެ. އަދި ކެއުމުގެ ވަގުތަކީ އުފާވެރި ވަގުތަކަށް ހެދުމާއި، ކެއުމަށް މަޖުބޫރު ނުކުރުމަކީ ކުދިންގެ ކެއުމުގެ އާދަތަކަށް ހެޔޮ ބަދަލެއް އަންނާނެ ކަމެއް ކަމަށް ރިޕޯޓުގައި ބަޔާންކޮށްފައިވެ އެވެ.
ތަރުކާރީ ކެއުމުން އިނާމު ދިނުމަކީ ވެސް ބައެއް ހާލަތްތަކުގައި ބޭނުންކުރެވިދާނެ އުކުޅެކެވެ. ނަމަވެސް މިގޮތަށް އިނާމު ދޭއިރު ފޮނި އެއްޗެހި ނުވަތަ ސްވީޓްސް އިނާމެއްގެ ގޮތުގައި ދިނުމުގެ ބަދަލުގައި، ސްޓިކާ ފަދަ ކުދިކުދި ހަދިޔާ ބޭނުންކުރުމަށް ތަޖުރިބާކާރުން ލަފާދެ އެވެ. މިކަމުގެ ސަބަބުން ތަރުކާރީ ކެއުމަކީ ކުއްޖާއަށް ލިބޭ ކާމިޔާބީއެއްގެ ގޮތުގައި އިހުސާސް ކުރެވޭނެ އެވެ.
އެންމެ ފަހުގެ ދިރާސާތަކާ ހަވާލާދީ ބީބީސީން ބުނެފައިވަނީ، ކުދިންނަށް ތަރުކާރީ ކާން ދަސްކޮށްދިނުމަކީ ކެތްތެރިކަމާއެކު ކުރަންޖެހޭ މަސައްކަތެއް ކަމަށެވެ. ކުއްޖާގެ އުމުރުން ދެ އަހަރުވުމުގެ ކުރިން ތަފާތު ބާވަތްތަކުގެ ތަރުކާރީއަށް ހޭނުވުމަކީ، ބޮޑުވާއިރު ސިއްހަތަށް ފައިދާހުރި ކާނާ ކެއުމުގެ އާދަ ހަރުލުމަށް ލިބޭ ވަރަށް ބޮޑު އެހީއެއް ކަމަށް ވެސް އެ ރިޕޯޓުގައި ފާހަގަކޮށްފައިވެ އެވެ.
މަސްދަރު: BBC
