އިނގިރޭސިވިލާތުގައި 16 އަހަރުން ދަށުގެ ކުދިންނަށް ރެޑް ބުލް، މޮންސްޓަރ އަދި ޕްރައިމް ފަދަ އެނަރޖީ ޑްރިންކްސް ފިހާރަތަކުންނާއި، ރެސްޓޯރަންޓް ތަކުންނާއި، ކެފޭ ތަކުންނާއި، ވެންޑިންގ މެޝިންތަކުންނާއި އަދި އޮންލައިންކޮށް ވިއްކުން މަނާ ކުރުމަށް އައު ޤާނޫނެއް ތައާރުފް ކުރަމުންދާ ކަމަށް ރިޕޯޓު ކޮށްފިއެވެ.

ގިނަ ސުޕަރމާކެޓްތަކުން މިހާރުވެސް އަމިއްލައަށް މިކަން މަނާކޮށްފައިވީ ނަމަވެސް، އިނގިރޭސިވިލާތުގައި ކުޑަކުދިންގެ ތިންބައިކުޅަ އެއްބައި މިފަދަ ބުއިންތައް މަދުވެގެން ހަފުތާ އަކު އެއް ފަހަރު ބޯކަމަށް ލަފާކުރެވެއެވެ. ބައެއް މަޤްބޫލު ބުއިންތަކުގައި ދެ ތަށި ކޮފީ އަށް ވުރެ ގިނަ އިން ކެފީން އެކުލެވެއެވެ. އިނގިރޭސިވިލާތުގެ ހެލްތް އެންޑް ސޯޝަލް ކެއަރ ސެކްރެޓަރީ ވިދާޅުވީ މައިންބަފައިންނާއި މުދައްރިސުންގެ ކަންބޮޑުވުންތަކަށް އިޖާބަދީ، ޒުވާނުންގެ ސިއްހަތު ރައްކާތެރި ކުރުމަށް މިމައްސަލައާ "ސީދާ" ކުރިމަތިލާކަމަށެވެ.

ޑައިޓް ކޯކް ފަދަ ކެފީން މަދު ސޮފްޓް ޑްރިންކްސް އާއި، ސަޔާއި ކޮފީ މި ޤާނޫނުގައި ނުހިމެނެއެވެ. ބިލު އެކުލަވާލުމުގެ މަސައްކަތުގައި 12 ހަފްތާގެ މަޝްވަރާއެއް ކުރިއަށްދާނެއެވެ. މީގެތެރޭގައި ސިއްހީ އަދި ތަޢުލީމީ މާހިރުންނާއި، އާންމު ރައްޔިތުންނާއި، ވިޔަފާރިވެރިންނާއި އުފެއްދުންތެރިންގެ ފަރާތުން މައުލޫމާތު އެއްކުރެވޭނެއެވެ.

ގިނައިން ކެފީން ބުއިމުން ހިތުގެ ވިންދު އަވަސްވުމާއި، ހިތުގެ ވިންދު އާދަޔާ ޚިލާފުވުމާއި އަދި ފިޓްޖެހުން ވެސް ކުރިމަތިވެދާނެއެވެ. މަދުން ނަމަވެސް، ކެފީން ބެނުން ކުރުން ގިނަވުމާ ގުޅިގެން ފުރާނަ ގެއްލުމުގެ ހާދިސާތައް ވެސް ހިނގާފައިވެއެވެ. މިހާރުގެ ލޭބަލް ކުރުމުގެ ޤަވާއިދުތަކުގެ ދަށުން، ސަޔާއި ކޮފީ ފިޔަވައި، ލީޓަރަކަށް 150މގ އަށް ވުރެ ގިނައިން ކެފީން އެކުލެވޭ ކޮންމެ ބުއިމެއްގައި އިންޒާރުގެ ލޭބަލެއް ހުންނަންޖެހެއެވެ. އެއީ: "ކެފީން ގިނައިން އެކުލެވޭ. ކުޑަކުދިންނަށާއި މާބަނޑު އަދި ގާތުން ކިރުދޭ މައިންނަށް ކަމުނުދާ އެއްޗެއް،" ކަމަށް ލިޔެފައި ހުންނަން ޖެހެއެވެ.

ޒުވާނުން ކުދިންގެ ހަށިގަނޑު ކުޑަވެފައި، ސިކުނޑި އަދިވެސް ތަރައްޤީ ވަމުން ދާތީ، އެމީހުންނަށް ކެފީންގެ އަސަރު ބޮޑަށް ކުރާކަމަށް މާހިރުން ބުނެއެވެ. ގިނަ ބޮޑެތި މީހުންނަށް، ދުވާލަކު 400މގ އާ ހަމައަށް ކެފީން، ނުވަތަ ގާތްގަނޑަކަށް ހަތަރު ތަށި އިންސްޓަންޓް ކޮފީ ނުވަތަ ފަސް ތަށި ސައި، ރައްކާތެރިއެވެ.

"ފިހާރަތަކުން ކުޑަކުދިންނަށް މިފަދަ ބުއިންތައް ވިއްކުން މަނާ ކުރުމުން، އަޅުގަނޑުމެން ކުރިއަށް އޮތް ޖީލުތަކަށް ސިއްހަތު ރަނގަޅު އަދި އުފާވެރި ބިންގަލެއް އަޅަނީ،" އިނގިރޭސިވިލާތުގެ ހެލްތު ސެކްރެޓަރީ ސްޓްރީޓިންގ ވިދާޅުވިއެވެ.

ރޯޔަލް ކޮލެޖް އޮފް ޕީޑިއެޓްރިކްސް އެންޑް ޗައިލްޑް ހެލްތްގެ ރައީސް ޕްރޮފެސަރ ސްޓީވް ޓަރނަރ ވިދާޅުވީ އެނާރޖީ ޑްރިންކްސް މަނާ ކުރުމަކީ ކުޑަކުދިންގެ ކާނާ އިތުރަށް ސިއްހަތަށް ފައިދާހުރި ގޮތަކަށް ބަދަލުކުރުމުގެ "ދެން އަޅަންޖެހޭ ފިޔަވަޅު" ކަމަށެވެ.

ޒުވާނުންގެ ދިރިއުޅުމަށް މިފަދަ ބުއިންތަކުގެ އަސަރު ދިރާސާކުރައްވާފައިވާ ފަރާތެއް ކަމަށްވާ ޓީސައިޑް ޔުނިވަރސިޓީގެ ޕްރޮފެސަރ އަމީލިއާ ލޭކް، ވިދާޅުވީ ކުޑަކުދިންގެ ކާނާގައި މިފަދަ ބުއިންތަކަށް "ޖާގައެއް ނެތް" ކަމަށެވެ. "އަޅުގަނޑުމެންގެ ދިރާސާ ތަކުން ދައްކާ ގޮތުގައި ކުޑަކުދިން އެނަރޖީ ޑްރިންކްސް ބުއިމުން ނަފްސާނީ އަދި ޖިސްމާނީ ސިއްހަތަށް ބޮޑެތި އަސަރުތަކެއް ކުރެއެވެ. އަޅުގަނޑުމެންނަށް އެނގޭ މިފަދަ ބުއިންތަކަކީ ޒުވާނުންގެ ސަގާފަތުގެ ބައެއްކަމާއި، ކުޅިވަރާއި، ގޭމިންގއާއި، މިއުޒިކާ ގުޅިފައިވާ އެއްޗެހިކަން." އޭނާ ވިދާޅުވިއެވެ.

ނަމަވެސް ބްރިޓިޝް ސޮފްޓް ޑްރިންކްސް އެސޯސިއޭޝަންގެ ގެވިން ޕާޓިންގޓަން ވިދާޅުވީ މި ފަދަ ބުއިންތައް މިހާރުވެސް ސެލްފް ރެގިއުލޭޓް ކުރެވޭ ކަމަށެވެ. "ސަރުކާރުގެ އެހެން ހުރިހާ ސިޔާސަތުތަކެކޭ އެއްފަދައިން، ކުރިއަށް އޮތް ގާނޫނު ބިނާވާން ޖެހޭނީ ލިބެންހުރި ހެކިތަކުގެ މައްޗަށް ފުންކޮށް ވިސްނާ ދިރާސާއެއްގެ މައްޗަށް،" ކަމަށް އޭނާ އިތުރުކުރެއްވިއެވެ.

އުތުރު އައަރލަންޑް، ސްކޮޓްލަންޑް އަދި ވޭލްސް ގައި ވެސް އޭނާރޖީ ޑްރިންކްސް މަނާ ކުރުމާ މެދު ވިސްނަމުންދެއެވެ.