ޔޫއޭއީ ފަތުރުވެރިންނަށް އެންމެ ކަމުދަނީ ރާއްޖެ

2026 ވަނަ އަހަރުގެ މި ހޫނު މޫސުމުގައި، ޔުނައިޓެޑް އެރަބް އެމިރޭޓްސް (ޔޫއޭއީ) ގެ ފަތުރުވެރިންގެ މެދުގައި އެންމެ މަގުބޫލު މަންޒިލަކަށް ދިވެހިރާއްޖެ ހޮވިއްޖެއެވެ. "ޑީނާޓާ ޓްރެވަލް" އިން އާންމުކޮށްފައިވާ ތަފާސްހިސާބުތަކަށް ބަލާއިރު، މި ސީޒަނުގައި ބައިނަލްއަގުވާމީ ފެންވަރުގައި ކުރެވުނު ހޮޓެލް ބުކިންތަކުގެ ފަސްބައިކުޅަ އެއްބައި ހިއްސާކުރަނީ ރާއްޖެ އެވެ. މި ހޫނު މޫސުމުގައި ޔޫއޭއީގެ ފަތުރުވެރިންގެ މެދުގައި އެންމެ މަގުބޫލު ފަސް މަންޒިލްގެ ތެރޭގައި ރާއްޖޭގެ އިތުރުން ދެން ހިމެނެނީ ތައިލެންޑް، މޮރިޝަސް، ކެނެޑާ އަދި އޮސްޓްރޭލިއާ އެވެ.

ޔޫއޭއީގައި ހުންނަ ޑީނާޓާ ޓްރެވަލްގެ ރީޓެއިލް އެންޑް ލެއިޝަރ އޮޕަރޭޝަންސްގެ އިސްވެރިޔާ މީރާ ކެތައިތު ވިދާޅުވި ގޮތުގައި، މި އަހަރުގެ ހޫނު މޫސުމުގައި ބައިނަލްއަގުވާމީ ދަތުރުތަކަށް އޮތް މަގުބޫލުކަން ކުރިއަށްވުރެ ބޮޑުވެފައިވާއިރު، ކޮންމެ 10 ހޮޓެލް ބުކިންއެއްގެ ތެރެއިން ނުވަ ބުކިންއަކީ ގައުމުން ބޭރުގެ މަންޒިލްތަކަށް ކޮށްފައިވާ ބުކިންތަކެވެ. ރާއްޖެ، ތައިލެންޑް އަދި މޮރިޝަސް ފަދަ އަބަދުވެސް މަގުބޫލު މަންޒިލްތަކަށް އޮތް ޝައުގުވެރިކަން ދެމިއޮތް ނަމަވެސް، އާ މަންޒިލްތަކާއި ތަފާތު ތަޖުރިބާތައް ހޯދުމަށް ދުރު ރާސްތާގެ ގައުމުތަކަށް ދަތުރުކުރާ މީހުންގެ އަދަދު އިތުރުވަމުންދާކަން އެ ކުންފުނިން ފާހަގަކުރެ އެވެ.

މީގެ އިތުރުން، ޔޫއޭއީގެ އެތެރޭގެ ފަތުރުވެރިކަން ނުވަތަ "ޑޮމެސްޓިކް ސްޓޭ" އަކީވެސް މާކެޓުގެ މުހިންމު ބައެއްކަން ކެތައިތު ފާހަގަކުރެއްވި އެވެ. ހާއްސަކޮށް ބަންދު ދުވަސްތަކާ ދިމާކޮށް ކުރާ ކުރު ދަތުރުތަކުގައި ދުބާއީ، އަބޫދާބީ އަދި ފުޖައިރާ އަކީ މި ހޫނު މޫސުމުގައި އެންމެ މަގުބޫލު މަންޒިލްތަކެވެ. ބައިނަލްއަގުވާމީ ދަތުރުތަކަށް ބަލާއިރު، ފަތުރުވެރިން އާންމުކޮށް ފަސް ރޭގެ މުއްދަތަކަށް ބުކިން ހަދާއިރު، ދުރު ރާސްތާގެ ދަތުރުތަކުގައި މި މުއްދަތު މިއަށްވުރެ ދިގުވެއެވެ. އަދި ހަތަރު ތަރި އާއި ފަސް ތަރީގެ ހޮޓާތަކަށް އޮތް ޑިމާންޑް ވަރަށް ބޮޑަށް އިތުރުވެފައިވާއިރު، މިދިޔަ އަހަރުގެ މި މުއްދަތާ އަޅާބަލާއިރު ބުކިންތަކުގެ އެވްރެޖް އަގު ގާތްގަނޑަކަށް 16 އިންސައްތަ މައްޗަށް ގޮސްފައިވާ ކަމަށް އެ ކުންފުނިން ބުނެ އެވެ.