މުޅި ހުޅަނގު ޔޫރަޕަށް ގަދަ ހޫނު ފެތުރި، ފްރާންސް ގައި "ރެޑް ހީޓް އެލާޓް" ނެރެފި

ހުޅަނގު ޔޫރަޕަށް ކުރިމަތިވެފައިވާ ގަދަ ހޫނާއެކު ފްރާންސް، އިނގިރޭސިވިލާތް އަދި ސްޕެއިންގެ ފިނިހޫނުމިން މީގެ ކުރިން ރެކޯޑް ނުކުރާ މިންވަރަށް މައްޗަށް ގޮސްފިއެވެ. މިގޮތުން ފްރާންސްގެ ތާރީޚުގައި ވެސް އެންމެ ހޫނުގަދަ ދުވަސް މި ހީޓްވޭވް އާއެކު ރެކޯޑް ކުރެވިފައިވާއިރު، އިނގިރޭސިވިލާތުން ޖޫން މަހުގެ އެންމެ މަތީ ފިނިހޫނުމިން ވަނީ ރެކޯޑްކޮށްފައެވެ. އަދި ސްޕެއިންގައި 1950 ވަނަ އަހަރުގެ ފަހުން ދުވާލެއްގެ އެވްރެޖް ފިނިހޫނުމިން އެންމެ މައްޗަށް ދިޔައީ ވެސް މި ދުވަސްވަރުއެވެ.

މި ގަދަ ހޫނުގެ ސަބަބުން އެތައް މިލިއަން ބަޔަކަށް ދަތިތަކާ ކުރިމަތިވެފައިވާއިރު، ފްރާންސްގެ ވެރިރަށް ޕެރިހުގެ ފިނިހޫނުމިން ވަނީ 41 ޑިގްރީ ސެލްސިއަސްއަށް އަރާފައެވެ. މީގެ އިތުރުން ޔޫރަޕްގެ ބޮޑު ސަރަހައްދަކަށް ވަނީ ހޫނުގަދަވުމުގެ ސަބަބުން ނެރޭ އެންމެ މަތީ އެލާޓް ކަމަށްވާ "ރެޑް ހީޓް އެލާޓް" ނެރެފައެވެ.

ފްރާންސްގެ އެކި ސަރަހައްދުތަކުގެ ދުވާލާއި ރޭގަނޑުގެ ފިނިހޫނުމިން ބަލައިގެން ކަނޑައަޅާ ގައުމީ ފިނިހޫނުމިން ދައްކާ އިންޑިކޭޓަރު ބުދަ ދުވަހު ވަނީ 30 ޑިގްރީ ސެލްސިއަސްއަށް އަރާފައެވެ. މިއީ 1947 ވަނަ އަހަރު ފިނިހޫނުމިން ރެކޯޑްކުރަން ފެށި ފަހުން އެ ގައުމުގައި އެންމެ ހޫނުގަދަވި ދުވަހެވެ.

ފްރާންސްގެ ދެބައިކުޅަ އެއްބަޔަށް ވުރެ ބޮޑު ސަރަހައްދެއްގައި އަދިވެސް ރެޑް އެލާޓް ދަމަހައްޓާފައިވާއިރު، ގައުމުގެ ހުޅަނގު ސަރަހައްދުތަކުގެ އެތައް ހާސް ގެއަކުން ވަނީ ކަރަންޓުގެ ޚިދުމަތް މެދުކެނޑިފައެވެ. ދުނިޔެއަށް އަންނަ މޫސުމީ ބަދަލުތަކުގެ ސަބަބުން މުޅި ދުނިޔޭގެ ފިނިހޫނުމިން އަންނަނީ މަތިވަމުންނެވެ. ނަމަވެސް "ކޮޕަރނިކަސް ކްލައިމެޓް ސާވިސް" އިން ބުނާ ގޮތުގައި ޔޫރަޕަކީ ދުނިޔޭގެ އެހެން ބައްރުތަކަށް ވުރެ ދެގުނަ ހަލުވިމިނުގައި ހޫނުވަމުންދާ ބައްރެކެވެ.

މީގެ ސަބަބުން ހޫނު މޫސުމުގައި ކުރިމަތިވާ ހީޓްވޭވްތައް އިތުރުވެ، ޔޫރަޕްގެ ފެން ލިބޭ މިންވަރަށް ބުރޫއަރައި، ޖަންގަލިތަކުގައި ރޯވާ އަލިފާނުގެ ހާދިސާތައް ވަނީ ވަރުގަދަވެފައެވެ.

ފްރާންސްގެ މޫސުމާ ބެހޭ އިދާރާ "މެޓިއޯ-ފްރާންސް" އިން ބުނި ގޮތުގައި އެ ގައުމުގެ ހުޅަނގުގެ ބޮޑު ސަރަހައްދެއްގައި ފިނިހޫނުމިން ހުރީ 39 އާއި 43 ޑިގްރީ ސެލްސިއަސްއާ ދެމެދުގައެވެ. މިގޮތުން ޕޮއިޓޫ-ޗަރެންޓެސް-ވަލް ޑި ލޮއިރޭ ސަރަހައްދުގައި 43 ޑިގްރީ ސެލްސިއަސް ރެކޯޑް ކުރެވުނު އިރު، މިއީ އަންގާރަ ދުވަހު ޕިސޯސްއިން ރެކޯޑްކުރި 44.3 ޑިގްރީ ސެލްސިއަސްއަށް ވުރެ ކުޑަ ތަންކޮޅެއް ދަށް މިންވަރެކެވެ.

ހޫނުގަދަވުމުގެ ސަބަބުން ޕެރިހުގެ މަޝްހޫރު ދެ ބިނާ ކަމަށްވާ ލޫވް މިއުޒިއަމް އާއި އައިފަލް ޓަވަރު ވަނީ އާންމުކޮށް ބަންދުކުރާ ގަޑިއަށް ވުރެ ކުރިން ބަންދުކޮށްފައެވެ.

ލޫވް މިއުޒިއަމްގެ ތަރުޖަމާނަކު ވިދާޅުވި ގޮތުގައި އެ އިމާރާތަކީ މޫސުމީ ބަދަލުތަކާ އެކަށީގެންވާ ގޮތަށް ބިނާކޮށްފައިވާ ތަނެއް ނޫނެވެ.

ވޭތުވެދިޔަ ބުރާސްފަތި ދުވަހުން ފެށިގެން ފްރާންސްގައި ހޫނާ ގުޅުންހުރި އެކި ހާދިސާތަކުގައި މަދުވެގެން 40 މީހުން ވަނީ މަރުވެފައެވެ. މީގެ ތެރޭގައި ޖިރޮންޑޭގެ ބެގްލްސް ބީޗަށް މޫދަށް އެރި އުޅުނު ހަ އަހަރުގެ ކުއްޖަކު ވެސް ހިމެނެއެވެ.

މީގެ އިތުރުން، ހޫނުގަދަވުމުގެ ސަބަބުން ޖަންގަލިތަކުގައި އަލިފާން ރޯވުމުގެ ފުރުސަތު ބޮޑުކަމަށް ކަމާބެހޭ އިދާރާތަކުން ވަނީ އިންޒާރު ދީފައެވެ.

މެއިން-އެޓް-ލޮއިރޭ ސަރަހައްދުގެ ސެއިންޓް-މަކައިރް-ޑޫ-ބޮއިސްގައި އޮންނަ ބްރޭގްނަން ޖަންގަލީގައި ރޯވި ބޮޑު އަލިފާންގަނޑު ނިއްވުމަށް އަންގާރަ ދުވަހު 150 އަށް ވުރެ ގިނަ ފަޔަރ ފައިޓަރުން ހަރަކާތްތެރިވިއެވެ. އޮފިޝަލުން ވިދާޅުވި ގޮތުގައި އެ އަލިފާންގަނޑު ރޭގަނޑުގެ ވަގުތެއްގައި ވަނީ ކޮންޓްރޯލް ކުރެވިފައެވެ.

ފްރާންސްގެ ލޭބަރ މިނިސްޓަރު ޖީން-ޕިއެރޭ ފަރަންޑޫ ވިދާޅުވީ، ފްރާންސަކީ މިހާރު ހޫނު ގައުމަކަށް ބަދަލުވަމުންދާކަން ގަބޫލުކުރަން ޖެހޭ ކަމަށާއި، މުޖުތަމައުގެ އާދަކާދަތައް އެކަމަށް ހޭނެން ޖެހޭ ކަމަށެވެ.

މި ގަދަ ހޫނަށް ކުޑަވެސް ލުޔެއް ލިބޭނެ ކަމަށް ބެލެވެނީ އަންނަ ހުކުރު ދުވަހުން ފެށިގެންނެވެ. އެ ދުވަހުން ފެށިގެން ފިނިހޫނުމިން މަޑުމަޑުން ދަށްވާނެ ކަމަށް ލަފާކުރެވެއެވެ.

ބުދަ ދުވަހު މި ހޫނު ރާޅު ހުޅަނގު ޔޫރަޕްގެ އެހެން ސަރަހައްދުތަކަށް ފެތުރިފައިވާއިރު، އިނގިރޭސިވިލާތުގެ ބައެއް ސަރަހައްދުތަކަށް ވަނީ މަދުން ނޫނީ ނުނެރޭ ރެޑް ހީޓް އެލާޓް ނެރެފައެވެ.

އިނގިރޭސިވިލާތުގެ ހެމްޕްޝަޔަރގެ ގޮސްޕޯޓްގައި ބުދަ ދުވަހުގެ މެންދުރުފަހު ފިނިހޫނުމިން 36.1 ޑިގްރީ ސެލްސިއަސްއަށް އެރުމާއެކު، އެއީ އެ ގައުމުގައި ޖޫން މަހެއްގައި ރެކޯޑްކުރި އެންމެ ހޫނުގަދަ ދުވަހަށް ވަނީ ވެފައެވެ. މޫސުމާ ބެހޭ މާހިރުން ލަފާކުރާ ގޮތުގައި ބުރާސްފަތި ދުވަހު ފިނިހޫނުމިން 38 ޑިގްރީ ސެލްސިއަސްއަށް އެރުން އެކަށީގެންވެއެވެ.

ސްޕެއިންއަށް ވެސް ވޭތުވެދިޔަ މަދު ދުވަސްކޮޅު ވަނީ އާދަޔާ ޚިލާފަށް ހޫނުގަދަވެފައެވެ. އެ ގައުމުގެ މޫސުމާ ބެހޭ އިދާރާއިން ބުނި ގޮތުގައި ހޯމަ ދުވަހުގެ އެވްރެޖް ފިނިހޫނުމިން 28.08 ޑިގްރީގައި ހުރިއިރު، އަންގާރަ ދުވަހު އެވްރެޖް ފިނިހޫނުމިން ހުރީ 28.17 ޑިގްރީ ސެލްސިއަސްގައެވެ. މިއީ ޖޫން މަހެއްގައި އެ ގައުމުގައި ރެކޯޑްކުރި އެންމެ މަތީ އެވްރެޖް ފިނިހޫނުމިނެވެ.

ސްޕެއިންގެ މޫސުމާ ބެހޭ އިދާރާ "އޭމެޓް" އިން ބުނި ގޮތުގައި އެ ގައުމުގެ އުތުރުގެ ބައެއް ސަރަހައްދުތަކުގައި އަދިވެސް ރެޑް އެލާޓް ދަމަހައްޓާފައިވާއިރު، ބާސްކް ސަރަހައްދުގައި ފިނިހޫނުމިން 42 ޑިގްރީ ސެލްސިއަސްއަށް އެރުން އެކަށީގެންވެއެވެ.

އިޓަލީގެ އުތުރާއި މެދުތެރޭގެ ސަރަހައްދުތައް ހިމެނޭހެން ޖުމްލަ 16 ސަރަހައްދެއްގައި މިހާރު ވަނީ ރެޑް އެލާޓް ނެރެފައެވެ.

ޖަރުމަނުވިލާތް، ނެދަލޭންޑްސް އަދި ބެލްޖިއަމްގައި ފިނިހޫނުމިން އެންމެ މައްޗަށް ދާނެ ކަމަށް ބެލެވެނީ ހަފުތާ ބަންދާ ގާތްކޮށްފައެވެ.

ކުރިއަށް އޮތް މަދު ދުވަސްކޮޅެއްގެ ތެރޭގައި މި ހޫނު ރާޅު އިރުމަތީ ޔޫރަޕަށް ފެތުރޭނެ ކަމަށް ބެލެވޭއިރު، ޕޮލެންޑް، ކްރޮއޭޝިއާ އަދި ހަންގޭރީ ފަދަ ގައުމުތަކަށް ވަނީ ހަފުތާގެ ފަހުކޮޅަށް ގަދަ ހޫނުގެ އިންޒާރު ނެރެފައެވެ.

ޖަރުމަނުވިލާތުގައި ވެސް ގެނބިގެން މަރުވި ބައެއް ހާދިސާތައް ރިޕޯޓްކޮށްފައިވެއެވެ. އޭގެ ތެރޭގައި އަންގާރަ ދުވަހުގެ ހަވީރު ބަވޭރިއާގެ ރެގެންސްބާގް ކައިރިން ޑެނިއުބް ކޯރަށް އެރުނު 26 އަހަރުގެ ޒުވާނަކު މަރުވުން ހިމެނެއެވެ.

މީގެ އިތުރުން ބައެއް ސަރަހައްދުތަކަށް ފެނަށް ޖެހިދާނެ ކަމުގެ ބިރު ވެސް ވަނީ ހީވެފައެވެ. ޖަރުމަނުގެ "ޑީ ވެލްޓް" ނޫހުން ރިޕޯޓްކުރާ ގޮތުގައި ބްރޭންޑަންބާގް، ހެސޭ އަދި ނޯތު ރައިން-ވެސްޓްފޭލިއާގެ ކަމާބެހޭ އިދާރާތަކުން އަންނަނީ ފެން އިގްތިސާދު ކުރުމަށް އާންމުންނަށް އިލްތިމާސް ކުރަމުންނެވެ.

ލޯކަލް މީޑިއާތަކުން ރިޕޯޓްކުރާ ގޮތުގައި ސްޓަޓްގާޓް އަދި ފްރައިބާގް ފަދަ ސިޓީތަކުގައި ބޭރުގައި މަސް ފިހުން (ބާބަކިއު) ވެސް މިހާރު ވަނީ މަނާކޮށްފައެވެ.

ނެދަލޭންޑްސްގެ މޫސުމާ ބެހޭ އިދާރާ "ކޭ.އެން.އެމް.އައި" އިން ވަނީ ބުދަ ދުވަހުން ފެށިގެން މަދުވެގެން ހުކުރު ދުވަހާ ހަމައަށް އެ ގައުމުގެ ދެކުނާއި މެދުތެރޭގެ ސަރަހައްދުތަކަށް "ކޯޑް އޮރެންޖް" އެލާޓް ނެރެފައެވެ. މިއީ ނުރައްކާތެރި މޫސުމެއް ކުރިމަތިވެދާނެ ކަމަށް ބަލައި ނެރޭ އެލާޓެކެވެ.

އެ އިދާރާއިން ބުނި ގޮތުގައި ފިނިހޫނުމިން 37 ޑިގްރީ ސެލްސިއަސްއަށް އަރާނެ ކަމަށް ލަފާކުރެވޭއިރު، ހުކުރު ދުވަހު ފިނިހޫނުމިން 39 ޑިގްރީ ސެލްސިއަސްއަށް އެރުން އެކަށީގެންވެއެވެ.

ބެލްޖިއަމްގެ ބޮޑު ބަޔަކަށް ވެސް ވަނީ ހޫނުގެ ސަބަބުން އޮރެންޖް އެލަރޓް ނެރެފައެވެ.