ބުރުކީނާ ފާސޯއިން ފަރަންސޭސިވިލާތާ ގުޅުން ކަނޑާލައިފި
މި ނިންމުމަކީ ގައުމުގެ ސިޔާދަތު ރައްކާތެރިކުރުމަށް އެޅި ފިޔަވަޅެއް ކަމަށް ބުރުކީނާ ފާސޯއިން ބުނާއިރު، ފަރަންސޭސިވިލާތުން ވަނީ އެ ތުހުމަތުތައް ދޮގުކޮށް އެއީ އެއްވެސް އަސާސެއް ނެތް ނިންމުމެއް ކަމަށް ބުނެފައި. 2022 ވަނަ އަހަރު ބުރުކީނާ ފާސޯގެ ވެރިކަމަށް އަސްކަރިއްޔާއިން އަތްގަދަކުރި ފަހުން ދެ ގައުމުގެ ގުޅުން ވަރަށް ބޮޑަށް ގޯސްވެ، އެ ގައުމުގައި ތިބި ފަރަންސޭސި ސިފައިން ވެސް ވަނީ މީގެ ކުރިން ބޭރުކޮށްފައި.
ބުރުކީނާ ފާސޯގެ ރައީސް ރޮކް މާކް ކްރިސްޓިއަން ކަބޯރޭ (ކަނާތްފަރާތުގައި) އަދި ފަރަންސޭސިވިލާތުގެ ރައީސް އެމަނުއަލް މެކްރޮން، 2017 ވަނަ އަހަރުގެ ނޮވެމްބަރު މަހުގެ 28 ވަނަ ދުވަހު ބުރުކީނާ ފާސޯގެ ރިޔާސީ ގަނޑުވަރުގައި ބޭއްވި ނޫސްވެރިންގެ ބައްދަލުވުމެއްގެ ތެރެއިން. | ގެޓީ އިމޭޖަސް
ފަރަންސޭސިވިލާތުން ބުރުކީނާ ފާސޯގެ ދާޚިލީ ކަންކަމުގެ ތެރެއަށް އަތްބާނާ ކަމަށް ތުހުމަތުކޮށް، އެ ގައުމާއެކު އޮތް ޚާރިޖީ ގުޅުން ބުރުކީނާ ފާސޯއިން ކަނޑާލައިފި އެވެ.
މިއީ ފަރަންސޭސިވިލާތުގެ އިސްތިއުމާރީ ބާރުގެ ދަށުގައި ކުރިން އޮތް ހުޅަނގު އެފްރިކާގެ ގައުމުތަކުގެ ތެރެއިން، ގުޅުން ގޯސްވުމުގެ ސަބަބުން ފަރަންސޭސިވިލާތާ ދުރަށްޖެހުނު އެންމެ ފަހުގެ ގައުމެވެ.
މި ނިންމުން އިއުލާނުކޮށްފައިވަނީ ބުރުކީނާ ފާސޯގެ ކޮމިއުނިކޭޝަން މިނިސްޓަރު ގިލްބާޓް އޮއެޑްރައޯގޯ ހުކުރު ދުވަހު ނެރުއްވި ބަޔާނެއްގަ އެވެ. އެ ގައުމުގެ ރަސްމީ އިންފޮމޭޝަން ސާވިސްއިން އާންމުކުރި މި ބަޔާނުގައި ބުނެފައިވަނީ، ފަރަންސޭސިވިލާތާއެކު އޮތް ގުޅުން ކަނޑާލުމުގެ ނިންމުމަށް ޖޫން މަހުގެ 26 ވަނަ ދުވަހުން ފެށިގެން އަމަލުކުރަން ފަށާފައިވާ ކަމަށެވެ.
ބުރުކީނާ ފާސޯގެ ވެރިރަށް އުއަގަޑޫގޫއިން ފަރަންސޭސިވިލާތަށް ތުހުމަތުކޮށްފައިވަނީ، އެ ގައުމުން އަދިވެސް އިސްތިއުމާރީ ނުފޫޒު ފަތުރަން މަސައްކަތްކުރާ ކަމަށާއި، ބުރުކީނާ ފާސޯގެ ދާޚިލީ ކަންކަމުގެ ތެރެއަށް އަތްބާނައި، ގައުމުގެ ހަމަޖެހުން ނަގާލަން މަސައްކަތްކުރާ ނެޓްވޯކްތަކާއި "ޓެރަރިސްޓުންނަށް" އެހީތެރިކަން ފޯރުކޮށްދޭ ކަމަށެވެ.
ބުރުކީނާ ފާސޯގެ ސަރުކާރުގެ ބަޔާނުގައި ބުނެފައިވަނީ، އެ ގައުމުގެ މައްޗަށް ގަދަވެގަނެ ރައްޔިތުން އަޅުވެތިކުރުމަށް ގެންގުޅޭ މިފަދަ ސިޔާސަތުތަކާ ކުރިމަތިލުމުގައި، އެ ގައުމުން އިޚްތިޔާރުކުރީ ޒިންމާދާރުކަމާއެކު ގައުމުގެ މިނިވަންކަމާއި ސިޔާދަތު ރައްކާތެރިކުރުން ކަމަށެވެ. ނަމަވެސް، އެފްރިކާގެ ސާހެލް ސަރަހައްދުގައި ހަރަކާތްތެރިވާ ޓެރަރިސްޓުންނަށް އެހީތެރިވާ ކަމަށް ކުރެވޭ ތުހުމަތުތައް ފަރަންސޭސިވިލާތުން މީގެ ކުރިން ވަނީ ދޮގުކޮށްފަ އެވެ.
މި ބަޔާނުގައި އިތުރަށް ބުނެފައިވަނީ، މި ނިންމުމަކީ ހަމައެކަނި ދެ ގައުމުގެ ދެމެދުގައި އޮތް ސިޔާސީ ނުވަތަ ޚާރިޖީ ގުޅުމަށް އައި ބަދަލެއް ކަމަށެވެ. އަދި ބުރުކީނާ ފާސޯގެ ރައްޔިތުންނާއި ފަރަންސޭސި ރައްޔިތުންގެ މެދުގައި އޮތް ތާރީޚީ، ސަގާފީ އަދި އިޖުތިމާއީ ގުޅުންތަކަށް މީގެ ސަބަބުން އެއްވެސް އަސަރެއް ނުކުރާނެ ކަމަށްވެސް ބަޔާނުގައިވެ އެވެ.
އޭއެފްޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، ފަރަންސޭސިވިލާތުން ވަނީ ބުރުކީނާ ފާސޯގެ މި ނިންމުން ކުށްވެރިކޮށްފަ އެވެ. ފަރަންސޭސިވިލާތުން ބުނެފައިވަނީ މިއީ އެއްވެސް އަސާސެއް ނެތް، އަދި ދެކޮޅުވެރިކަން އިސްކޮށް ނިންމާފައިވާ ނިންމުމެއް ކަމަށާއި، މީގެއިން ހާމަވަނީ ބުރުކީނާ ފާސޯގެ ކަމާބެހޭ ފަރާތްތަކުގެ އަމަލުތައް ކަންބޮޑުވާ މިންވަރަށް ބަދަލުވަމުންދާ ކަމެވެ.
ބުރުކީނާ ފާސޯއާއި ފަރަންސޭސިވިލާތުގެ ޚާރިޖީ ގުޅުން ގޯސްވާން ފެށީ 2022 ވަނަ އަހަރު ބުރުކީނާ ފާސޯގެ އަސްކަރިއްޔާއިން އެ ގައުމުގެ ވެރިކަމަށް އަތްގަދަކުރި ހިސާބުންނެވެ. ވެރިކަމާ އަލަށް ހަވާލުވި ފަރާތްތަކުން ވަނީ ފަރަންސޭސިވިލާތާއެކު އޮތް އަސްކަރީ އެއްބަސްވުންތައް އުވާލައި، އޭގެ ޖެހިގެން އައި އަހަރު ފަރަންސޭސި ސިފައިން އެ ގައުމުން ބޭރުކޮށްފަ އެވެ.
ފަރަންސޭސިވިލާތުގެ އަސްކަރިއްޔާއަށް ނާކާމިޔާބީއާ ކުރިމަތިލާންޖެހުމާއި، އެ ގައުމުތަކުގެ ދާޚިލީ ކަންކަމަށް ފަރަންސޭސިވިލާތުން އަތްބާނާ ކަމަށް ކުރެވޭ ތުހުމަތުތަކާއެކު، ކުރިން ފަރަންސޭސިވިލާތުގެ ދަށުގައި އޮތް އެތައް ގައުމަކުން މިހާރު ވަނީ ފަރަންސޭސިވިލާތާ އޮތް ގުޅުން ކަނޑާލާފަ އެވެ. ބުރުކީނާ ފާސޯގެ އިތުރުން މާލީ އަދި ނައިޖަރުން ވެސް ވަނީ ފަރަންސޭސި ސިފައިން އެ ގައުމުތަކުން ބޭރުކޮށް، އެ ސަރަހައްދުގައި ހަރަކާތްތެރިވާ ހަނގުރާމަވެރި ޖަމާއަތްތަކަށް ފަރަންސޭސިވިލާތުން ވާގިވެރިވާ ކަމަށް ތުހުމަތުކޮށްފަ އެވެ.
މި ހުރިހާ ތުހުމަތުތަކެއް ފަރަންސޭސިވިލާތުން ދޮގުކުރާއިރު، އެ ގައުމުން ބުނަމުންދަނީ ހުޅަނގު އެފްރިކާގެ އެ ތިން ގައުމުގައި އޮތް އަސްކަރީ ސަރުކާރުތަކަކީ ސައްހަ ސަރުކާރުތަކެއް ކަމަށް ގަބޫލުނުކުރާ ކަމަށެވެ. އަދި އެ ގައުމުތަކުގައި އަލުން މަދަނީ ވެރިކަމެއް ގާއިމުކުރުމަށް ކުރެވޭ މަސައްކަތްތަކަށް އެހީތެރިވަމުންދާ ކަމަށްވެސް ފަރަންސޭސިވިލާތުން ބުނެ އެވެ.
