ޕެރިހުގެ އައިފެލް ޓަވަރަށް ހޮނު އަޅައިފި

ފަރަންސޭސިވިލާތުގެ ވެރިރަށް ޕެރިހަށް ކުރިމަތިވި ގަދަ ގުގުރުމާއެކު ވިއްސާރައިގެ ތެރޭގައި، އެ ސިޓީގެ މަޝްހޫރު އައިފެލް ޓަވަރަށް ހޮނު އަޅައިފި އެވެ. އައިފެލް ޓަވަރަށް ހޮނު އަޅާފައިވަނީ ހޮނިހިރު ދުވަހުގެ އިރުއޮއްސުނު ވަގުތުގަ އެވެ. ޔޫރަޕްގެ އެހެން ގައުމުތަކެކޭ އެއްފަދައިން ޕެރިހަށް ވެސް ފާއިތުވި ދުވަސްތަކުގައި ވަނީ އާދަޔާ ހިލާފަށް ހޫނުގަދަވެ، "ހީޓް ވޭވް" ގެ އަސަރު ވަރަށް ބޮޑަށް ކޮށްފަ އެވެ.

ފަރަންސޭސިވިލާތުގެ ޕަބްލިކް ހެލްތު އެޖެންސީން އާދިއްތަ ދުވަހު ބުނި ގޮތުގައި، ރެކޯޑް މިންވަރަކަށް ހޫނުގަދަވި މިދިޔަ ހަފުތާގައި އެ ގައުމުގައި މަރުވި މީހުންގެ އަދަދު ވަނީ ވަރަށް ބޮޑަށް އިތުރުވެފަ އެވެ. އެގޮތުން ފަރަންސޭސިވިލާތުގެ ތާރީޚުގައި ވެސް އެންމެ ހޫނުގަދަވި ދުވަސް ކަމަށްވާ މިދިޔަ ބުދަ ދުވަހު އެކަނިވެސް 1،200 އަށްވުރެ ގިނަ މީހުން މަރުވެފައިވާ ކަމަށް އެ އެޖެންސީން މައުލޫމާތުދެ އެވެ. އަދި އޭގެ ފަހުން އައި ދެ ދުވަހުގެ ތެރެއިން ކޮންމެ ދުވަހަކު މަރުވި މީހުންގެ އަދަދު 1،400 އަށްވުރެ މައްޗަށް ގޮސްފައިވާ ކަމަށް ވެސް ޕަބްލިކް ހެލްތު ފްރާންސްއިން ބުނެ އެވެ.