ކުރިން ބޮޑު ކުރި ދުންފަތުގެ ޑިއުޓީ ކުޑަކުރަން މުޅި މަޖިލީހުގެ ކޮމިޓީން ފާސްކޮށްފި

ދުންފަތުގެ ބާވަތްތަކުން ނަގާ އިމްޕޯޓް ޑިއުޓީ ކުޑަކުރުމަށް ހުށަހަޅާފައިވާ އިސްލާހު, އެއްވެސް ބަދަލެއް ނުގެނެސް ސަރުކާރުން ހުށަހެޅި ގޮތަށް ފާސްކުރުމަށް މުޅި މަޖިލީހުގެ ކޮމިޓީން ރުހުން ދީފި އެވެ.

ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް ހުށަހަޅާފައިވާ މި އިސްލާހަށް ބަހުސް ކުރުމަށްފަހު، ސިނގިރޭޓާއި ބިޑީގެ އިތުރުން ހީޓަޑް ޓޮބެކޯ ޕްރޮޑަކްޓްތަކުން ނަގާ ޑިއުޓީ ކުޑަކުރުމަށް ރައްޔިތުންގެ މަޖިލީހުގެ މުޅި މަޖިލީހުގެ ކޮމިޓީން ހޯމަ ދުވަހު ވަނީ ފާސްކޮށްފަ އެވެ. މި ބިލުގައި ހުށަހަޅާފައިވަނީ ކޮންމެ ސިނގިރޭޓަކުންނާއި ބިޑި އަކުން ނަގާ 8 ރުފިޔާގެ ޑިއުޓީ 4 ރުފިޔާއަށް ކުޑަކުރުމަށާއި، އެޑްވެލޮރަމް ޓެކްސް 100 އިންސައްތައިން 30 އިންސައްތައަށް ދަށްކުރުމަށެވެ.

މި ބިލު މަޖިލީހަށް ހުށަހަޅާފައިވަނީ ޖޫން މަހުގެ 22 ވަނަ ދުވަހު އެވެ. އަދި ޖޫން 24 ގައި ދިރާސާކުރުމަށް މުޅި މަޖިލީހުގެ ކޮމިޓީއަށް ފޮނުވުމަށްފަހު، ހޯމަ ދުވަހު ބޭއްވި ކޮމިޓީ ބައްދަލުވުމުގައި ބައިވެރިވެވަޑައިގެންނެވި 69 މެންބަރުންގެ އިއްތިފާގުން މި ބިލު ވަނީ ފާސްކޮށްފަ އެވެ. 

ބިލް ބަލައިގަންނަން މިދިޔަ ބުދަ ދުވަހު ފާސްކުރީ އެކަމަށް ނެގި ވޯޓުގައި ބައިވެރިވެވަޑައިގެންނެވި 49 މެންބަަރުންގެ އިއްތިފާގުންނެވެ.

ދުންފަތުގެ ޑިއުޓީ ކުޑަކުރުމަށް މި ހުށަހެޅީ، ރައީސް ޑރ. މުޙައްމަދު މުޢިއްޒުގެ ސަރުކާރުން ދުންފަތުގެ ޓެކްސް ވަރަށް ބޮޑަށް މަތިކުރިތާ ދެ އަހަރުވެސް ނުވަނީހެވެ. 2024 ވަނަ އަހަރު ކޮންމެ ސިނގިރޭޓަކުންނާއި ބިޑި އަކުން ނަގާ ޑިއުޓީ 3 ރުފިޔާ އިން 8 ރުފިޔާ އަށް ބޮޑުކޮށް، އެޑްވެލޮރަމް ޓެކްސް 50 އިންސައްތައިން 100 އިންސައްތައަށް ވަނީ މަތިކޮށްފަ އެވެ.

ޓެކްސް ބޮޑުކުރުމުގެ އިތުރުން ވޭޕާއި އީ-ސިނގިރޭޓް މަނާކުރުމާއި، 2007 ވަނަ އަހަރުގެ ފަހުން އުފަންވާ މީހުންނަށް ދުންފަތުގެ ބާވަތްތައް ވިއްކުން ސަރުކާރުގެ ސިޔާސަތުގެ ތެރެއިން މަނާކުރުން ހިމެނެ އެވެ. މި ސިޔާސަތުތަކާ އެކު ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ރައީސް މުޢިއްޒަށް "ވޯލްޑް ނޯ ޓޮބެކޯ ޑޭ ސްޕެޝަލް ރިކޮގްނިޝަން އެވޯޑް" ދީފައިވާއިރު، ގްލޯބަލް ސެންޓަރ ފޯ ގުޑް ގަވަރނަންސް އިން ޓޮބެކޯ ކޮންޓްރޯލްގެ ފަރާތުން ރާއްޖެއަށް ވަނީ "އިންޓެގްރިޓީ އެވޯޑް" ދީފަ އެވެ.

އަނެއްކޮޅުން، ޑިއުޓީ ބޮޑުކުރުމާއި ވޭޕް މަނާކުރުމާ ގުޅިގެން، ދުންފަތުގެ ބާވަތްތައް ވަގަށް އެތެރެކުރުން އިތުރުވެ، ވޭޕާއި އަގުހެޔޮ ސިނގިރޭޓް ބްރޭންޑްތަކުގެ ކަޅު ބާޒާރެއް އުފެދިފައިވާ ކަމުގެ ކަންބޮޑުވުންތައް ވަނީ ފެންމަތިވެފަ އެވެ. މީގެ އިތުރުން، އިމްޕޯޓް ޑިއުޓީން ލިބޭ އާމްދަނީ ދަށްވުމާއި، މި ފިޔަވަޅުތަކުގެ ސަބަބުން އަމަލީ ގޮތުން ނުކުންނަ ނަތީޖާއާ މެދު ސަރުކާރަށް ވަނީ ސުވާލުތައް އަމާޒުވެފަ އެވެ.

ހޯމަ ދުވަހު ބޭއްވި ކޮމިޓީ ބައްދަލުވުމުގައި، އިދިކޮޅު އެމްޑީޕީގެ މެންބަރުން ވަނީ ބިލު ފާސްކުރުމުގެ ކުރިން ދައުލަތުގެ ކަމާބެހޭ މުއައްސަސާތައް ހާޒިރުކޮށް، ދައުލަތުގެ ބަޖެޓަށް މީގެ ސަބަބުން ކުރާނެ އަސަރުތައް ދިރާސާކުރުމަށް ހުށަހަޅުއްވާފަ އެވެ. އަދި ބައެއް އިސްލާހުތައް ގެންނަން ޖެހޭ ކަމަށް އިދިކޮޅު މެމްބަރުން ވިދާޅުވަމުން ގެންދެވި އެވެ. ނަމަވެސް ހުށަހެޅުމެއްގެ ގޮތުގައި އެއިން އެއްވެސް ކަމެއް ހުށަނާޅާ ކަމަށް ރިޔާސަތުން ވިދާޅުވެ ބިލު ފާސްކުރީ ސަރުކާރުގެ ފަރާތުން ހުށަހެޅި ގޮތަށެވެ.

ސަރުކާރުން ބުނަނީ މި ދުންފަތުން ނަގާ ޑިއުޓީ ކުޑަކުރަނީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ލަފާގެ މަތިން ކަމަށެވެ.