ސަރުކާރުގެ އިސް ތަރުޖަމާނު ދައްކާ ވާހަކަ އާ ސަރުކާރުގެ މިނިސްޓަރުން ދައްކާ ވާހަކަ ދިމާނުވެ ބޮޑު އޮޅުންބޮޅުން ގަނޑެއްގެ ތެރެއަށް ޙާޖީ ޢިމާދުއްދީންގެ އުސްގެކޮޅު ވައްދައިފި

ސަލްޓަން ޕާކުގައި ހުންނަ "އުސްގެކޮޅު" އަކީ މަސްތުވާތަކެއްޗަށް ބޭނުން ކުރާ ތަނެއް ކަމަށާއި އިންޓަރެކްޓިވް މިއުޒިއަމެއް ހަދަން ސިޓީ ކައުންސިލުން އެތަން ސަރުކާރާ ހަވާލު ނުކުރާ ކަމަށް އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވި އިރު މިނިސްޓަރުން ގެ ވާހަކަފުޅުން އެތަނުގައި އެ ވިދާޅުވާ މަޝްރޫއު ކުރިއަށްދާކަން ހާމަވެ ބޮޑު އޮޅުންބޮޅުންގަނޑަކަށް މިކަން ވެއްޖެ އެވެ.

ސަރުކާރުގެ އިސްތަރުޖަމާނު މިމޭރުމުން ވާހަކަ ދެއްކެވީ، ޕްރެސަރ ވިތް ދަ ސްޕޮކްސް"ގައި ހޮނިހިރު ދުވަހު ނޫސްވެރިންނާ ބައްދަލު ކުރައްވަމުންނެވެ.

އުސްގެކޮޅަކީ ރާއްޖޭގެ ވިރާސީ ރަސްކަމުގެ ވަރަށް މުހިންމު ބިނާއެއްކަމަށާއި އަދި އެތަނަކީ މިހާރު ރާއްޖޭގެ ތާރީޚުގެ ވަރަށް މުހިންމު އިމާރާތެއްކަން ފާހަގަ ކުރައްވާ، އިސް ތަރުޖަމާނުގެ ވާހަކަފުޅުގައި އެ އިމާރާތް މާލޭ ސިޓީ ކައުންސިލަށް ނުބެލެހެއްޓޭކަން ދެއްކެވުމުގެ މޭރުމުން ވަނީ ވާހަކަދައްކަވާފަ އެވެ.

ސަރުކާރުން އުސް ގެކޮޅުގައި އިންޓަރެކްޓިވް މިއުޒިއަމްއެއް ތަރައްޤީކުރުމަށް ނިންމާފައިވާ ކަމަށާއި  މި މަޝްރޫޢުއަށް، އެތަން ހޯދަން ސިޓީ ކައުންސިލަށް ހުށައަޅާފައިވީ ނަމަވެސް މިކަމަށް އެކަށީގެންވާ އިޖާބައެއް ދީފައިނުވާކަމަށް މުންދު ވިދާޅުވި އެވެ. 

"އުސްގެކޮޅު ބަލަހައްޓާނީ ސިޓީ ކައުންސިލުން. ތަޅުދަނޑި އޮންނަނީ ކައުންސިލްގައި،" މުންދު ވިދާޅުވި އެވެ.

މުންދު ވިދާޅުވީ އެ ބިނާ ސަރުކާރަށް ނެގުމުގެ މަޝްވަރާ މާލޭ ސިޓީ ކައުންސިލާ އެކު އެކި ގޮތްގޮތައް ކުރެވިފައިވާ ކަމަށާއި، އެކަމަށް ކައުންސިލުން އާނ ބަސް ވެސް ބުނެފައިވާ ކަމަށެވެ. އެހެން ނަމަވެސް މިހާތަނަށް އެތަން ސަރުކާރަށް ހަވާލު ކޮށްފައި ނުވާކަމަށް މުންދު ވިދާޅުވި އެވެ.

 އައްސުލްޠާނު މުޙައްމަދު ޢިމާދުއްދީން މިޞުރުގެ އަންހެން ބޭފުޅަކާ ކައިވެނިބައްލާވައިގެންފައި އެބޭފުޅާ މާލެ ގެންނަވާފައި ބައިންދަވަންވެގެން ދައުލަތުގެ ޚަރަދުގައި "ބޮޑުގަނޑުވަރު" ތެރޭ އިމާރާތް ކުރެއްވި ކަމަށް ތާރީޚް ދިރާސާ ކުރާ ފަރާތްތަކުން ބުނާ، ގަރުނަކަށް ވުރެ ގިނަ ދުވަސްވެފައިވާ އެ އިމާރާތް ސަރުކާރުގެ ބެލުމުގެ ދަށަށް ނުގެނެވި، އެތަނުގައި އިންޓަރެކްޓިވް މިއުޒިއަމެއް ނުހެދިގެން އުޅޭ ވާހަކަ މުންދު ވިދާޅުވި އިރު،  ސަލްޓަން ޕާކުގައިހުރި އުސްގެކޮޅު ކުޑަކުދިންނަށް ޘަޤާފަތް ދަސްކޮށްދޭ ތަނަކަށް ހަދަން ޑރ. މުހައްމަދު މުއިއްޒުގެ ހައުސިންގ މިނިސްޓަރ ކަމުގައި 2016 ވަނަ އަހަރުގެ އޮގަސްޓް މަހުގެ 4 ވަނަ ދުވަހު ހައުސިންގ މިނިސްޓްރީގައި ބޭއްވި ރަސްމިއްޔާތެއްގައި، އާކް ކިޔާ ކުންފުންޏަކާ އޮތީ ހަވާލު ކޮށްފަ އެވެ.

އެ ރަސްމިއްޔާތުގައި އޭރުގެ ހައުސިންގ މިނިސްޓަރ ޑރ. މުއިއްޒު ވިދާޅުވީ، އިމާރާތުގެ މަސައްކަތްތައް ކުރާނީ ސަރުކާރުން ކަމަށާއި އެތަނުގައި ޘަޤާފަތް ދައްކައިދޭ މަރުކަޒު ޤާއިމުކުރުމުގެ ކަންކަން ކުރާނީ އާކުން ކަމަށެވެ. އަދި 2016 ވަނަ އަހަރުގެ ނިޔަލަށް މަސައްކަތް ނިމޭނެ ކަމަށް ވެސް އެ ރަސްމިއްޔާތުގައި މުއިއްޒު ވިދާޅުވި އެވެ.

އާކް އާ އުސްގެކޮޅު މަޝްރޫއު ހަވާލު ކުރި އިރު ޑރ، މުއިއްޒު އިތުރަށް ވިދާޅުވީ، އިމާރާތުގެ މަސައްކަތްތައް ނިންމާއިރު ޘަޤާފީ މައުރަޒުތައް ބާއްވާނެ ހޯލެއް ހެދުމަށްވެސް ވަނީ ހަމަޖެހިފައި ކަމަށާއި އަދި ރެފްރެޝްމަންޓް ލިބޭނެ ތަނެއްވެސް ހުންނާނެ ކަމަށެވެ.

އެ މަޝްރޫއަށް ވީ ގޮތެއް ނޭނގި އޮއްވާ، މުއިއްޒުގެ ވަޒީރުކަމުގެ ދުވަސްތައް ނިމި ރައީސުލްޖުމްހުރިއްޔާ ކަމަށް ވަޑައިގަތުމަށް ފަހު އަނެއްކާވެސް އުސްގެކޮޅުގެ ވާހަކަ ފެންމަތިވި އެވެ. ސަގާފަތާ ތަރިކަ އާލާކުރުމަށް ރައީސް މުއިއްޒު އުފެއްދެވި މިނިސްޓްރީގެ މިނިސްޓަރ، 18 ސެޕްޓެމްބަރު 2025 ވަނަ ދުވަހުގެ ރޭ ބޭއްވި ރަސްމިއްޔާތެއްގައި އުސްގެކޮޅު އިމަރސިވް މިއުޒިއަމެއް ގޮތުގައި ތަރައްޤީކުރުމުގެ މަޝްރޫޢު ކުރިޔަށް ގެންދިޔުމަށް ފަހި ދިރިއުޅުން ކޯޕަރޭޝަން ލިމިޓެޑާ އެކު ފަހުމުނާމާއެއްގައި ސޮއިކުރެއްވި އެވެ.

މިކަންކަން މިހެން ފެންނަން އޮތުމުގެ އިތުރުން، އެފްޑީސީ އާ ހަވާލު ކޮށްގެން އުސްގެކޮޅާއި އުސްގެކޮޅު ސަރަހައްދު އިންޓަރެކްޓިވް މިއުޒިއަމް އެއް ހެދުމުގެ އަމަލީ މަސައްކަތް ފެށިފައިވާ ކަމަށް ރައީސް އޮފީހުގައި ބޭއްވި ނޫސް ކޮންފަރެއްސެއްގައި، ތަރިކަ އާއި ސަގާފީ ކަންކަން ބެލެހެއްޓެވުމަށް ރައީސް މުއިއްޒު އައްޔަނު ކުރެއްވި ދެވަނަ މިނިސްޓަރ ހީނާ ވަލީދު ވެސް ވަނީ ވިދާޅުވެފަ އެވެ.

މީގެ އިތުރުން، 2026 ވަނަ އަހަރުގެ ރިޔާސީ ބަޔާނުގައި ރައީސް މުއިއްޒު ވަނީ އުސްގެކޮޅު އިމާސިވް މިއުޒަމަކަށް ބަދަލުކޮށް މިއަހަރުގެ ތެރޭގައި ހުޅުވާނެ ކަމަށް ވިދާޅުވެފަ އެވެ.

ހޮނިހިރު ދުވަހު ނޫސްވެރިންނަށް މުއިއްޒު ސަރުކާރުގެ އިސް ތަރުޖަމާނު ވިދާޅުވީ، އެ މަޝްރޫއު ހިންގަން އުސްގެކޮޅު ހޯދަން ކުރި މަސައްކަތް މިހާތަނަށް ކާމިޔާބުވެފައި ނުވާ ކަމަށެވެ.