ސްޓާމާ ހުރީ ފެއިލް ވެފައި، އޭނާ އިސްތިއުފާ ދެއްވާނެ: ޓްރަމްޕް

އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ހުންނެވީ ފެއިލް ވެފައި ކަމަށާއި، އޭނާ މަގާމުން އިސްތިއުފާ ދެއްވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ އޭނާގެ ޓްރުތު ސޯޝަލް މީޑިއާގައި ކުރެއްވި ޕޯސްޓެއްގައި އެވެ. އެގޮތުން އެ ޕޯސްޓުގައި ޓްރަމްޕް ވިދާޅުވެފައި ވަނީ ވަރަށް މުހިންމު ދެ ދާއިރާއެއްގައި ސްޓާމާ ފެއިލްވެފައިވާ ކަމަށެވެ. އެއީ އިމިގްރޭޝަންގެ މައްސަލަ އާއި، އެނާޖީގެ ދާއިރާ ކަމަށް ވެސް ޓްރަމްޕް ވަނީ ވިދާޅުވެފައި އެވެ. 

ސްޓާމާގެ ސަރުކާރުގެ އިމިގްރޭޝަންގެ ސިޔާސަތު ތަކާއި، އެނާޖީގެ ސިޔާސަތުތަކާ ގުޅިގެން އެތައް ފާޑު ކިޔުން ތަކެއް މީގެ ކުރިން ވެސް އަމާޒުވެފައިވެ އެވެ. އަދި މި ދާއިރާ ތަކުގައި ސަރުކާރުން ކުރަމުން އަންނަ މަސައްކަތްތަކާ މެދު ރައްޔިތުންގެ ތެރޭގައި ވެސް ކަންބޮޑުވުން އިންތިހާ އަށް އޮވެ އެވެ. 

ޚާއްސަކޮށް އިމިގްރޭޝަންގެ މައްސަލަ އަކީ އިނގިރޭސިވިލާތުގައި މިހާރު ވެސް ވަރަށް ބޮޑު މައްސަލަ އެކެވެ. ޤާނޫނާ ޚިލާފަށް އިނގިރޭސިވިލާތަށް ވަންނަ މީހުންގެ އަދަދު އިތުރު ވަމުންދާތީ، މި މައްސަލަ އަށް ޙައްލެއް ހޯދުމަށް ސަރުކާރުން ކުރަމުން އަންނަ މަސައްކަތަށް ވެސް އިންތިހާ އަށް ފާޑު ކިޔުން އަމާޒުވެފައިވެ އެވެ. 

ސްޓާމާ މަގާމުން އިސްތިއުފާ ދެއްވާނެ ކަމަށް ޓްރަމްޕް ވިދާޅުވެފައިވާއިރު، އިނގިރޭސިވިލާތުގެ މީޑިއާ ތަކުގައި އެ ވާހަކަ ރިޕޯޓު ކޮށްފައިވެ އެވެ. އެގޮތުން ހޯމަ ދުވަހުގެ ވަގުތެއްގައި ސްޓާމާ އިސްތިއުފާ އިއުލާން ކުރައްވާނެ ކަމަށާއި، އެއަށް ފަހު ދެން އަމަލު ކުރާނެ ގޮތުގެ ޓައިމްލައިނެއް ވެސް ކަނޑަ އަޅުއްވާނެ ކަމަށް ރިޕޯޓު ތަކުގައި ވަނީ ބުނެފައި އެވެ.

2024 ވަނަ އަހަރު ސްޓާމާ ބޮޑު ވަޒީރުގެ މަގާމަށް ވަޑައިގެންނެވުމަށް ފަހު، ޓްރަމްޕްގެ ރިޔާސީ ދެ ވަނަ ދައުރު ފެށުމާ އެކު އެމެރިކާއާ ގާތް ގުޅުމެއް ބާއްވަން މަސައްކަތް ކުރި އެވެ. ނަމަވެސް، ބައެއް މައްސަލަ ތަކުގައި ޚިޔާލު ތަފާތުވެ ޓްރަމްޕް އާއި ސްޓާމާގެ ގުޅުން ގޯސްވެފައިވެ އެވެ. އަދި ޓްރަމްޕް ވަނީ އެކި ފަހަރު މަތިން ސްޓާމާ އަށް ފާޑު ވިދާޅުވެފައި އެވެ.