ސުލްޙައިގެ މަޝްވަރާތައް ނާކާމިޔާބު ވެއްޖެ ނަމަ، ހޮރްމޫޒް އިން ފީ ނަގާނަން: ޓްރަމްޕް

އީރާން އާއެކު ވެފައިވާ 60 ދުވަހުގެ ވަގުތީ އެއްބަސްވުމުގެ މުއްދަތާއި، އެ މުއްދަތު ހަމަވުމަށް ފަހު ވެސް ހޮރްމޫޒް ކަނޑު އޮޅިން ދަތުރު ކުރާ އުޅަނދު ފަހަރު ތަކުން އެއްވެސް ފީއެއް ނުނަގާނެ ކަމަށާއި، ނަމަވެސް ސުލްޙައިގެ މަޝްވަރާތައް ނާކާމިޔާބު ވެއްޖެ ނަމަ އެމެރިކާގެ ފަރާތުން އެފަދަ ފީއެއް ނަގާނެ ކަމަށް އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ހޮނިހިރު ދުވަހު ޓްރޫތު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވީ، ކުރިއަށް އޮތް 60 ދުވަހުގެ ސުލްހައިގެ މުއްދަތުގައި ވެސް އަދި އެއަށް ފަހު ވެސް ހޯރްމޫޒް ކަނޑު އޮޅިން އެއްވެސް ފީއެއް ނުނަގާނެ ކަމަށެވެ.

އެހެން ނަމަވެސް، ސުލްހައިގެ އެއްބަސްވުން ފުރިހަމަ ނުކުރެވިއްޖެ ހާލަތެއްގައި، މެދު އިރުމަތީގެ ގައުމު ތަކުގެ ހިމާޔަތުގައި "ގާޑިއަން އެންޖެލް" އެއްގެ ގޮތުން އެމެރިކާ އިން ކޮށްފައިވާ އަދި ކުރަމުންދާ ހޭދަ ތަކުގެ ބަދަލު ހޯދުމަށް، އެމެރިކާގެ ފަރާތުން ފީއެއް ކަނޑަ އެޅުމަކީ އެކަށީގެންވާ ކަމެއް ކަމަށް ޓްރަމްޕް ވިދާޅުވި އެވެ.

ދުނިޔޭގެ ތެލާއި ގޭހުގެ ވިޔަފާރީގައި މުހިންމު ދައުރެއް އަދާކުރާ ހޯރްމޫޒް ކަނޑު އޮޅި، ހަނގުރާމައިގެ ދުވަސްވަރު އީރާން އިން ބަންދު ކުރުމާ ގުޅިގެން ދުނިޔޭގެ ހަކަތައިގެ ބާޒާރަށް ބޮޑެތި ލޮޅުން ތަކެއް އަރާފައިވެ އެވެ. އީރާންގެ އަސްކަރިއްޔާ އިން ބުނެފައި ވަނީ، އެމެރިކާ އިން އެއްބަސްވުމާ ޚިލާފުވުމާއި، ލުބުނާންގެ ދެކުނުގައި އިޒްރޭލް އިން ސުލްހައިގެ އެއްބަސްވުމާ ތަކުރާރުކޮށް ޚިލާފުވަމުން ދާތީ، ހޯރްމޫޒް ކަނޑު އޮޅި އުޅަނދު ފަހަރަށް ބަންދު ކުރާނެ ކަމަށެވެ.

އީރާންގެ މި ނިންމުމާ ގުޅިގެން އެމެރިކާގެ ސެންޓްރަލް ކޮމާންޑް އިން ބުނެފައި ވަނީ، ބައިނަލްއަގުވާމީ އެ ކަނޑުގެ ސަރަހައްދުން ރައްކާތެރިކަމާ އެކު ދަތުރު ފަތުރު ކުރުމުގެ ފުރުސަތު އަދިވެސް އެބަ އޮތް ކަމަށެވެ. އަދި އެމެރިކާގެ ސިފައިން އެ ސަރަހައްދުގައި ހަރަކާތްތެރި ވަމުންދާ ކަމަށާއި، ކަންކަން ވަރަށް ގާތުން ބަލަމުންދާ ކަމަށް ވެސް އެމެރިކާގެ އަސްކަރިއްޔާ އިން ވަނީ ހާމަކޮށްފައި އެވެ.

މި މައްސަލަ އަކީ މެދު އިރުމަތީގެ މަސްރަހު އިތުރަށް ނުތަނަވަސް ވެފައިވާ ދަނޑިވަޅެއްގައި ފެންމަތި ވެފައިވާ ކަމަކަށްވާ އިރު، ޓްރަމްޕްގެ މި އިންޒާރާ އެކު ބައިނަލްއަގުވާމީ މުޖުތަމައުގެ ސަމާލުކަން މިހާރު ވަނީ މި ސަރަހައްދަށް ހުއްޓިފައި އެވެ.