ބޮޑު ވަޒީރުގެ ރޭހަށް ނިކުންނަވާނެ ކަމަށް ބެލެވޭ ބާންހަމް، ބައި އިލެކްޝަން ކާމިޔާބު ކުރައްވައިފި

އިނގިރޭސިވިލާތުގެ މޭކަރފީލްޑް ދާއިރާގެ ބައި-އިލެކްޝަން ކާމިޔާބު ކުރައްވައި، އެންޑީ ބާންހަމް އަލުން އެ ގައުމުގެ ގާނޫނު ހަދާ މަޖިލީހަށް އިންތިޚާބުވެ ވަޑައިގެން ފިއެވެ.

މި ކާމިޔާބީއާ އެކު ވެރިކަން ކުރާ ލޭބާ ޕާޓީގެ މިހާރުގެ ލީޑަރު އަދި ބޮޑު ވަޒީރު ކިއާ ސްޓާމާއާ ވާދަ ކުރައްވައި، ޕާޓީގެ ލީޑަރު ކަމުގެ މަގާމަށް ކުރިމަތިލެއްވުމުގެ ފުރުސަތު ބާންހަމް އަށް މި ވަނީ ފަހިވެފައި އެވެ.

އިންތިޚާބުގެ ނަތީޖާ އިޢުލާނު ކުރުމަށް ފަހު ދެއްވި ތަގުރީރުގައި ބާންހަމް ވިދާޅުވީ، މިހާރު ގައުމުގެ ސިޔާސީ މަސްރަހު އޮތް ގޮތުން ކަންކަން ރަނގަޅަށް ކުރިއަށް ނުދާކަން އެންމެނަށް ވެސް އެނގޭ ކަމަށެވެ. އަދި މި އިންތިޚާބުގެ ނަތީޖާ އަކީ ގައުމުގެ ސިޔާސީ ހާލަތު ބަދަލު ވެގެން ދާނެ މުހިންމު ދަނޑިވަޅަކަށް ވުމަކީ އެކަށީގެންވާ ކަމެއް ކަމަށް ވެސް އޭނާ ފާހަގަ ކުރެއްވި އެވެ.

ލޭބާ ޕާޓީގެ ލީޑަރު ކަމުގެ ރޭހަށް ނުކުމެ ވަޑައިގަންނަވާނެ ކަމުގެ އިޝާރާތެއް ބާންހަމް ކުރިން ވެސް ދެއްވާފައިވާއިރު، އެ މަގާމަށް ވާދަ ކުރުމަށްޓަކައި އެ ޕާޓީގެ މަދުވެގެން 81 މެންބަރުންގެ ތާއީދު އޭނާ އަށް ބޭނުން ވާނެ އެވެ. ބާންހަމް އަކީ މީގެ ކުރިން ޓޯނީ ބްލެއާ އަދި ގޯޑަން ބްރައުންގެ ސަރުކާރުގައި ކެބިނެޓުގެ މުހިންމު މަގާމު ތަކެއް ފުރުއްވާފައިވާ ތަޖުރިބާކާރު ސިޔާސީ ބޭފުޅެކެވެ.

މޭކަރފީލްޑުގެ އައު މެންބަރު ވިދާޅުވީ، ވެސްޓްމިންސްޓަރަށް އެނބުރި ވަޑައިގަތުމުގެ ވިސްނުން އަބަދުވެސް ގެންގުޅުއްވި ކަމަށާއި، އެއީ ފުރިހަމަ ނުވެ އޮތް މަސައްކަތްތައް ނިންމުމަށްޓަކައި ކަމަށެވެ. ވަކިން ޚާއްޞަކޮށް އިނގިރޭސިވިލާތުގެ އުތުރުގެ ސަރަހައްދު ތަކަށް ލިބެން ޖެހޭ ފުރުސަތުތައް ހޯދައިދީ، އެ ސަރަހައްދުގެ ކުރިއެރުމަށް މަސައްކަތް ކުރުމަކީ އޭނާގެ މުހިންމު އަމާޒެއް ކަމަށް ބާންހަމް ވިދާޅުވި އެވެ.

މި އިންތިޚާބުގެ ނަތީޖާ އާއެކު ލޭބާ ޕާޓީގެ އެތެރޭގެ ސިޔާސީ ވާދަވެރިކަން އިތުރު ވެގެން ދާނެ ކަމަށް މަސްރަހު ދިރާސާކުރާ ފަރާތް ތަކުން ލަފާ ކުރެ އެވެ. ބާންހަމް އަކީ މެންޗެސްޓަރގެ މޭޔަރުކަން ވެސް ކުރައްވާފައިވާ، އާންމުންގެ މެދުގައި މަގުބޫލު ބޭފުޅަކަށް ވުމުން، ބޮޑު ވަޒީރު ސްޓާމާގެ ލީޑަރު ކަމަށް މިއީ ކުރިމަތި ވާނެ ބޮޑު ގޮންޖެހުމެއް ކަމަށް ބެލެވެ އެވެ.