ރަސްކަމުގެ ތެރޭގައި އަމިއްލަ ޓެކްސް ބިލު ހާމަ ކުރައްވާ އިނގިރޭސިވިލާތުގެ ފުރަތަމަ ރަސްގެފާނަށް ޗާލްސް

އިނގިރޭސިވިލާތުގެ ރަސްގެފާނު ޗާލްސް ތިން ވަނަ، އަމިއްލަ ޓެކްސް ބިލުތައް ހާމަ ކުރައްވަން ނިންމަވައިފި އެވެ. 

ބަކިންހަމް ޕެލަސް އިން ބުނެފައިވާ ގޮތުގައި، މިއީ ރަސްގެފާނު އަމިއްލަފުޅަށް ނިންމެވި ނިންމުމެކެވެ. އަދި މި ބިލު ހާމަ ކުރައްވާނީ މި ހަފުތާގެ ބުރާސްފަތި ދުވަހު ކުރިއަށްދާ ރަސްގެފާނުގެ އާއިލާގެ އަހަރީ މާލީ ރިޕޯޓުގެ ބައެއްގެ ގޮތުގައި ކަމަށް ބުނެފައިވެ އެވެ. 

ބަކިންހަމް ޕެލަސް އިން ބުނެފައިވާ ގޮތުގައި މި ފިޔަވަޅަކީ ރަސްގެފާނުގެ އާއިލާގެ މާލީ ކަންކަމުގައި ހާމަކަން އިތުރު ކުރުމާއި، ޒިންމާވާން ޖެހޭ ގޮތް ފަހުމު ކުރުމަށް އެހީވުމުގެ ބޭނުމުގައި އަޅާ ފިޔަވަޅެކެވެ. އަދި އެންޑްރޫ މައުންޓްބެޓަން ވިންޒާއާ ގުޅޭ މައްސަލައިގެ ފަހުން ރަސްގެފާނުގެ އާއިލާގެ މާލީ ކަންކަމުގައި ހާމަކަން އިތުރު ކުރުމަށް ގޮވާލި ގޮވާލުންތަކާ ވެސް ގުޅިގެން މި ފިޔަވަޅު އަޅަން ނިންމީ އެވެ.  ކު

މި ފިޔަވަޅުގެ ދަށުން ހާމަ ކުރާނީ ފާއިތުވި 2024 ވަނަ އަހަރާއި 2025 ވަނަ އަހަރު ރަސްގެފާނު ދައްކަވާފައިވާ ޓެކްސްގެ ތަފްސީލު ތަކެވެ. މީގައި ޑަޗީ އޮފް ލެންކަސްޓަރުން ލިބޭ ފައިދާ އާއި، އަމިއްލަ އިންވެސްޓްމަންޓު ތަކުން ލިބޭ އާމްދަނީ އަދި ސެންޑްރިންހަމް އަދި ބަލްމޯރަލް ފަދަ އަމިއްލަ އިމާރާތް ތަކުން ލިބޭ އާމްދަނީ އަށް ދައްކާ ޓެކްސް ހިމެނޭނެ އެވެ.

ބަކިންހަމް ޕެލަސްގެ ތަރުޖަމާނަކު ވިދާޅުވެފައިވާ ގޮތުގައި މިއީ ރައްޔިތުންނަށް އިތުރަށް ހާމަކަން ބޮޑު ކުރުމުގެ ގޮތުން ކުރެވޭ މަސައްކަތެކެވެ. އެގޮތުން ކޮންމެ އަހަރެއްގެ ޓެކްސް ހާމަ ކުރުމަށް ރަސްގެފާނު ވަނީ ވައުދު ވެވަޑައިގެންފައި އެވެ. މީގެ އިތުރުން ރަސްގެފާނު ޗާލްސް ވޭލްސްގެ ޕްރިންސްކަން ކުރެއްވި ދުވަސްވަރު ވެސް ދައްކަވާ ޓެކްސްގެ މިންވަރު ހާމަ ކުރައްވަމުން ގެންދެވި އެވެ. 

ރަސްގެފާނުގެ އާމްދަނީ އަށް ޓެކްސް ދެއްކުން ލާޒިމެއް ނޫނެވެ. އެހެން ނަމަވެސް، ރަސްގެފާނުގެ އިޚްތިޔާރުގައި އާމްދަނީ އަށް ޓެކްސް ދައްކަވަ އެވެ. މިފަހަރު ފުރަތަމަ ފަހަރަށް ދައްކަވާފައިވާ ޓެކްސްގެ ޖުމްލަ އަދަދު ހާމަ ކުރައްވާނެ އެވެ. މީގެ ތެރޭގައި ފާއިތުވި އަހަރު 24 މިލިއަން ޕައުންޑް ވަރު ފައިދާ ހޯދި ޑަޗީ އޮފް ލެންކަސްޓަރުން ލިބޭ އާމްދަނީ އަށް ދައްކާ ޓެކްސް ހިމެނޭނެ އެވެ.

ރަސްގެފާނުގެ ޓެކްސް ބިލް ހާމަ ކުރާނީ ސޮވްރިން ގްރާންޓްގެ ތަފްސީލާ އެކުގައި އެވެ. މިއީ ރަސްގެފާނުގެ އާއިލާ އަށް ދައުލަތުން ދޭ އަހަރީ ފައިސާ އެވެ. މި އަހަރު ސޮވްރިން ގްރާންޓް 137.9 މިލިއަން ޕައުންޑަށް އިތުރު ވެފައިވެ އެވެ.