މަސްތުގެ ޙާލަތުގައި ހުރެ ކާރު ދުއްވުމުން، ސްޓާލިން ހައްޔަރު ކޮށްފި

މަސްތުގެ ޙާލަތުގައި ހުރެ ކާރު ދުއްވި ކަމުގެ ތުހުމަތުގައި، އިނގިރޭސިވިލާތުގެ މަޝްހޫރު ފުޓުބޯޅަ ކުޅުންތެރިޔާ ރަހީމް ސްޓާލިން ފުލުހުން ހައްޔަރު ކޮށްފި އެވެ. 

އުމުރުން 31 އަހަރުގެ ސްޓާލިން ހައްޔަރު ކުރީ އޭނާ ދުއްވަން އިން ލަމްބޯގިނީ މާކާގެ ކާރު މޮޓޯވޭއެއްގެ ބެރިއަރު ތަކުގައި ޖެހި އެކްސިޑެންޓުވުމާ ގުޅިގެންނެވެ.

ހެމްޕްޝަޔާ ފުލުހުން ނެރުނު ބަޔާނެއްގައި ބުނެފައި ވަނީ، މި ހާދިސާ ހިނގާފައި ވަނީ ބުރާސްފަތި ދުވަހުގެ ހެނދުނު ނުވައެއް ޖަހާކަންހާ އިރު ކަމަށެވެ. މި އެކްސިޑެންޓުގައި އެހެން އެއްވެސް އުޅަނދަކަށް ގެއްލުން ލިބިފައި ނުވާއިރު، އެއްވެސް މީހަކަށް އަނިޔާއެއް ލިބިފައި ނުވާ ކަމަށް ވެސް ފުލުހުން މައުލޫމާތު ދީފައިވެ އެވެ. 

ފުލުހުން ބުނި ގޮތުގައި ބާކްޝަޔާ ސަރަހައްދަށް ނިސްބަތްވާ ސްޓާލިން ހައްޔަރު ކުރީ މަސްތުގެ ހާލަތުގައި ހުރެ ނުރައްކާތެރިކޮށް އުޅަނދު ދުއްވުމާއި، "ކްލާސް ސީ" ގެ މަސްތުވާ އެއްޗެއް ގެންގުޅުމުގެ ތުހުމަތުގައި އެވެ. މީގެ އިތުރުން ތަހުގީގަށް ބޭނުންވާ ސާމްޕަލް ދިނުމަށް އޭނާ އިންކާރު ކޮށްފައިވާ ކަމަށް ވެސް ފުލުހުން ބުނެ އެވެ. ނަމަވެސް އިތުރު ތަހުގީގު ތަކަށް ފަހު މިހާރު އޭނާ ވަނީ ކަފާލާތުގެ ދަށުން ދޫކޮށްލާފައި އެވެ.

ސްޓާލިންއާ ގާތް ފަރާތަކުން ބީބީސީ ސްޕޯޓްސް އަށް މައުލޫމާތު ދެމުން ބުނީ، އޭނާ ހައްޔަރު ކުރި ނަމަވެސް އޭނާގެ ހަށިގަނޑުން މަސްތުވާ އެއްޗެއް ފެނިފައިވާ ކަމުގެ އެއްވެސް ހެއްކެއް ނެތް ކަމަށެވެ. އަދި ވޭތުވެ ދިޔަ ދެ އަހަރަކީ ސްޓާލިން އަށް ވަރަށް އުނދަގޫ ދުވަސް ތަކެއް ކަމަށާއި، އޭނާ އަކީ ބޭކާރު އަދި ބާކީ ވެފައިވާ މީހެއްގެ އިހުސާސް ކުރަން ޖެހިފައިވާ ކަމަށް ވެސް އެ ފަރާތުން ބުނެފައިވެ އެވެ.

އިނގިރޭސި ގައުމީ ޓީމަށް 82 މެޗު ކުޅެދީފައިވާ ސްޓާލިން އެންމެ ފަހުން ކުޅެފައި ވަނީ ނެދަލެންޑްސްގެ ފެޔެނޫޑަށެވެ.  މިއަހަރުގެ ފެބްރުވަރީ މަހު އެ ކުލަބާ ގުޅުނު ނަމަވެސް، އެ ކުލަބުގައި އޭނާ އަށް ކުޅެވުނީ އެންމެ އަށް މެޗެވެ. އެ ކުލަބަށް އޭނާ ބަދަލުވީ އޭގެ ކުރިން ޗެލްސީ އާއެކު ހަދާފައިވާ އެއްބަސްވުން އުވާލުމަށް ފަހު އެވެ. އެއީ ހަފުތާ އަކު 300،000 ޕައުންޑަށް ވުރެ ބޮޑު މުސާރައެއް ލިބޭ އެއްބަސްވުމެކެވެ. 

މެންޗެސްޓަރ ސިޓީ އާއެކު އިނގިރޭސި ޕްރިމިއާ ލީގުގެ ހަތަރު ތަށި ކާމިޔާބު ކޮށްފައިވާ ސްޓާލިންގެ ކެރިއަރު ފެށީ ލިވަޕޫލް އިންނެވެ. އޭނާ އެންމެ ފަހުން ގައުމީ ޓީމަށް ކުޅެދީފައި ވަނީ 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގައި އެވެ. 2022 ވަނަ އަހަރު ސިޓީ އިން ޗެލްސީ އަށް ބަދަލުވުމަށް ފަހު، އާސެނަލްގައި ލޯނު އުސޫލުން ހޭދަކުރި މުއްދަތާ އެކު، ޗެލްސީގައި ހޭދަ ކުރި ހަތަރު އަހަރު ތެރޭގައި އޭނާ އަށް ކުޅެވުނީ ލީގުގެ އެންމެ 59 މެޗެވެ.