ރައީސް މުއިއްޒުގެ ޔޫކޭ ދަތުރަށް ހަރަދު ކުރި އަމިއްލަ ފަރާތުގެ ތަފުސީލު ނުހިމަނާ ރައީސް އޮފީހުގެ މާލީ ބަޔާން ނެރެފި
ރައީސް ޑރ. މުއިއްޒު އިނގިރޭސިވިލާތަށް ކުރެއްވި ދަތުރުފުޅުގެ ބޮޑު ބައެއް އަމިއްލަ ފަރާތަކުން ސްޕޮންސާ ކުރި ކަމަށް ކުރިން ވިދާޅުވި ނަމަވެސް، ރައީސް އޮފީހުގެ މާލީ ބަޔާނުގައި އެފަދަ އެހީއެއްގެ ތަފުސީލު ހިމަނާފައި ނުވާތީ ސުވާލުތަކެއް އުފެދިއްޖެ. މި ދަތުރުފުޅަށް ސަރުކާރުން ހަރަދުވީ އެންމެ ދޮޅު ލައްކައެއްހާ ރުފިޔާ ކަމަށް ރައީސް ވިދާޅުވެފައިވާއިރު، ތިންވަނަ ފަރާތެއްގެ އެހީ ލިބިފައިނުވާ ކަމަށް ބަޔާނުގައި ބުނުމުން ދައުލަތުގެ މާލީ ހާމަކަން ބޮޑު މިންވަރާ މެދު ގިނަ ބަޔަކު ދަނީ ފާޑުކިޔަމުން. އެހީތެރިކަން ފޯރުކޮށްދިން ފަރާތާއި އެކަމުގެ އުސޫލުތައް ހާމަކުރުމަށް ސަރުކާރުން ވަނީ އިންކާރުކޮށްފަ.
ރައީސް ޑރ. މުހައްމަދު މުއިއްޒު | ރައީސް އޮފީސް
ރައީސުލްޖުމްހޫރިއްޔާ ޑރ. މުހައްމަދު މުއިއްޒު 2025 ވަނަ އަހަރުގެ އޭޕްރީލް މަހު އިނގިރޭސިވިލާތަށް ކުރެއްވި ދަތުރުފުޅަށް ހަރަދު ކުރި އަމިއްލަ ފަރާތުގެ އެއްވެސް ތަފުސީލެއް ހާމަނުކޮށް، ރައީސް އޮފީހުގެ މާލީ ބަޔާން އާންމުކޮށްފި އެވެ.
މި ދަތުރުފުޅުގެ ބޮޑު ބައެއް ހަމަޖެއްސީ އަމިއްލަ ފަރާތަކުން ކަމަށް ރައީސް މުއިއްޒު މީގެ ކުރިން ވިދާޅުވެފައިވީ ނަމަވެސް، އަންގާރަ ދުވަހު އާންމުކުރި މާލީ ބަޔާނުގައި އޭގެ ތަފްސީލެއް ބަޔާންކޮށްފައެއް ނުވެ އެވެ.
ރައީސް އޮފީހުން ނެރުނު މާލީ ބަޔާނުގައި ބުނެފައިވަނީ އެ އޮފީހުގެ "ލާބަ އާއި މަންފާ އަށް" ތިން ވަނަ ފަރާތަކުން އެއްވެސް ހަރަދެއް ކޮށްފައި ނުވާ ކަމަށެވެ. މިއީ ރައީސް މުއިއްޒު މީގެ ކުރިން ދެއްކެވި ވާހަކަފުޅުތަކާ ފުށުއަރާ ކަމަކަށް ވާތީ، އެ ދަތުރުފުޅަށް ހަރަދު ކުރި އަމިއްލަ ފަރާތަކީ ކޮބައިތޯ ސުވާލު ކުރުމުން ސަރުކާރުގެ ތަރުޖަމާނު ވަނީ އެކަމަށް ކޮމެންޓެއް ދެއްވަން ދެކޮޅު ހައްދަވާފަ އެވެ.
އިނގިރޭސިވިލާތަށް ކުރެއްވި ދަތުރުފުޅުގެ ހަރަދުތަކާ ގުޅޭގޮތުން ރައީސް މުއިއްޒު ވާހަކަފުޅު ދެއްކެވީ 10 އޭޕްރީލް 2025 ގައި ގެނެސްދެއްވި ޕޮޑްކާސްޓެއްގަ އެވެ. އެ ޕޮޑްކާސްޓުގައި ރައީސް ވިދާޅުވީ އެ ދަތުރުފުޅަށް ސަރުކާރުން މާ ބޮޑު ހަރަދެއް ނުކުރާ ކަމަށާއި، ދަތުރުގެ ގާތްގަނޑަކަށް ހުރިހާ ކަމެއް ހަމަޖެއްސީ ޕްރައިވެޓް ސެކްޓާ ސްޕޮންސާޝިޕްގެ ދަށުން ކަމަށެވެ. އަދި އެއީ ކުރިން ވެސް ރޭވިފައި އޮތް ގޮތް ކަމަށް އެމަނިކުފާނު ވިދާޅުވި އެވެ.
ރައީސް އެ ދުވަހު ވިދާޅުވި ގޮތުގައި އެ ދަތުރުފުޅަށް ސަރުކާރުން ހަރަދުވީ އެންމެ ދޮޅު ލައްކައެއްހާ ރުފިޔާ އެވެ. އެއީ ހަމައެކަނި އެމަނިކުފާނުގެ ޓިކެޓަށް ދިޔަ ފައިސާ ކަމަށާއި، ދަތުރުގައި ބައިވެރިވި އެހެން ހުރިހާ އެންމެންގެ ޓިކެޓާއި، ހުރުމާއި، ޖުމުލަ ހުރިހާ ހަރަދެއް ހަމަޖެއްސީ އަމިއްލަ ފަރާތަކުން ކަމަށް ރައީސް ވިދާޅުވި އެވެ. ރާއްޖެ އިސްތިހާރު ކުރުމަށް ލިވަޕޫލް ފުޓުބޯޅަ ކްލަބާއެކު ވެވުނު އެއްބަސްވުން އިފުތިތާހު ކުރެއްވުމަށް ކުރެއްވި މި ދަތުރުފުޅަށް ރައީސް އޮފީހުން ހަރަދު ކުރީ 153,689 ރުފިޔާ ކަމަށް އެ އޮފީހުގެ ލިޔުންތަކުން ދައްކަ އެވެ.
މި ދަތުރުފުޅަށް އަމިއްލަ ކުންފުންޏަކުން ހަރަދު ކުރީ ކޮން އުސޫލަކުން ނުވަތަ ކޮން އެއްބަސްވުމެއްގެ ދަށުން ކަމެއް ސަރުކާރުން މިހާތަނަށް ހާމަކޮށްފައެއް ނުވެ އެވެ. އަދި އެ ކުންފުންޏަކާއި ސަރުކާރާ ދެމެދު އޮތް ގުޅުމަކީ ކޮބައިކަމެއް ވެސް ސާފެއް ނޫނެވެ. މީގެ އިތުރުން، އެ ބުނާ އަމިއްލަ ފަރާތަކުން ދަތުރަށް ހަރަދު ކުރި ފައިސާގެ ޖުމުލަ އަދަދު ވެސް ރަސްމީ އެއްވެސް އިދާރާއަކުން ހާމަކޮށްފައެއް ނުވެ އެވެ.
ރައީސްގެ ދަތުރުފުޅުތަކުގެ ހަރަދުތައް ހާމަކުރުމަކީ މި ސަރުކާރުގެ ވައުދަކަށް ވީ ނަމަވެސް، މި ދަތުރުފުޅުގައި އަމިއްލަ ފަރާތަކުން ކުރި ބޮޑު ހަރަދުގެ ތަފުސީލު މާލީ ބަޔާނުގައި ނުހިމެނުމުން ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ. މިކަމުގެ ސަބަބުން ދައުލަތުގެ މާލީ ކަންކަމުގައި ހާމަކަން ބޮޑު މިންވަރާ މެދު ކުރެވޭ ސުވާލުތައް ވަނީ އިތުރުވެފަ އެވެ.
