ބޮޑު ވަޒީރު ސްޓާމާގެ ފޯނުގައި އަމިއްލަ އަށް މެސެޖު ފޮހެވޭ ގޮތަށް ހައްދަވާފައިވާ ކަމަށް ހާމަ ކޮށްފި

އިނގިރޭސިވިލާތުގެ ބޮޑު ވަޒީރު ކިއާ ސްޓާމާގެ ފޯނުގައި މެސެޖުތައް އަމިއްލަ އަށް ފޮހެވޭ "ޑިސަޕިއަރިން މެސެޖް" ފީޗާ ބޭނުން ކުރައްވާކަން ބޮޑު ވަޒީރުގެ އޮފީސް ޑައުނިން ސްޓްރީޓް އިން ކަށަވަރު ކޮށްދީފި އެވެ.

މީގެ މާނަ އަކީ ޕީޓް މެންޑެލްސަންއާ ގުޅޭ ގޮތުން ބޮޑު ވަޒީރު ކުރައްވާފައިވާ މުހިންމު މެސެޖު ތަކެއް ފޮހެވި، ރެކޯޑު ތަކުން ގެއްލިފައިވުން އެކަށީގެންވާ ކަމަށް ސަރުކާރުގެ އޮފިޝަލުން ވަނީ ހާމަ ކޮށްފައި އެވެ.

އެމެރިކާގައި ހުންނަވާ އިނގިރޭސިވިލާތުގެ ސަފީރުގެ މަގާމަށް މެންޑެލްސަން އައްޔަން ކުރުމާ ގުޅޭ ހުރިހާ ލިޔެ ކިޔުންތަކާއި މުއާމަލާތްތައް ހާމަ ކުރުމަށް އިނގިރޭސިވިލާތުގެ ޤާނޫނު ހަދާ މަޖިލީހުން މިއަހަރުގެ ކުރީ ކޮޅު ވަނީ ފާސް ކޮށްފައި އެވެ. މިދިޔަ ހޯމަ ދުވަހު ސަރުކާރުން ވަނީ މިނިސްޓަރުންނާއި، ސިވިލް ސާވަންޓުންގެ މެދުގައި ކުރެވުނު ގިނަ އަދަދެއްގެ މެސެޖުތައް އާންމު ކޮށްފައި އެވެ. ނަމަވެސް، މި ލިޔެ ކިޔުން ތަކުގެ ތެރޭގައި ބޮޑު ވަޒީރު ސްޓާމާގެ ފަރާތުން ފޮނުއްވާފައިވާ މެސެޖުތައް ހިމެނެނީ ވަރަށް މަދުންނެވެ.

މިކަމާ ގުޅޭ ގޮތުން މީޑިއާތަކާ ވާހަކަ ދައްކަވަމުން ބޮޑު ވަޒީރު ސްޓާމާ ވިދާޅުވީ، އޭނާގެ އަތުގައި ހުރި ހުރިހާ މެސެޖު ތަކެއް ހަވާލު ކޮށްފައި ވާނެ ކަމަށާއި، ހުރިހާ އިޖުރާއަތް ތަކަކަށް ފުރިހަމަ އަށް އަމަލު ކުރައްވާފައި ވާނެ ކަމަށެވެ. އަދި ސިޔާސީ ދާއިރާގެ އިތުރުން އެހެން ދާއިރާ ތަކުގެ މީހުން ވެސް މެސެޖުތައް އަމިއްލަ އަށް ފޮހެވޭ ފީޗާ ބޭނުން ކުރާކަން އޭނާ ފާހަގަ ކުރެއްވި އެވެ. ވަޓްސްއެޕްގައި ހިމެނޭ މި ފީޗާގެ ސަބަބުން 24 ގަޑިއިރާއި، 90 ދުވަހާ ދެމެދުގެ މުއްދަތެއްގައި މެސެޖުތައް އަމިއްލަ އަށް ފޮހެވިގެންދެ އެވެ.

މިނިސްޓަރުންނަށް ކަނޑަ އަޅާފައިވާ އުސޫލުތައް ބުނާ ގޮތުން، ދައުލަތުގެ ރެކޯޑުތައް ބެލެހެއްޓުމާއި، ދެފުށް ފެންނަ ސިޔާސަތަށް ހުރަސް ނޭޅޭ ނަމަ މިފަދަ ފީޗާތައް ބޭނުން ކުރުމަކީ ހުއްދަ ކަމެކެވެ. ނަމަވެސް، ވަޓްސްއެޕް ބޭނުން ކުރުމާ ގުޅޭ ގޮތުން މިހާރު މުރާޖާއެއް ކުރިއަށްދާ ކަމަށާއި، މީގެން އުނގެނެން ޖެހޭ ފިލާވަޅު ތަކެއް ހުރި ކަމަށް ބޮޑު ވަޒީރުގެ ތަރުޖަމާނު ވަނީ އެއްބަސްވެފައި އެވެ.

އިދިކޮޅު ކޮންޒަވޭޓިވް ޕާޓީގެ ޝެޑޯ މިނިސްޓަރު އެލެކްސް ބާގާޓް ވިދާޅުވީ، މުހިންމު ނިންމުން ތަކާއި މައުލޫމާތު ރައްކާތެރިކޮށް ބަލަހައްޓަން ޖެހޭނެ ކަމަށް އުސޫލު ތަކުގައި ސާފުކޮށް އޮތް ނަމަވެސް، ސްޓާމާގެ މެސެޖުތައް ވަނީ ނައްތާލާފައި ކަމަށެވެ.

އިންޓެލިޖެންސް އެންޑް ސެކިއުރިޓީ ކޮމިޓީގެ މުގައްރިރު ލޯޑް ބީމިޝް ވަނީ، ސަރުކާރުގެ ރަސްމީ މަސައްކަތް ތަކުގައި ވަޓްސްއެޕް ބޭނުން ކުރުން ހުއްޓާލުމަށް ގޮވާލައްވާފައި އެވެ. އޭނާ ވިދާޅުވީ މީގެ ސަބަބުން ސަލާމަތީ ނުރައްކާތައް ކުރިމަތި ވުމުގެ އިތުރުން، ނިންމުންތައް ނިންމާ ގޮތުގެ ރެކޯޑުތައް ނުބެލެހެއްޓޭ ކަމަށެވެ. ބޮޑު ވަޒީރުގެ އިތުރުން ޑެޕިއުޓީ ޕްރައިމް މިނިސްޓަރު ޑޭވިޑް ލެމީ އާއި ޗާންސެލަރ ރޭޗަލް ރީވްސް ފަދަ އިސް މިނިސްޓަރުން ވެސް މި ފީޗާ ބޭނުން ކުރައްވާކަން ވަނީ ހާމަވެފައި އެވެ.

އާންމުކުރި ލިޔެ ކިޔުން ތަކުގެ ތެރޭގައި ލޯޑް މެންޑެލްސަން އާއި ބޮޑު ވަޒީރު ސްޓާމާއާ ދެމެދު ކުރެވުނު ހަ މެސެޖެއް ހިމެނެ އެވެ. މީގެ ތެރޭގައި ކުރީގެ ބޮޑު ވަޒީރު ސަރ ޖޯން މޭޖާއާ ބައްދަލުކުރުމާ ގުޅޭ ގޮތުން ދެކެވުނު ވާހަކަތައް ހިމެނެ އެވެ.

މީގެ އިތުރުން، މިނިސްޓަރު ޕެޓް މެކްފެޑަން އާއި މެންޑެލްސަންއާ ދެމެދު ކުރެވުނު މެސެޖު ތަކެއް ވެސް ވަނީ ހާމަވެފަ އެވެ. އޭގެ ތެރެއިން އެއް މެސެޖެއްގައި މެންޑެލްސަން ވަނީ ބޮޑު ވަޒީރުގެ އޮފީހަކީ "ބާރު ކެނޑިފައިވާ" ތަނެއްގެ ގޮތުގައި ސިފަ ކޮށްފައި އެވެ. ނަމަވެސް މެކްފެޑަން ވަނީ ބޮޑު ވަޒީރު ކުރައްވަނީ އުނދަގޫ މަސައްކަތެއް ކަމަށާއި، އޭނާ ގައުމަށްޓަކައި ރަނގަޅު މަސައްކަތް ތަކެއް ކުރައްވަމުންދާ ކަމަށް ވިދާޅުވެފައި އެވެ.