އަމިއްލަ ތަފާތު ވިސްނުމެއް ހުރި ނަމަވެސް އެމެރިކާ އާ އެކުވީ އެއްބަސްވުމަށް ރުހުން ދެއްވި ކަމަށް އީރާނުގެ ލީޑަރު ވިދާޅުވެއްޖެ

މެދުއިރުމަތީގެ ހަނގުރާމަ ހުއްޓާލުމަށް އެމެރިކާއާއެކު ވެފައިވާ އެއްބަސްވުމަށް އޭނާގެ އަމިއްލަ "ތަފާތު ޚިޔާލުތަކެއް" ހުރި ނަމަވެސް، އެ އެއްބަސްވުމަށް ރުހުން ދެއްވައިފިކަމަށް އީރާނުގެ އެންމެ މަތީ ވެރިޔާ މުޖުތަބާ ޚާމަނާއީ ބުރާސްފަތި ދުވަހު ވިދާޅުވެއްޖެއެވެ. ނަމަވެސް އެކަމާ ގުޅޭ އިތުރު ތަފްސީލެއް އޭނާ ހާމަކުރައްވާފައެއް ނުވެއެވެ.

އީރާނުގެ ދައުލަތުގެ ޓީވީ މެދުވެރިކޮށް އިއްވި މެސެޖެއްގައި ޚާމަނާއީ ވިދާޅުވީ، އުސޫލީ ގޮތުން އެ ވިސްނުމުގެ އެއްބަސްވުމާ މެދު އޭނާގެ ތަފާތު ޚިޔާލުތަކެއް ހުރި ކަމަށެވެ. ނަމަވެސް، އީރާނުގެ ރައްޔިތުންނާއި "ރެސިސްޓަންސް ފްރަންޓް" ނުވަތަ އިދިކޮޅު ފަރާތްތަކުގެ ހައްގުތައް ހިމާޔަތްކުރުމަށް، ސުޕްރީމް ނޭޝަނަލް ސެކިއުރިޓީ ކައުންސިލްގެ ރައީސްގެ ހައިސިއްޔަތުން އީރާނުގެ ރައީސް އާއި އެ ކައުންސިލްގެ އެހެން މެންބަރުންގެ ފަރާތުން ދެއްވި ޔަގީންކަމާ ގުޅިގެން، އެ އެއްބަސްވުމަށް ހުއްދަ ދެއްވީ ކަމަށް އޭނާ ވިދާޅުވިއެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން އީރާނަށް ދިން ހަމަލާތަކުގައި، މުޖުތަބާ ޚާމަނާއީގެ ބައްޕާފުޅު އަދި ކުރީގެ އެންމެ މަތީ ވެރިޔާ އަލީ ޚާމަނާއީ އަވަހާރަކޮށްލުމާ ގުޅިގެން ސަރަހައްދީ ހަނގުރާމަ ފެށުނު ފަހުން، މާޗް މަހު މަގާމާ ހަވާލުވެވަޑައިގަތް ފަހުން މުޖުތަބާ ޚާމަނާއީ އާންމުންގެ ތެރެއަށް ނުކުމެވަޑައިގެންފައެއް ނުވެއެވެ.

މި މެސެޖަކީ، އެމެރިކާގެ ރައީސް ޑޮނަލްޑް ޓްރަމްޕާއި އީރާނުގެ ރައީސް މަސްއޫދު ޕެޒެޝްކިއަން ސޮއިކުރެއްވި، ހަނގުރާމަ ހުއްޓާލުމުގެ އެއްބަސްވުމާ ގުޅޭގޮތުން ޚާމަނާއީ ދެއްވި ފުރަތަމަ ބަޔާނެވެ.

ޚާމަނާއީ ވިދާޅުވި ގޮތުގައި، ރައީސް ޓްރަމްޕް މި އެއްބަސްވުން ކާމިޔާބު ކުރެއްވުމަށްޓަކައި "މާޔޫސްކަމާއެކު" އެކި ކަހަލަ ފިއްތުންތައް ކުރިމަތިކުރައްވާފައިވެއެވެ.

މީގެ އިތުރުން، އެމެރިކާގެ ފަރާތުން އިންސާފުން ބޭރުން އިތުރު ކަންކަމަށް އެދޭނަމަ އެ އެއްބަސްވުން ގަބޫލުނުކުރާނެ ކަމުގެ ޔަގީންކަން ރައީސް ޕެޒެޝްކިއަންގެ ފަރާތުން ލިބިވަޑައިގެންފައިވާ ކަމަށް ޚާމަނާއީގެ މެސެޖުގައި ފާހަގަކުރައްވާފައިވެއެވެ.

"ކުރިއަށް އޮތް ތަނުގައި ކުރާ މަޝްވަރާތަކުގެ މާނައަކީ ދުޝްމަނުންގެ ވިސްނުން ގަބޫލުކުރުން ނޫންކަން އެއީ ސާފުކޮށް އެނގެން އޮތް ކަމެއް،" ޚާމަނާއީ އިތުރަށް ވިދާޅުވިއެވެ.