ކުޑަ ކުދިން ސޯޝަލް މީޑިއާ ބޭނުންކުރުން މަނާކުރުމަކީ އަމަލީގޮތުން ތަންފީޒުކުރެވޭނެ ކަމެއް ނޫން!

ކުޑަ ކުދިން ސޯޝަލް މީޑިއާ ބޭނުންކުރުން މަނާކުރުމަކީ އަމަލީގޮތުން ތަންފީޒުކުރެވޭނެ ކަމެއް ނޫން ކަމަށާއި، އޭގެ ބަދަލުގައި ސަރުކާރުން އިސްކަންދޭންވީ ސޯޝަލް މީޑިއާއަށް ދެވިހިފާ ގޮތަށް ހުންނަ ފީޗާތައް ހަނިކުރުމަށް ކަމަށް އޮންލައިން ރައްކާތެރިކަމަށް މަސައްކަތްކުރާ ޗެރިޓީއެއްގެ އިސްވެރިޔަކު ވިދާޅުވެއްޖެއެވެ.

އޮސްޓްރޭލިއާގައި މިހާރު އަމަލުކުރަމުންދާ އުސޫލާ އެއްގޮތަށް، 16 އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މުޅިން މަނާކުރުމާ ގުޅޭގޮތުން ދެކެވެމުންދާ ވާހަކަތަކާ ގުޅިގެން، އިނގިރޭސި ބޮޑުވަޒީރު ސަރ ކިއަރ ސްޓާމަރ އޮންލައިން ރައްކާތެރިކަމާ ގުޅޭ ސަރުކާރުގެ ސިޔާސަތުތައް ހޯމަ ދުވަހު ހާމަކުރައްވާނެ ކަމަށް ބެލެވެއެވެ.

މޮލީ ރަސަލްގެ ހަނދާނުގައި އުފައްދާފައިވާ 'މޮލީ ރޯޒް ފައުންޑޭޝަން' ގެ ޗީފް އެގްޒެކެޓިވް އެންޑީ ބަރޯސް ބީބީސީ ބްރެކްފާސްޓަށް ދެއްވި އިންޓަވިއުއެއްގައި ވިދާޅުވީ، އިނގިރޭސިވިލާތުން ވެސް އެފަދަ މަނާކުރުމެއް ތަންފީޒުކޮށްފިނަމަ އެއީ ހިތާމަ ކުރާނެ ކަމެއް ކަމަށެވެ. އަދި އެފަދަ ނިންމުމަކަށް ބާރުދޭ އެކަށީގެންވާ ހެކިތަކެއް ނެތްކަން އޭނާ ފާހަގަކުރެއްވިއެވެ.

އޭނާ ވިދާޅުވި ގޮތުގައި ސަރުކާރުން އިސްކަންދޭންވީ އޮޓޯޕްލޭ އާއި، އިންފިނިޓް ސްކްރޯލް ފަދަ ފީޗާތަކުގެ އިތުރުން، ކުޑަކުދިންނަށް ގެއްލުންދެނިވި މައުލޫމާތުތައް ފޯރުކޮށްދޭ 'އަލްގޮރިދަމް' ތައް މަނާކުރުމަށެވެ.

މޮލީ ރަސަލް އަމިއްލައަށް މަރުވީ 2017 ވަނަ އަހަރު އުމުރުން އެންމެ 14 އަހަރުގައެވެ. އެއީ އޮންލައިންކޮށް އަމިއްލަ ނަފްސަށް ގެއްލުންދިނުމާ ގުޅޭ މައުލޫމާތުތަކަށް އޭނާ ހުށަހެޅުމާ ގުޅިގެންނެވެ.

ބަރޯސް ވިދާޅުވީ ބެލެނިވެރިން ވެސް އެދެނީ ސަރުކާރުން "ހަރުދަނާ ފިޔަވަޅުތަކެއް" އެޅުމަށާއި، އަމަލީގޮތުން ކާމިޔާބު ކުރެވޭނެ ފަދަ އުސޫލުތަކެއް ތައާރަފުކުރުމަށް ކަމަށެވެ.

މީގެ ތެރޭގައި ސޯޝަލް މީޑިއާއަށް ދެވިހިފާ ގޮތަށް ހުންނަ ފީޗާތައް ކަމަށްވާ އޮޓޯޕްލޭ އާއި، އިންފިނިޓް ސްކްރޯލް އަދި ކުދިންނަށް ގެއްލުންދެނިވި ތަކެތި ފެންނަ ގޮތަށް ހުންނަ އަލްގޮރިދަމްތަކަށް ހަރުކަށި ހުރަސްތަކެއް ކުރިމަތިކުރުން ހިމެނެއެވެ.

އޭނާ ފާހަގަކުރެއްވި ގޮތުގައި މޮލީގެ މަރަށް މަގުފަހިވި ގެއްލުންތަކުގައި މި ފީޗާތަކުގެ ދައުރު ބޮޑެވެ.

ކުޑަކުދިންގެ ރައްކާތެރިކަމަށް މަސައްކަތްކުރާ މާހިރުންނާއި ޖަމިއްޔާތަކުން، އޮސްޓްރޭލިއާގައި އޮންނަ ފަދަ 16 އަހަރުން ދަށުގެ ކުދިންނަށް ސޯޝަލް މީޑިއާ މަނާކުރާ އުސޫލަށް އިތުބާރު ނުކުރާ ކަމަށް ބަރޯސް ވިދާޅުވިއެވެ.

އޮސްޓްރޭލިއާއިން މިދިޔަ ޖެނުއަރީ މަހު މި މަނާކުރުން ތައާރަފުކުރި ނަމަވެސް، އެ ގައުމުގެ އީ-ސޭފްޓީ ކޮމިޝަނުން މާޗް މަހު ހާމަކުރި ގޮތުގައި، ސޯޝަލް މީޑިއާ އެކައުންޓް އޮންނަ ކުދިންގެ ބެލެނިވެރިންގެ ތެރެއިން ކޮންމެ 10 މީހަކުން 7 މީހަކު ބުނެފައިވަނީ އެ ކުދިން އަދިވެސް އެ ޕްލެޓްފޯމްތައް ބޭނުންކުރަމުންދާ ކަމަށެވެ.

ބަރޯސް ބީބީސީ ބްރެކްފާސްޓަށް މައުލޫމާތު ދެމުން ވިދާޅުވީ، އޮސްޓްރޭލިއާގައި މި އުސޫލު ކާމިޔާބު ނޫން ކަމަށާއި، މިއީ އަމަލީގޮތުން ތަންފީޒުކުރެވޭނެ ކަމެއް ނޫން ކަމަށެވެ.

އޭނާ އިތުރަށް ވިދާޅުވީ، މި ސިޔާސަތަކީ އެއްވެސް ރޭވުންތެރިކަމެއް ނެތި އަވަސްއަރުވާލައިގެން ނިންމާފައިވާ ނިންމުމެއް ކަމަށް ފެންނަ ކަމަށާއި، ކުޑަކުދިންގެ ރައްކާތެރިކަމާ ގުޅޭ ކަމެއްގައި މިފަދަ ގޮތަކަށް އަމަލުކުރުމަކީ ނުރައްކާތެރި ކަމެއް ކަމަށެވެ. އަދި ސިޔާސަތުތައް އެކުލަވާލަންވާނީ ފެންނަން ހުރި ހެކިތަކުގެ މައްޗަށް ބިނާކޮށް ކަމަށް އޭނާ ވިދާޅުވިއެވެ.

ކުޑަކުދިން ސޯޝަލް މީޑިއާ ބޭނުންކުރުމާ ގުޅޭގޮތުން، ޒުވާނުންނަށް އޮންލައިންކޮށް އެންމެ ރައްކާތެރިކޮށް ތިބެވޭނެ ގޮތްތައް ދެނެގަތުމަށްޓަކައި އިނގިރޭސި ސަރުކާރުން ޖެނުއަރީ މަހު ވަނީ މަޝްވަރާ ބައްދަލުވުންތަކެއް ފަށާފައެވެ.

މި މަޝްވަރާތަކުގައި 116,211 ފަރާތަކުން ޖަވާބު ދީފައިވާއިރު، ބޮޑުވަޒީރު ސަރ ކިއަރ ސްޓާމަރ އެމަނިކުފާނުގެ ހުށަހެޅުންތައް ހޯމަ ދުވަހު ޕާލަމެންޓަށް ހުށަހަޅުއްވާނެއެވެ.

ސަރުކާރުގެ ވަޒީރުން ވަނީ ސޯޝަލް މީޑިއާ ބޭނުންކުރުން ހަނިކުރުމަށްޓަކައި، މުޅިން މަނާކުރުން ނުވަތަ ސްކްރީން ބޭނުންކުރާ ވަގުތު ކަނޑައެޅުން ފަދަ ތަފާތު ގޮތްތަކާ މެދު މަޝްވަރާ ކުރައްވާފައެވެ.

ބަރޯސް ހާމަކުރެއްވި ގޮތުގައި، ސޯޝަލް މީޑިއާ މަނާކުރުމަށް ވަކާލާތުކުރާ ފަރާތްތަކުން ބެލެނިވެރިންނަށް ދެނީ "ދޮގު އުންމީދުތަކެއް" ކަމަށެވެ. އޭނާ ވިދާޅުވީ ހުރިހާ ހެކިތަކަކަށް ބަލާއިރު، އޮސްޓްރޭލިއާގެ ތަޖުރިބާއިން އިނގިރޭސިވިލާތަށް ލިބޭނެ އެއްވެސް ފިލާވަޅެއް ނެތް ކަމަށެވެ.

މޮލީގެ ބައްޕަ އިއަން ރަސަލް ޖެނުއަރީ މަހު ބީބީސީގެ ނިއުސްކާސްޓަށް ދިން އިންޓަވިއުއެއްގައި ބުނީ، ސަރުކާރުން "މަނާކުރުން" ފަދަ ހަރުކަށި ފިޔަވަޅުތައް އެޅުމުގެ ބަދަލުގައި، މިހާރު ހުރި ގާނޫނުތައް ހަރުދަނާކޮށް ތަންފީޒުކުރަން ޖެހޭ ކަމަށެވެ.