އޮސްޓްރޭލިޔާ ގައި 16 އަހަރުން ދަށުގެ ކުދިންނަށް ޑިސެމްބަރު 10 ން ފެށިގެން ސޯޝަލް މީޑިއާ ބޭނުން ކުރުން މަނާ ވާނެ
ޑިސެމްބަރު 10 ން ފެށިގެން އޮސްޓްރޭލިއާ ގައި 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުން ކުރުން މަނާ ވެގެން ދާއިރު، ދިރާސާތަކުން ދައްކާގޮތުން 10-15 އަހަރުގެ ކުދިންގެ ތެރެއިން ކޮންމެ 10 ކުދިންގެ ތެރެއިން 7 ކުދިން ގެއްލުންދޭ ކޮންޓެންޓާއި ސައިބަރ ބުލީއިންއާ ވަނީ ކުރިމަތި ވެފައި.
ބައެއް މަޝްހޫރު އޮންލައިން ސޯޝަލް މީޑިއާ އަދި ސޯޝަލް ނެޓްވޯކިން ސައިޓްތަކުގެ ލޯގޯ ހިމެނޭ ފޮޓޯ އެއް
ޑިސެމްބަރު 10 ން ފެށިގެން، އޮސްޓްރޭލިއާ ގައި 16 އަހަރުން ދަށުގެ ކުދިންނަށް ސޯޝަލް މީޑިއާ މަނާ ވާނެ އެވެ.
އެއާއެކު އެ ތާރީޚުން ފެށިގެން ސޯޝަލް މީޑިއާ ޕްލެޓްފޯމްތަކުގައި އެކައުންޓް ނުހެދޭނެ ގޮތަށާއި މިހާރު ހުރި އެކައުންޓްތައް ބަންދުކުރުމަށް ނުވަތަ ނައްތާލުމަށް ސޯޝަލް މީޑިއާ ކުންފުނިތަކުން "ފިޔަވަޅުތައް" އަޅަންޖެހޭނެ އެވެ.
ގިނަ މައިންބަފައިން ގެ މެދުގައި މަޤްބޫލު އަދި ދުނިޔޭގެ ފުރަތަމަ މިފަދަ ސިޔާސަތެއް ތަންފީޒު ކުރާ އޮސްޓްރޭލިއާ ގެ ސަރުކާރުން ބުނާގޮތުން މި ފިޔަވަޅު އެޅީ ކުދިންނަށް ސޯޝަލް މީޑިއާގެ ސަބަބުން ކުރިމަތިވެދާނެ "ޕްރެޝަރުތަކާއި ރިސްކްތައް" ކުޑަކުރުމަށް ކަމުގައެވެ.
މި އަހަރުގެ ކުރީކޮޅު ސަރުކާރުން ކުރި ދިރާސާއަކުން ހާމަވި ގޮތުގައި 10 އަހަރާއި 15 އަހަރާ ދެމެދުގެ ކުދިންގެ 96 އިން ސައްތަ ސޯޝަލް މީޑިއާ ބޭނުންކުރެ އެވެ. އަދި ކޮންމެ 10 ކުދިންގެ ތެރެއިން 7 ކުދިން ވަނީ ގެއްލުން ހުރި ކޮންޓެންޓާއި އަމަލުތަކާ ކުރިމަތިލާފައިވާ ކަމަށެވެ. މީގެ ތެރޭގައި އަމިއްލަ ނަފްސަށް ގެއްލުން ދިނުމަށް ހިތްވަރުދޭ ކޮންޓެންޓް ހިމެނެއެވެ. 7 ކުދިންގެ ތެރެއިން 1 ކުއްޖަކު ބޮޑެތި މީހުންނާއި ނުވަތަ ބޮޑެތި ކުދިންގެ ފަރާތުން ގްރޫމިންގ ގެ އަމަލުތަކާ ކުރިމަތިލާފައިވާ ކަމަށް ރިޕޯޓްކޮށްފައި ވުމުގެ އިތުރުން، ސައިބަރ ބުލީއިންގެ ޝިކާރައަކަށްވެފައިވާ ނިސްބަތުން ގިނަ ކުދިން ތިބި ކަމަށް ވެސް ބުނެފައި ވެއެވެ.
އޮސްޓްރޭލިއާ ސަރުކާރުން ވަނީ ކުޑަކުދިންނަށް މަނާ ކުރާ ދިހަ ޕްލެޓްފޯމެއްގެ ނަން ހާމަ ކޮށްފަ އެވެ: ފޭސްބުކް، އިންސްޓަގްރާމް، ސްނެޕްޗެޓް، ތްރެޑްސް، ޓިކްޓޮކް، އެކްސް، ޔޫޓިއުބް، ރެޑިޓް އަދި ސްޓްރީމިންގ ޕްލެޓްފޯމްތަކުގެ ތެރޭގައި ކިކް އަދި ޓްވިޗް ހިމެނެއެވެ. މީގެ އިތުރުން އޮންލައިން ގޭމިންގއަށް މި މަނާކުރުން ފުޅާކުރުމަށް ވެސް އަންނަނީ ސަރުކާރަށް ޕްރެޝަރ ކުރަމުންނެވެ.
އުސޫލު ހަމަޖެހިފައިވާ ގޮތުން މި މަނާކުރުމާ ޚިލާފުވުމުން ކުދިންނަށާއި މައިންބަފައިންނަށް އަދަބެއް ނުދެވޭނެއެވެ. އެއީ ސޯޝަލް މީޑިއާ ކުންފުނިތަކުން އެކަން ތަންފީޒު ކުރަން ޖެހޭނެއަތީ އާއި، ސީރިއަސް ނުވަތަ ތަކުރާރުކޮށް ޚިލާފުވުމުން އެކުންފުނިތައް 32 މިލިއަން އެމެރިކާ ޑޮލަރުން ޖުރިމަނާ ކުރެވޭ ގޮތައް އޮތުމުންނެވެ.
ސަރުކާރުން ބުނާގޮތުން މި ކުންފުނިތަކުން ކުދިން އެމީހުންގެ ޕްލެޓްފޯމްތަކުން ދުރުކުރުމަށް އެކަށީގެންވާ ފިޔަވަޅުތައް އަޅަން ޖެހޭނެއެވެ. އަދި އުމުރު ޔަޤީންކުރުމުގެ ޓެކްނޮލޮޖީތައް ބޭނުން ކުރަން ޖެހޭނެއެވެ.
މިއާ އެކު ފޭސްބުކް، އިންސްޓަގްރާމް އަދި ތްރެޑްސް ގެ ވެރިފަރާތް މެޓާ އިން އިޢުލާން ކޮށްފައި ވަނީ ޑިސެމްބަރު 4 ން ފެށިގެން ޓީނޭޖް އެކައުންޓްތައް ބަންދުކުރަން ފަށާނެ ކަމަށެވެ. އެހެން ޕްލެޓްފޯމްތަކުން މި މަނާކުރުމާ އެއްގޮތަށް އަމަލުކުރާނެ ގޮތް މިހާތަނަށް ބުނެފައެއް ނުވެއެވެ.
