އޮސްޓްރޭލިއާގައި ސްނެޕްޗެޓް ބޭނުން ކުރާ ހަތަރު ލައްކަ އަށް ވުރެ ގިނަ އެކައުންޓު ބްލޮކު ކޮށްފި

އޮސްޓްރޭލިއާގައި ސްނެޕްޗެޓް ބޭނުން ކުރަމުން އަންނަ 415،000 (ހަތަރު ލައްކަ ފަނަރަ ހާސް) އެކައުންޓު ބްލޮކު ކޮށްފި އެވެ. 

ހޯމަ ދުވަހު ސްނެޕްޗެޓް ކުންފުނިން ބުނެފައި ވަނީ، އޮސްޓްރޭލިއާގައި 16 އަހަރުން ދަށުގެ ކުދިންނަށް ސޯޝަލް މީޑިއާ މަނާ ކުރުމުގެ ޤާނޫނުގެ ދަށުން އެކައުންޓުތައް ބްލޮކު ކޮށްފައިވާ ކަމަށެވެ. ނަމަވެސް، އުމުރު ޔަޤީން ކުރުމުގެ ޓެކްނޮލޮޖީ ހުރަސް ކުރުމަށް ފަހު، ބައެއް ކުދިން އަދިވެސް ސްނެޕްޗެޓް ބޭނުން ކޮށްފާނެ ކަމަށް އެ ކުންފުނިން ބުނެފައިވެ އެވެ. 

ދުނިޔޭގައި ފުރަތަމަ ފަހަރަށް ތަންފީޒު ކުރާ މި ޤާނޫނަށް އިތުރު ރައްކާތެރި ކަމެއްގެ ގޮތުން، އެޕް ސްޓޯރު ތަކުން ބޭނުން ކުރާ މީހުންގެ އުމުރު ޗެކް ކުރުމަށް މަޖުބޫރު ކުރުމަށް އޮސްޓްރޭލިއާގެ ކަމާ ގުޅުން ހުރި ބެލެނިވެރި އިދާރާ ތަކަށް އެ ކުންފުނިން ވަނީ ގޮވާލައިފަ އެވެ. 

މިދިޔަ އަހަރުގެ ޑިސެމްބަރު މަހުގެ 10 ވަނަ ދުވަހު ތަންފީޒު ކުރަން ފެށި މި ޤާނޫނުގެ ދަށުން ސްނެޕްޗެޓް، މެޓާ، ޓިކްޓޮކް އަދި ޔޫޓިއުބް ފަދަ ޕްލެޓްފޯމް ތަކުން 16 އަހަރުން ދަށުގެ ކުދިންނަށް އެކައުންޓު ބޭނުން ކުރުމުގެ ފުރުސަތު ހުއްޓުވަން ޖެހެ އެވެ. މި ޤާނޫނާ އެއްގޮތަށް އަމަލު ކުރުމަށް އެކަށީގެންވާ ފިޔަވަޅު ނޭޅިއްޖެ ނަމަ، އެ ކުންފުންޏެއް 49.5 މިލިއަން އޮސްޓްރޭލިއަން ޑޮލަރު، ނުވަތަ 34 މިލިއަން އެމެރިކާ ޑޮލަރުން ޖޫރިމަނާ ކުރެވޭނެ އެވެ. 

އޮސްޓްރޭލިއާގެ އީސޭފްޓީ އޮންލައިން ރެގިއުލޭޓަރުން މިދިޔަ ޖަނަވަރީ މަހުގެ ތެރޭގައި ހާމަ ކޮށްފައިވާ ގޮތުގައި، ޓެކްނޮލޮޖީ ކުންފުނި ތަކުން ހަތަރު މިލިއަން އެކައުންޓު ބްލޮކުކޮށް، ރަނގަޅު ނަތީޖާއެއް ނެރެފައިވާ ކަމަށެވެ. އޭގެ ފަހުން ޖަނަވަރީ މަސް ނިމުމަކަށް އައިއިރު، އޮސްޓްރޭލިއާގައި ބްލޮކު ކޮށްފައިވާ ހަތަރު ލައްކަ ފަނަރަ ހާސް އެކައުންޓަކީ 16 އަހަރުން ދަށުގެ ކުދިންނަށް ނިސްބަތްވާ އެކައުންޓު ތަކެއް ކަމަށް ސްނެޕްޗެޓް އިން ވަނީ ބުނެފަ އެވެ. 

ނަމަވެސް، ސްނެޕްޗެޓް އިން ބުނެފައި ވަނީ އެ ޤާނޫނުގައި ވަރަށް ބޮޑެތި ދޮރު ތަކެއް ހުޅުވިފައިވާ ކަަމަށެވެ. އުމުރު ލަފާ ކުރުމުގެ ޓެކްނޮލޮޖީ ދެ އަހަރު ނުވަތަ ތިންއަހަރުގެ ތަފާތެއް ހުރެެގެން ސައްހަވާ ކަމަށް އެ ކުންފުނިން ބުންޏެވެ. އޭގެ ސަބަބުން 16 އަހަރުން ދަށުގެ ކުދިންނަށް ރައްކާތެރިކަން ކުޑަ ވެގެން ގޮސް ދާނެ ކަމުގެ ބިރު އޮތް ކަމަށް އެ ކުންފުނިން ވަނީ ފާހަގަ ކޮށްފަ އެވެ. 

އެޕް ސްޓޯރު ތަކުން ޑައުންލޯޑު ކުރުމުގެ ކުރިން، އެ ބޭނުން ކުރާ މީހުންގެ އުމުރު ޗެކް ކުރުމަށް އޮސްޓްރޭލިއާ އިން މަޖުބޫރު ކުރުމަށް މެޓާ ހިންގާ މާކް ޒަކަބާގް ގޮވާލާފައިވާއިރު، ސްނެޕްޗެޓް އިން ވެސް ވަނީ އެކަމަށް ތާއީދުކޮށް ގޮވާލައިފަ އެވެ.