ސޯޝަލް މީޑިއާއަށް ކުދިން ދެވިހިފާ މައްސަލައިގައި ޒަކަބާގް ކޯޓަށް ހާޒިރު ކުރަނީ

ފޭސްބުކްގެ ބާނީ އަދި އިންސްޓަގްރާމްގެ ވެރިޔާ މާކް ޒަކަބާގް، ސޯޝަލް މީޑިއާއަކީ ކުޑަކުދިން އެއަށް ދެވިހިފާ އެއްޗެއްތޯ ބެލުމަށް ކުރިއަށްދާ ތާރީޚީ ޝަރީއަތެއްގައި ހެކިބަސް ދިނުމަށް މި އަންނަ ބުދަ ދުވަހު ކެލިފޯނިއާގެ ކޯޓަކަށް ހާޒިރުވާނެ އެވެ.

މިއީ ޒަކަބާގްގެ މެޓާ ޕްލެޓްފޯމްސް ކުންފުންޏާއި، އެ ކުންފުނީގެ ދަށުން ހިންގާ ވަޓްސްއަޕް ފަދަ ވަސީލަތްތަކާ ދެކޮޅަށް ފާއިތުވި އަހަރުތަކުގައި އަމާޒުވި ފާޑުކިޔުންތަކަށްފަހު، ޖޫރީއެއްގެ ކުރިމަތީގައި އޭނާ ހެކިބަސް ދޭ ފުރަތަމަ ފަހަރެވެ.

މެޓާގެ ވަކީލުން ކޯޓުގައި ބުނަމުންދަނީ، މި މައްސަލައިގައި ދައުވާކުރާ މައިގަނޑު ފަރާތް ކަމަށްވާ "ކޭ.ޖީ.އެމް" (ނަން ސިއްރުކުރުމަށް ބޭނުންކޮށްފައިވާ އަކުރުތަކެއް) އަށް ނަފްސާނީ ގޮތުން ގެއްލުންވީ އިންސްޓަގްރާމް ބޭނުންކުރުމުގެ ސަބަބުން ނޫން ކަމަށާއި، އެއީ އޭނާގެ ދިރިއުޅުމުގައި ދިމާވި އެހެން ކަންތައްތަކެއްގެ ސަބަބުން ކަމަށެވެ.

ލޮސް އެންޖެލިސްގައި ކުރިއަށްދާ މި އަޑުއެހުމުގައި ގޫގުލްގެ ޔޫޓިއުބްގެ މައްޗަށްވެސް ދައުވާ އުފުލާފައިވާއިރު، ސޯޝަލް މީޑިއާގެ ބޮޑެތި ކުންފުނިތަކާ ދެކޮޅަށް ހުށަހަޅާފައިވާ މިފަދަ އެތައް ހާސް މައްސަލައަކަށް މި ޝަރީއަތުގެ ނަތީޖާގެ ސަބަބުން އަސަރުކުރާނެތީ، ގިނަ ބަޔަކު ދަނީ މި މައްސަލަ ވަރަށް ގާތުން ބަލަމުންނެވެ.

މި މައްސަލައިގައި ދައުވާ ލިބޭ ޓިކްޓޮކް އަދި ސްނެޕްޗެޓުން ވަނީ ޝަރީއަތް ފެށުމުގެ ކުޑަދުވަސްކޮޅެއް ކުރިން ކޯޓުން ބޭރުގައި މައްސަލަ ހައްލުކޮށްފަ އެވެ. ނަމަވެސް އެއްބަސްވުމުގެ ތަފްސީލެއް ހާމަކޮށްފައެއް ނުވެއެވެ.

ޝަރީއަތުގެ މަޖިލީހުގައި ޒަކަބާގް އާ ސުވާލުކުރާނެ ކަމަށް ބެލެވެނީ އިންސްޓަގްރާމް ފަރުމާކޮށްފައިވާ ގޮތާ ގުޅޭގޮތުންނާއި، ގިނަ ބަޔަކު އެ ވަސީލަތަށް ޝައުގުވެރިކުރުވުމަށްޓަކައި ފާއިތުވި އަހަރުތަކުގައި އެ ކުންފުނިން ގެނައި ބަދަލުތަކާ ގުޅޭގޮތުންނެވެ.

މީގެ އިތުރުން، މީހުން އެ ޕްލެޓްފޯމްތަކުގައި ހޭދަކުރާ ވަގުތަށް ބަލައިގެން އިޝްތިހާރުން އާމްދަނީ ހޯދުމަށް މެޓާ އިން ގެންގުޅޭ ވިޔަފާރީގެ އުސޫލުތަކަށް ވެސް މި ޝަރީއަތުގައި ބޮޑަށް އަލިއަޅުވާލާނެ ކަމަށް ބެލެވެ އެވެ.

ނިމިދިޔަ ހަފުތާގައި ކުރި ސުވާލުތަކަށް ޖަވާބު ދެއްވަމުން އިންސްޓަގްރާމްގެ އިސްވެރިޔާ އެޑަމް މޮސޭރީ ވަނީ ސޯޝަލް މީޑިއާއަށް ދެވިހިފާ ކަމަށް ބުނާ ވާހަކައަށް އިންކާރު ކުރައްވާފައެވެ. އޭނާ ވިދާޅުވީ ދުވާލަކު 16 ގަޑިއިރު އިންސްޓަގްރާމް ބޭނުންކުރި ނަމަވެސް، އެއީ އެއަށް ދެވިހިފުން ކަމަށް ނުބެލެވޭނެ ކަމަށެވެ.

މި ޝަރީއަތް އެތައް ހަފުތާއަކަށް ދެމިގެންދާނެ ކަމަށް ލަފާކުރެވޭއިރު، މެޓާގެ ކުރީގެ މުވައްޒަފުންގެ ތެރެއިން އެ ކުންފުނީގެ އަމަލުތަކާ މެދު ފަހުން ފާޅުގައި ވާހަކަދެއްކި މީހުންގެ ހެކިބަސް ވެސް މި މައްސަލައިގައި ނެގުމަށް ވަނީ ހަމަޖެހިފައެވެ.

ޔޫޓިއުބްގެ ވެރިޔާ ނީލް މޯހަން ވެސް ހެކިބަސް ދިނުމަށް ހާޒިރުވާނެ ކަމަށް ކުރިން ބެލެވުނު ނަމަވެސް، މިހާރު އޭނާ ހާޒިރުކުރަން ބޭނުންނުވާކަން ބީބީސީ އިން ވަނީ ރިޕޯޓުކޮށްފަ އެވެ.

މި މައްސަލައަކީ އެމެރިކާގެ އެކި އާއިލާތަކާއި، ސްޓޭޓް ޕްރޮސިކިއުޓަރުންނާއި، ސްކޫލްތަކުން އިސްނަގައިގެން އެމެރިކާގެ ކޯޓުތަކަށް ހުށަހަޅާފައިވާ މިފަދަ އެތައް ހާސް މައްސަލައެއްގެ ތެރެއިން އެއް މައްސަލަ އެވެ.

މި ދައުވާތަކުގައި މެޓާ، ޓިކްޓޮކް، ސްނެޕްޗެޓް އަދި ޔޫޓިއުބްގެ މައްޗަށް ތުހުމަތުކޮށްފައިވަނީ، އެ ޕްލެޓްފޯމްތައް ހިންގަނީ ކުޑަކުދިން އެއަށް ދެވިހިފާނެ ފަދަ ގޮތަކަށް ކަމަށާއި، އޭގެ ސަބަބުން ގިނަ އަދަދެއްގެ ކުދިންނަށް ގެއްލުންވަމުންދާ ކަމަށެވެ.

މިފަދަ އެހެން މައްސަލައެއްގައި، އެމެރިކާގެ 29 ސްޓޭޓެއްގެ އެޓާނީ ޖެނެރަލުން ދަނީ ކެލިފޯނިއާގެ ފެޑަރަލް ކޯޓަކަށް ބާރުއަޅަމުންނެވެ. އެ ބޭފުޅުން އެދިވަޑައިގަންނަވަނީ ޝަރީއަތް ފެށުމުގެ ކުރިންވެސް، 13 އަހަރުން ދަށުގެ ކުދިންގެ އެކައުންޓްތައް މެޓާ އިން އުވާލުމަށް މަޖުބޫރުކުރުން ފަދަ އަވަސް ފިޔަވަޅުތަކެއް އެޅުމަށް އެ ކުންފުނިތަކަށް އަމުރުކޮށްދިނުމަށެވެ.