ގަވައިދުގައި ހެދުމުގެ ދިގުމިން، ފޮތީގެ ކުލަ، އަދި އިސްތަށިގަނޑުގެ ކުލަ ފަދަ ކަންކަން ވަނީ ކޮންޓްރޯލް ކޮށްފައި. ޝާހިދު ވިދާޅުވީ މިއީ އަންހެނުން އާންމު ކަންކަމުން ދުރުކޮށް ބިރުދެއްކުމުގެ މަސައްކަތެއް ކަމަށާއި، ސަރުކާރުން ކާމިޔާބީއެއް ދެއްކެން ނެތުމުން މިފަދަ ބިރު ދެެއްކުމުގެ އުކުޅުތައް ބޭނުން ކުރަނީ ކަމަށް.
ސިވިލް ސާވިސް ކޮމިޝަންގެ މެމްބަރުން
ސިވިލް ސާވިސް މުވައްޒަފުންގެ ހެދުން އެޅުމުގެ ގަވައިދަށް ގެނައި ބަދަލަކީ ރައްޔިތުންގެ އަމިއްލަ ދިރިއުޅުމުގެ ކޮންމެ ކަމެއް ސަރުކާރުން ކޮންޓްރޯލް ކުރުަމަށް ކުރާ އިތުރު މަސައްކަތަކެއް ކަމަށް ކުރީގެ ޚާރިޖީ ވަޒީރު އަދި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ބުދަ ދުވަހު އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، "މިއީ ރައްޔިތުންގެ ޙައްޤުތަކަށް އަރައިގަތުން،" ކަމަށެވެ.
ސިވިލް ސާވިސް ގަވާއިދަށް ބަދަލު ގެނެސް ސަރުކާރުގެ އޮފީސްތަކުގައި މަސައްކަތްކުރާ އަންހެން މުވައްޒަފުން އަޅާ ހެދުމުގެ ދިގުމިން ހުންނަންޖެހޭ ވަރުން ފެށިގެން ހެދުމުގެ ފޮތީގެ ކުލަ އާއި އިސްތަށިގަނޑުގެ ކުލަ އަށް ދަންދެން ވަނީ ގަވައިދަށް އަލަށް ގެނައި ބަދަލުގައި ހިމަނާފަ އެވެ.
އަންހެން މުވައްޒަފުން ލާ ހެދުން ބުޑުގެތިރީ ކައިރިން ފެށިގެން މައްޗަށް ދެ އިންޗިއަށްވުރެ ކުރުނުވާ ވަރަށް ހުންނަން ލާޒިމުވާ އިރު، އެމީހުން އަޅާ ހެދުމުގެ ފޮއްޗަކީ އޮފީހުގެ މާހައުލާ ގުޅޭ ފޮއްޗަކަށް ވާން ޖެހޭނެ ކަމަށާއި، ފަޓުލޫނު އަދި ހަރުވާޅު ނުވަތަ ޖެކެޓާއެކު ލާ ފަޓުލޫނު ނުވަތަ ހަރުވާޅަކީ އޮފީހުގެ މާހައުލާ ގުޅޭ ފޮއްޗަކުން ހުންނަ ހެދުމަށް ވެސް ވުން ލާޒިމުވެ އެވެ. އޭގެ އިތުރުން ހެދުމުގެ މަތީބައި، ގަމީސް އަދި ސޫޓު ޖެކެޓުގެ މަތީބައި އެއްވެސް ދިމާލާކުން ފަޅައިފައި ހުންނަނަމަ، ފަޅައިފައި ހުންނަބައި ހުންނަން ޖެހެނީ މައްޗަށް އަތް ދަމާލީމައި ހަށިގަނޑުގެ އެއްވެސް ތަނެއް ނުފެންނަ ގޮތަށް ވެސް ގަވައިދުގައިވެ އެވެ.
ކަރުވަޅު ނިވާވާގޮތަށް ހެދުން ހުންނަން ޖެހޭނެ ކަމަށް ބުނެފައިވުމުގެ އިތުރުން އަތްކުރު ހެދުމެއް ނަމަ އަތް ހުންނަން ޖެހޭނީ، އެ މީހެއްގެ ކޮނޑުހުޅާއި އުޅާބޮށްޓާ ދެމެދަށްވުރެ ކުރުނުވާ ވަރަށް ކަމަށާއި އަތް ދިގު ހެދުމެއް ނަމަ، ހެދުމުގެ އަތް ހުންނަން ޖެހޭނީ އަތުގެ ކުޑަހުޅަށްވުރެ ދިގުނުވާ ވަރަށް ކަމަށް ބުނެފައިވެ އެވެ.
އަންހެން މުވައްޒަފުންގެ ހެދުމުގެ ގޮތުގައި ދިގު ހެދުން ނުވަތަ ދިވެހި ލިބާސް ނުވަތަ އޮފީސް ހެދުން ބޭނުން ކުރާ ނަމަ، އެ ހެދުން ހުންނަން ޖެހެނީ ފައިގެ ތަނބިކަށްޓަ ވުރެ ކުރު ނުވާ ގޮތަށެވެ.
އިސްތަށިގަނޑު ކަޅުކުރުން ފިޔަވައި، ފާޅުކަން ބޮޑު ކުލައެއް ޖެއްސުމަކީ ނުވަތަ ކުލައިން ޝޭޑްކޮށް ހައިލައިޓް ކުރުން ވަނީ މަނާކޮށްފަ އެވެ.
ޝާހިދު ވިދާޅުވީ، އަންހެނުންނަށް ވަކިން ޚާއްސަ ކޮށް ހެދުން އެޅުމުގެ މިންގަނޑު ހަރުކަށިކޮށްފައި ވުމަކީ ވަރަށް ސާފު މެސެޖެއް ދޭ ކަމެއް ކަމަށެވެ. - "މިއީ އަންހެނުން އާންމު ކަންކަމުން ދުރުކޮށް، އެފަރާތްތަކަށް ބިރުދެއްކުމުގެ މަސައްކަތެކެވެ."
އަޅުގަނޑުމެންނަށް ފެންނަމުން ދަނީ ޤާނޫނުއަސާސީން ކޮންމެ ރައްޔިތަކަށް ކަށަވަރުކޮށްދީފައިވާ އަސާސީ ޙައްޤުތައް ނިޒާމީ ގޮތެއްގައި ނިގުޅައިގަންނަމުންދާ މަންޒަރު ކަމަށާއި އަދި މިކަމަށް ނިމުމެއް ފެންނާކަށް ނެތް ކަމަށް ވެސް ޝާހިދު ވިދާޅުވި އެވެ.
ޝާހިދު ވިދާޅުވީ، ސަރުކާރަށް އެއްވެސް ކާމިޔާބީއެއް ދެއްކޭކަށް ނެތް ކަމަށާއި، އެއްވެސް ދާއިރާއަކުން މާނަހުރި ކުރިއެރުމެއް ހޯދިފައެއް ނުވާ ކަމަށެވެ. ސަރުކާރު ކުރިއަށްދަނީ އެއްވެސް މާނަހުރި މިސްރާބެއް ނުވަތަ އަމާޒެއް ނެތި ކަމަށާއި ދެއްކޭނެ އެއްވެސް ކާމިޔާބީއެއް ނެތުމުން، މިފަދަ ބިރުދެއްކުމުގެ އުކުޅުތައް ބޭނުން ކުރަނީ ކަމަށް ވެސް ޝާހިދު ވިދާޅުވި އެވެ.
