ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގައި މިރޭ ޖަރުމަނުގެ ބޮރޫޝިއާ ޑޯޓްމުންޑާ ދެކޮޅަށް ކުޅޭ މެޗަށް ކްރިސްޓިއާނޯ ރޮނާލްޑޯ ހުރީ ރަނގަޅަށް ތައްޔާރުވެގެން ކަމަށް ރެއާލް މެޑްރިޑުގެ ކޯޗްް ޒައިނުއްދީން ޒިދާން ބުނެފިއެވެ.

ފަސް މެޗުގެ ސަސްޕެންޝަނަކަށް ފަހު މިމަހުގެ 20 ގައި ޓީމާ ގުޅުނު ރޮނާލްޑޯ ހުރީ ފިޓްކޮށް ކަމަށާއި އެކަން މިރޭ އޭނާ ސާބިތުކޮށްދޭން ތައްޔާރަށް ހުރިކަމަށް  ޒިދާން ވަނީ ބުނެފައެވެ.

"ރޮނާލްޑޯ ހުރީ ވަރަށް ހަމަޖެހިފަ. އޭނާ ހުރީ މިރޭގެ މެޗަށް ވަރަށް ރަނގަޅަށް ތައްޔާރުވެގެން. ތަފާތު ފެންނާނެ ކަމަށް އުންމީދު ކުރަން،" އީއެސްޕީއެން އަށް މަޢުލޫމާތު ދެމުން ޒިދާން ބުނެފައި ވެއެެވެ.

މީގެ އިތުރުން ޒިދާން ބުނެފައި ވަނީ ރޮނާލްޑޯ މިރޭ ފުރަތަމަ އެގާރައިގައި ހިމެނިގެން ކުޅޭނެ ކަމާއި މިރޭގެ މެޗުގައި އެންމެ މުހިންމު ކަމަކީ ރޮނާލްޑޯ 90 މިނެޓު ދަނޑުމަތީ ހުރުން ކަމަށެވެ.

މިރޭގެ މި މެޗަކީ  ޗެމްޕިއަންސް ލީގުގެ ޗެމްޕިއަނުންނާއި ކުރިމަތިވާ ވަރުގަދަ އިމްތިހާނެއް ކަމަށް ގިނަބަޔަކު ދެކޭއިރު، މިރޭގެ މި ކުރިމަތިލުން ވަރުގަދަވާނެކަމަށް ބެލެވެއެވެ. ރެއާލްގެ އިތުރުން މިރޭގެ މި މެޗަށް ޑޯޓްމުންޑުން ވެސް ވަނީ ވަރަށް ބޮޑަށް ތައްޔާރުވެފައެވެ.

ރެއާލް އަދި ޑޯޓްމުންޑް އެއްގްރޫޕެއްގައި ހިމެނިފައިވާއިރު، ނިމިގެން ދިޔަ މުބާރާތުގައި ވެސް މި ދެޓީމު ހިމެނިފައިވަނީ އެއް ގްރޫޕެއްގައެވެ. އެގޮތުން މިފަހަރުގެ މި މުބާރާތުގައި ކޮންމެ ޓީމެއް ވެސް މިހާތަނަށް އެއް މެޗު ވަނީ ކުޅެފައެވެ. ރެއާލް ކުޅުނު މެޗުން ރޮނާލްޑޯގެ ދެ ގޯލުން އެޓީމު މޮޅުވިއިރު ޑޯޓްމުންޑް ވަނީ ކުޅުނު ފުރަތަމެ މެޗުން ތަފާތު ބޮޑު ނަތީޖާއަކުން ބަލިވެފައެވެ.

ޑޯޓްމުންޑުގެ ދަނޑުގައި މިރޭ ކުޅޭ މި މެޗު ފެށޭނީ މިރޭ ރާއްޖެ ގަޑިން 11:45ގައެވެ.