ޖާނުން ފިދާ ވެގެން، ޕާކިސްތާނުގެ އަސްކަރީ މައި މަރުކަޒަށް ހަމަލާދީ، ތިން މީހުން މަރާލައި، މަދުވެގެން ފަސް މީހުން ޒަހަމްކޮށްލައިފި އެވެ.

ފުލުހުން ބުނި ގޮތުގައި، ހަމަލާދިން މީހުން ޕެޝާވަރު ސިޓީގައި ހުންނަ ފްރޮންޓިއަރ ކޮންސްޓަބިއުލަރީގެ މައި މަރުކަޒަށް ވަނުމަށް މަސައްކަތް ކުރަމުން ދިޔައިރު އެމީހުން ދިޔައީ އެތަނުގެ ސިފައިންނާ ދިމާލަށް ބަޑިޖަހަމުންނެވެ. އަދި، އެމީހުން އެތަނުގެ ތެރެއަށް ވަދެ އަމިއްލައަށް ގޮއްވާލައގެން މަރުވިއެވެ.

ހަމަލާ އަމާޒު ކުރި ފައުޖުގެ ޑެޕިއުޓީ ކޮމަންޑެންޓް، ޖާވިދު އިގުބާލް ބުނީ ސަލާމަތީ ފައުޖުގެ ތިން މީހުން މަރުވެފައިވާ ކަމަށެވެ.

ނަން ނުޖެހުމަށް ޝަރުތުކޮށް ރޮއިޓަރސްއާ ވާހަކަ ދެއްކި އިސް އޮފިޝަލަކު ބުނީ "އެކަކު ކޮންސްޓަބިއުލަރީގެ މައި ދޮރޯއްޓަށް ހަމަލާދިން އިރު، އަނެއް ދެ މީހުން ވަނީ އެތަނުގެ ގޯތިތެރެއަށް ވަދެފައި،" ކަމަށެވެ.

ސިފައިންނާއި ފުލުހުން ވެސް ހިމެނޭ ގޮތަށް، ލޯ އެންފޯސްމަންޓްގެ މުވައްޒަފުން، އެ ސަރަހައްދު ވަނީ ބަންދުކޮށްފައި ކަމަށާއި، އަދި ހާލަތު ވަރަށް ރަނގަޅަށް ބަލަމުންދާ ކަމަށާއި، އެ މަރުކަޒު ތެރޭގައި ބައެއް ޓެރަރިސްޓުން ތިބި ކަމަށް ބެލޭ ކަމަށް ވެސް އެ އޮފިޝަލް އިތުރަށް ބުންޏެވެ.

ހަމަލާދިން އަސްކަރީ މަރުކަޒު ހުންނަނީ ޚައިބަރ ޕަޚްތުންޚުވާ ޕްރޮވިންސްގެ ވެރިކަންކުރާ ޕެޝާވަރުގެ އާބާދީ ބޮޑު ސަރަހައްދެއްގައެވެ.

ޒަހަމްވި ފަސް މީހުންގެ ތެރޭގައި ސަލާމަތީ ފައުޖުގެ ދެ މީހުން ވެސް ހިމެނޭ ކަމަށާއި، އެމީހުން ވަނީ ހޮސްޕިޓަލަށް ގެންގޮސްފައި ކަމަށް ރޮއިޓާސް އިން ރިޕޯޓު ކޮށްފައި ވެއެވެ.

މި ހަމަލާގެ ޒިންމާ މިހާތަނަށް އެއްވެސް ހަނގުރާމަވެރި ޖަމާއަތަކުން ނަގާފަ އެއް ނުވެއެވެ.

މިދިޔަ މަހު ޕާކިސްތާނާއި އަފްޣާނިސްތާނާ ދެމެދު ހިނގި ބޯޑަރުގެ ހަމަނުޖެހުންތަކަށް ފަހު، މި ސަރަހައްދުގައި ހަރަކާތްތެރިވާ ހައްދުފަހަނައަޅާފައިވާ ހަނގުރާމަވެރިން ވަނީ ފަހުގެ ހަފްތާތަކުގައި ހަމަލާ ދިނުން އިތުރުކޮށްފައެވެ.

ޕާކިސްތާނުން ބުނަނީ ބޯޑަރު ހުރަސްކޮށް ހަމަލާދޭ ހަނގުރާމަވެރިންނަށް އަފްޣާން ތާލިބާނުން ހިމާޔަތްދޭ ކަމަށެވެ. ނަމަވެސް ކާބުލްއިން އެކަން ދޮގުކުރެއެވެ.