އަންހެން ދަރިއަށް ޖިންސީ ގޯނާކުރި ކަމުގެ ތުހުމަތު ކުރެވޭ ފުލުހުންގެ އޮފިސަރު މުސާރަ ނުލިބޭ ގޮތަށް ސަސްޕެންޑް ކޮށްފި
10 ޖޫން 2026 | ބުދަ 08:15އަމިއްލަ އަންހެން ދަރިއަށް ޖިންސީ ގޯނާކުރި ކަމުގެ ތުހުމަތުގައި ހައްޔަރުކުރި ފުލުސް އޮފިސަރު، މި މަހުގެ 7 ވަނަ ދުވަހުން ފެށިގެން މުސާރަ ނުލިބޭ ގޮތަށް ވަނީ ސަސްޕެންޑް ކޮށްފައި. އުމުރުން 16 އަހަރުގެ ކުއްޖަކަށް ލިބުނު މި އަނިޔާގެ މައްސަލަ ފުލުހުންނަށް ހުށަހެޅުމާ ގުޅިގެން، ކަމާބެހޭ އިދާރާތަކުން ދަނީ އެ ކުއްޖާގެ ބަޔާން ނަގައި މި މައްސަލަ އިތުރަށް ތަހުގީގު ކުރަމުން.
މޯލްޑިވްސް ޕޮލިސް ސާވިސްގެ ހެޑް ކުއާޓާރ، ޝަހީދު ހުސެއިން އާދަމް ބިލްޑިންގ. | ރާއްޖެއެމްވީ
އަންހެން ދަރިއަށް ޖިންސީ ގޯނާކުރި ކަމުގެ ތުހުމަތު ކުރެވޭ ފުލުހުންގެ އޮފިސަރު މުސާރަ ނުލިބޭ ގޮތަށް ސަސްޕެންޑް ކޮށްފި އެވެ.
ރާއްޖެއެމްވީ އަށް އިތުބާރު ހުރި މަސްދަރަކުން މައުލޫމާތު ދިން ގޮތުގައި، ކްރައިމްސް އެގެއިންސްޓް ޗިލްޑްރެން ޑިޕާޓްމަންޓުން ތަހުގީގު ކުރަމުންދާ މައްސަލައެއްގައި ކޯޓު އަމުރެއްގެ ދަށުން އޭނާ ހައްޔަރު ކުރުމާ ގުޅިގެން ސަސްޕެންޑް ކޮށްފައިވާ ކަމަށެވެ.
އޭނާގެ ބަންދަށް 30 ދުވަސް ޖަހާފައިވާއިރު، ސަސްޕެންޑް ކޮށްފައިވަނީ މިމަހުގެ 7 ވަނަ ދުވަހުން ފެށިގެން މުސާރަ ނުލިބޭ ގޮތަށެވެ.
މި މައްސަލައިގައި އަނިޔާގެ ޝިކާރައަކަށް ވެފައިވަނީ އުމުރުން 16 އަހަރުގެ އަންހެން ކުއްޖެކެވެ. އޭނާ ވަނީ އޭނާއަށް ބައްޕަގެ ފަރާތުން ޖިންސީ ގޯނާ ލިބިފައިވާކަމަށް އޭނާ ގެ ގާތް ބައެއް މީހުންގެ ގާތުގައި ބުނެފައިވާ ކަމަށް އިތުބާރު ހުރި މަސްދަރަކުން މައުލޫމާތު ދީފައެވެ.
މި މައްސަލަ ފުލުހުންނަށް ހުށަހަޅާފައިވަނީ 31 މެއި 2026 ގަ އެވެ. އަދި ފުލުހުން ވަނީ މި މައްސަލައާ ގުޅިގެން އަނިޔާވި ކުއްޖާއާއި ބައެއް އިތުރު މީހުންގެ ބަޔާންވެސް ނަގާފަ އެވެ.
މި މައްސަލައާ ގުޅިގެން މީގެ ކުރިން ފުލުހުންގެ މީޑިއާ އޮފިޝަލު ވެސް ވަނީ މި މައްސަލަ އިތުރަށް ތަހުގީގު ކުރަމުންދާ ވިދާޅުވެއެވެ.
