ފުވައްމުލަކު "ޑްރަގު ކެފޭއެއް" ބަންދުކުރަން ކޯޓުން އަމުރުކޮށްފި
ފުވައްމުލައް ސިޓީގެ ފުނާޑު އަވަށުގައި ކެފޭ އުސޫލުން މަސްތުވާތަކެތި ބޭނުންކުރަން ހާއްސަކޮށްގެން ހިންގި ގެއެއް، ކޯޓު އަމުރެއްގެ ދަށުން 85 ދުވަހަށް ބަންދުކޮށްފި. މަސްތުވާތަކެތީގެ ވިޔަފާރިކުރާ މިފަދަ ތަންތަން ބަންދުކުރުމަށް ފުލުހުން ކުރާ މަސައްކަތުގެ ދަށުން، ހުއްދައާ ނުލައި އެ ތަނަށް ވަދެނުކުމެ އުޅޭ މީހުންނަށް ހަރުކަށި ފިޔަވަޅު އަޅާނެ ކަމުގެ އިންޒާރު ވަނީ ދީފަ.
ފުވައްމުލައް ސިޓީގެ މެޖިސްޓްރޭޓް ކޯޓުގެ އަމުރުގެ ދަށުން، އެ ސިޓީގަ ހިންގާ ޑްރަގު ކެފޭ އެއް ވަނީ ބަންދު ކޮށްފަ. | ރާއްޖެއެމްވީ
ފުވައްމުލައް ސިޓީގައި ކެފޭ އުސޫލުން މަސްތުވާތަކެތި ބޭނުންކުރުމުގެ ހިދުމަތްދޭ ތަނެއް ބަންދުކުރުމަށް އެ ސިޓީގެ މެޖިސްޓްރޭޓް ކޯޓުން އަމުރުކޮށްފި އެވެ.
މިއީ މަސްތުވާތަކެތި ބޭނުންކުރުމުގެ ހިދުމަތްދޭ ތަނެއް ބަންދުކުރުމަށް މާލެ ފިޔަވައި ރާއްޖޭގެ އެހެން ރަށެއްގެ ކޯޓަކުން މިފަދަ އަމުރެއް ނެރުނު ފުރަތަމަ ފަހަރެވެ.
ފުލުހުން ހާމަކުރި ގޮތުގައި، ފުވައްމުލައް މެޖިސްޓްރޭޓް ކޯޓުން މިދިޔަ ބުދަ ދުވަހު ނެރުނު އަމުރުގެ ދަށުން ބަންދުކުރީ އެ ސިޓީގެ ފުނާޑު އަވަށު، ގުލިސްތާނުގޭގައި ހިންގާ ޑްރަގް ކެފޭއެކެވެ. ކޯޓުން ވަނީ މި ހިނގާ މެއި މަހުގެ 27 ވަނަ ދުވަހުން ފެށިގެން 85 ދުވަހުގެ މުއްދަތަށް އެ ތަން ބަންދުކުރުމަށް އަމުރުކޮށްފަ އެވެ.
މި ތަނަކީ ފުވައްމުލަކަށް މަސްތުވާތަކެތި އެތެރެކޮށް، އެ ތަކެތީގެ ވިޔަފާރިކޮށް، އަދި ކެފޭ އުސޫލުން މަސްތުވާތަކެތި ބޭނުންކުރުމުގެ ހިދުމަތް ދިނުމަށް ހާއްސަކޮށްފައިވާ ތަނެއް ކަމަށް ފުލުހުން ތުހުމަތުކުރެ އެވެ. މަސްތުވާތަކެއްޗާ ބެހޭ ގާނޫނުގެ ދަށުން ނެރުނު މި އަމުރުގެ މުއްދަތުގައި، ކަމާބެހޭ ފަރާތްތަކުގެ ހުއްދަ ނެތި އެ ތަނަށް ވަދެނުކުމެ އުޅުމަކީ ކުށެކެވެ.
ފުލުހުން ބުނީ ކޯޓު އަމުރުގެ ދަށުން ބަންދުކޮށްފައިވާ ތަންތަނަށް ހުއްދައާ ނުލައި ވަންނަ މީހުންނާއި، އެ ތަންތަނަށް އެކި ގޮތްގޮތުން ގެއްލުންދޭ މީހުންނާމެދު ގާނޫނީ ގޮތުން އެޅޭނެ އެންމެ ހަރުކަށި ފިޔަވަޅު އަޅާނެ ކަމަށެވެ. އަދި މަސްތުވާތަކެތީގެ ވިޔަފާރި ހުއްޓުވުމަށް ފުލުހުން ކުރަމުންދާ މަސައްކަތްތަކަށް ފުވައްމުލަކު ރައްޔިތުންގެ ފަރާތުން ލިބެމުންދާ އެއްބާރުލުމަށް އެ މުއައްސަސާއިން ވަނީ ޝުކުރު އަދާކޮށްފަ އެވެ.
މީގެ ކުރިން ކްރިމިނަލް ކޯޓުން ވަނީ މާލޭގައި ހިންގި ބައެއް ޑްރަގު ކެފޭތައް ބަންދުކުރުމަށް ވެސް އަމުރުތައް ނެރެފަ އެވެ. ފުލުހުން ބުނީ މަސްތުވާތަކެތީގެ ވިޔަފާރިކޮށް، އެ ތަކެތި ބޭނުންކުރުމުގެ ހިދުމަތްދޭ އިތުރު ތަންތަން ހޯދައި، ގާނޫނީ އިމުގެ ތެރެއިން އެފަދަ ތަންތަން ބަންދުކުރުމުގެ މަސައްކަތް ހުއްޓުމެއް ނެތި ކުރިއަށް ގެންދާނެ ކަމަށެވެ.
