ފުލުހުންގެ ދުވަސްވީ އޮފިސަރަކު 16 އަހަރުގެ އަންހެން ދަރިއަށް ޖިންސީ ގޯނާކުރި ކަމުގެ ތުހުމަތު!
އަމިއްލަ އަންހެން ދަރިއަކަށް ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް ފުލުހުންނަށް ހުށައަޅާފައިވާއިރު، މި މައްސަލައިގައި އަނިޔާ ލިބިފައިވަނީ އުމުރުން 16 އަހަރުގެ ކުއްޖަކަށް. މިދިޔަ މެއި މަހުގެ ފަހުކޮޅު ހުށަހެޅި މި މައްސަލައާ ގުޅިގެން ބައެއް މީހުންގެ ބަޔާން ނަގާފައިވީ ނަމަވެސް، މިހާތަނަށް އެއްވެސް މީހަކު ހައްޔަރުކޮށްފައެއް ނުވޭ.
ޖިންސީ އަނިޔާގެ މަންޒަރެއް ދައްކައިދޭ ފޮޓޯއެއް | ގެޓީ އިމޭޖަސް
ދިވެހި ފުލުހުންގެ ޚިދުމަތުގައި މަސައްކަތް ކުރާ ދުވަސްވީ އޮފިސަރަކު އޭނާގެ އަންހެން ދަރިއަކަށް ޖިންސީ ގޯނާކުރިކަމަށް ތުހުމަތު ކުރެވޭ މައްސަލައެއް ފެންމަތިވެއްޖެއެވެ.
އިތުބާރު ހުރި މަސްދަރަކުން ރާއްޖެއެމްވީއަށް ކަށަވަރު ކޮށްދިން ގޮތުގައި މި މައްސަލައިގައި އަނިޔާގެ ޝިކާރައަކަށް ވެފައިވަނީ އުމުރުން 16 އަހަރުގެ އަންހެން ކުއްޖެކެވެ. އޭނާ ވަނީ އޭނާއަށް ބައްޕަގެ ފަރާތުން ޖިންސީ ގޯނާ ލިބިފައިވާކަމަށް އޭނާގެ ގާތް ބައެއް މީހުންގެ ގާތުގައި ބުނެފައެވެ.
މި މައްސަލަ މިހާރު ވަނީ ފުލުހުންނަށްވެސް ހުށަހަޅާފައެވެ. އެގޮތުން މި މައްސަލަ ފުލުހުންނަށް ހުށަހަޅާފައިވަނީ 31 މެއި 2026 ގައިކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ. އަދި ފުލުހުން ވަނީ މި މައްސަލައާ ގުޅިގެން އަނިޔާވި ކުއްޖާއާއި ބައެއް އިތުރު މީހުންގެ ބަޔާންވެސް ނަގާފައެވެ.
އެހެންނަމަވެސް މިހާތަނަށް މި މައްސަލައިގައި އެއްވެސް މީހަކު ހައްޔަރުކޮށްފައެއް ނުވެއެވެ. އާންމުކޮށް މިފަދަ މައްސަލަތަކުގައި ތުހުމަތުވާ މީހާ ހައްޔަރު ކުރުމަށް އެދި ފުލުހުންގެ ފަރާތުން ކްރިމިނަލް ކޯޓަށް ހުށަހެޅި ނަމަވެސް، މި މައްސަލައިގައި މިހާތަނަށް އެފަދަ ފިޔަވަޅެއް އަޅާފައިނުވާކަމަށް މައުލޫމާތު ލިބިފައިވެއެވެ.
މި މައްސަލައިގައި ކޮމެންޓެއް ހޯދާލުމަށް ރާއްޖެއެމްވީން ސުވާލު ކުރުމުން ފުލުހުންގެ މީޑިއާ އޮފިޝަލު ވިދާޅުވީ، އިތުބާރު ކުރެވޭ މަގާމެއްގައި ހުރެ ކުޑަކުއްޖަކަށް ޖިންސީ ގޯނާކުރިކަމަށް ތުހުމަތު ކުރެވޭ މައްސަލައެއް 2026 ޖޫން 1 ވަނަ ދުވަހު ފުލުހުންނަށް ހުށަހެޅިފައިވާ ކަމަށެވެ. އަދި މި މައްސަލައިގައި ތުހުމަތު ކުރެވެނީ ފުލުހެއްގެ މައްޗަށްކަން ފުލުހުންވެސް ވަނީ ކަށަވަރު ކޮށްދީފައެވެ.
ފުލުހުންގެ މީޑިއާ އޮފިޝަލު އިތުރަށް ވިދާޅުވީ، މި މައްސަލައިގެ ޖިނާއީ ތަހުގީގު ފެމިލީ އެންޑް ޗައިލްޑް ޕްރޮޓެކްޝަނުން ކުރިއަށްގެންދާ ކަމަށާއި، އެ ފުލުސް އޮފިސަރާ ގުޅޭ އިދާރީ މައްސަލަ ފުލުހުންގެ ޕްރޮފެޝަނަލް ސްޓެންޑަރޑްސް ކޮމާންޑުން ބަލަމުންދާކަމަށެވެ.
