އިޒްރޭލުގެ ޓާގެޓް ތަކަށް ހިޒްބުﷲ އިން ވަރުގަދަ ހަމަލާތަކެއް ދީފި
2 ޖޫން 2026 | އަންގާރަ 06:36ލުބުނާނުގެ ދެކުނުގައި ހަރަކާތްތެރިވާ އިޒްރޭލުގެ ސިފައިންނާއި އަސްކަރީ އުޅަނދުތަކަށް އަމާޒުކޮށް ހިޒްބުالله އިން ވަރުގަދަ ހަމަލާތަކެއް ދީފި. މި ހަމަލާތަކުގައި ޑްރޯން، ރޮކެޓް އަދި ގައިޑެޑް މިސައިލް ބޭނުންކޮށްގެން އިޒްރޭލުގެ ތިން ޓޭންކަކަށް ބޮޑެތި ގެއްލުންތަކެއް ދީފައިވާ ކަމަށް އެ ޖަމާއަތުން ބުނޭ. މީގެ އިތުރުން ހަދާތާ އަދި ބަޔާދާ އަވަށުގައި ތިބި އިޒްރޭލު ސިފައިންނަށް އަމާޒުކޮށް އާޓިލަރީ ހަމަލާތައް ވެސް ވަނީ ފޮނުވާލާފައި.
އިޒްރޭލުގެ އުތުރު ބިތުގައި ހުރި މަގާމަކުން 2026 ވަނަ އަހަރުގެ މޭ މަހުގެ 7 ވަނަ ދުވަހު ފެންނަން ހުރި މަންޒަރުތަކަށް ބަލާއިރު، ލުބުނާނުގެ ދެކުނުގައި ސުންނާފަތިކޮށްލާފައިވާ އިމާރާތްތަކުގެ ކައިރިން އިޒްރޭލު ސިފައިންގެ އަސްކަރީ އުޅަނދެއް ދަތުރުކުރަނީ. | އޭއެފްޕީ
އީރާނުގެ މަދަދުލިބޭ ހިޒްބުالله ޖަމާއަތުން "ހުރިހާ ހަމަލާތަކެއް ހުއްޓާލުމަށް" އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވިތާ މަދު ގަޑިއިރުތަކެއްގެ ތެރޭގައި، ލުބުނާނުގެ ދެކުނުގައި ހުރި އިޒްރޭލުގެ އަމާޒުތަކަށް ހޯމަ ދުވަހުގެ ރޭ ދަންވަރު އެ ޖަމާއަތުން ވަރުގަދަ ހަމަލާތަކެއް ދީފިއެވެ.
ހިޒްބުالله އިން ނެރުނު ބަޔާނެއްގައި ބުނެފައިވަނީ، ހަދާތާ އަވަށުގައި ހަރަކާތްތެރިވަމުންދިޔަ އިޒްރޭލުގެ މަކާވާ މަރުކާގެ ޓޭންކަކަށް ޑްރޯން ބޭނުންކޮށްގެން ހަމަލާދީފައިވާ ކަމަށެވެ. މީގެ އިތުރުން އެ ސަރަހައްދުގައި ތިބި އިޒްރޭލުގެ ސިފައިންނަށް އަމާޒުކޮށް ގިނަ އަދަދެއްގެ ރޮކެޓާއި އާޓިލަރީ ހަމަލާތައް ދީފައިވާ ކަމަށާއި، އޭގެ ފަހުން އެ ސަރަހައްދުގައި އޮތް އިޒްރޭލުގެ އިތުރު ދެ ޓޭންކަކަށް ވެސް ހަމަލާދީފައިވާ ކަމަށް އެ ޖަމާއަތުން ބުނެފައިވެއެވެ.
މީގެ އިތުރުން ހިޒްބުالله އިން ނެރުނު ތިންވަނަ ބަޔާނެއްގައި ބުނެފައިވަނީ، ހޯމަ ދުވަހުގެ ރޭ ލުބުނާނު ގަޑިން ރޭގަނޑު 11:00 ގެ ފަހުން، ބަޔާދާ އަވަށުގައި އޮތް އިޒްރޭލުގެ މަކާވާ ޓޭންކަކަށް "ގައިޑެޑް މިސައިލް" ބޭނުންކޮށްގެން ހަމަލާދީފައިވާ ކަމަށެވެ.
