މުޖުތަބާ ޚާމަނާއީ ދިރި އެބަހުރި، ޙަރަކާތްތެރިކަން އިތުރުވޭ: ރޫބިއޯ

އެމެރިކާ އާއި އިޒްރޭލް އިން އީރާން އަށް ދިން ހަމަލާ ތަކުގައި ޒަޚަމްވި ފަހުން އާންމުންގެ ތެރެއިން ފެނިފައި ނުވާ އީރާންގެ އެންމެ މަތީ ވެރިޔާ މުޖުތަބާ ޚާމަނާއީ ދިރިހުރި ކަމަށާއި، އޭނާގެ ހަރަކާތްތެރިކަން އިތުރު ވަމުންދާ ކަމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވެއްޖެ އެވެ.

އަންގާރަ ދުވަހު ސެނެޓުގެ ފޮރިން ރިލޭޝަންސް ކޮމިޓީގައި ވާހަކަ ދައްކަވަމުން ރޫބިއޯ ވިދާޅުވީ، މުޖުތަބާ ޚާމަނާއީ އެކި ފެންވަރުގައި ދައުލަތުގެ ކަންކަމުގައި ބައިވެރި ވަމުންދާ ކަމުގެ ނިޝާންތައް ފެންނަން އެބަހުރި ކަމަށެވެ.

އުމުރުން 56 އަހަރުގެ މުޖުތަބާ ޚާމަނާއީ އީރާންގެ ރޫހީ ލީޑަރު ކަމަށް އައްޔަން ކުރައްވާފައި ވަނީ، މިއަހަރުގެ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން ދިން ފުރަތަމަ ހަމަލާ ތަކުގައި އޭނާގެ ބައްޕަ އާޔަތުﷲ އަލީ ޚާމަނާއީ އަވަހާރަވުމާ ގުޅިގެންނެވެ.

މެދު އިރުމަތީގައި މިހާރު ހިނގަމުންދާ ހަނގުރާމަ އަށް ތިން މަސް ދުވަސް ވެފައިވާ އިރު، މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑެތި ގޮންޖެހުން ތަކެއް ކުރިމަތި ވެފައި އެވެ. ސެނެޓުގައި ވާހަކަ ދައްކަވަމުން ރޫބިއޯ މައުލޫމާތު ދެއްވާފައި މި ވަނީ، ހަނގުރާމަ ހުއްޓާލުމަށް ކުރަމުންދާ މަޝްވަރާތައް ހުއްޓުމަކަށް އައިސްފައިވާ ދަނޑިވަޅެއްގަ އެވެ.

އީރާން އާއެކު އެއްބަސްވުމަކަށް އާދެވޭނެ ކަމުގެ އުންމީދު އެބަ އޮތް ކަމަށް ސެނެޓުގައި ރޫބިއޯ ވިދާޅުވި އެވެ. ނަމަވެސް، އީރާން އަށް އަޅާފައިވާ ދަތި ކުރުމުގެ ފިޔަވަޅުތައް އުވާލެވޭނީ އެ ގައުމުގެ ނިއުކްލިއާ ޕްރޮގްރާމް ވަރަށް ބޮޑަށް ހަނި ކުރުމުން ކަމަށް އޭނާ ވިދާޅުވި އެވެ. މީގެ ކުރިން މަޝްވަރާ ކުރަން އީރާން އިން ދެކޮޅު ހެދި ނިއުކްލިއާ ޕްރޮގްރާމްގެ ބައެއް ކަންކަމާ މެދު ވާހަކަ ދެއްކުމަށް، މިހާރު އީރާން އިން އެއްބަސްވެފައިވާ ކަމަށް ވެސް ރޫބިއޯ ފާހަގަ ކުރެއްވި އެވެ. އޭނާ ވިދާޅުވި ގޮތުގައި މިފަދަ އެއްބަސްވުމެއް މިއަދު ނުވަތަ މާދަމާ ނުވަތަ ކުރިއަށް އޮތް ހަފުތާގެ ތެރޭގައި ވެސް ގާއިމު ވުމުގެ ފުރުސަތު އެބަ އޮތެވެ.

މީގެ އިތުރުން، މުހިންމު ކަނޑުގެ މަގެއް ކަމަށްވާ ހޮރްމޫޒް އަލުން ހުޅުވާލުމަށް އީރާން އިން އެއްބަސްވާން ޖެހޭނެ ކަމަށް ރޫބިއޯ ވިދާޅުވި އެވެ. އެ ސަރަހައްދުން ދަތުރު ކުރާ އުޅަނދު ފަހަރުގެ އަތުން ފީ ނެގުން ހުއްޓާލައި، އެ މަގު ހުޅުވާލާފައިވާކަން އީރާން އިން ސާފުކޮށް އިއުލާން ކުރަން ޖެހޭނެ ކަމަށް އޭނާ ވިދާޅުވި އެވެ. އަދި އީރާން އިން އެ ސަރަހައްދުގައި ވަޅުލާފައިވާ މައިންތައް ނެގުމަށް އެމެރިކާ އިން އެހީތެރިވާނެ ކަމަށާއި، އުޅަނދު ފަހަރަށް ހަމަލާ ދިނުން ހުއްޓާލަން ޖެހޭނެ ކަމަށް ވެސް ރޫބިއޯ ވިދާޅުވި އެވެ.

އީރާންގެ ނިއުކްލިއާ ހަރަކާތްތަކާ ގުޅޭ ގޮތުން ވާހަކަ ދައްކަވަމުން ރޫބިއޯ ވިދާޅުވީ، ޔުރޭނިއަމް މުއްސަނދި ކުރުމުގެ މަސައްކަތްތައް ދާއިމީކޮށް ހުއްޓާލުމަށް، ނުވަތަ ވަރަށް ބޮޑަށް މަދު ކުރުމަށް އީރާން އިން އެއްބަސްވާން ޖެހޭނެ ކަމަށެވެ. އީރާން އަށް ދަތި ކުރުމުގެ ފިޔަވަޅުތައް އަޅާފައި ވަނީ އެ ގައުމުން މަތީ މިންވަރަކަށް ޔުރޭނިއަމް މުއްސަނދިކޮށް، ނިއުކްލިއާ ހަރަކާތްތައް ކުރިއަށް ގެންދާތީ ކަމަށާއި، އެ ކަންކަން ހުއްޓާލުމަށް އެއްބަސްވެއްޖެ ނަމަ ދަތި ކުރުމުގެ ފިޔަވަޅު ތަކަށް ލުއި ދެވޭނެ ކަމަށް ރޫބިއޯ ވިދާޅުވި އެވެ.