ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން(ސާކް) ގެ އެންމެ މޮޅު ބަތަލާއަކަށް ހޮވުނު އައިޝަތު ރިޝްމީ އޭނާގެ އެވޯޑް ހިފައިގެން ރާއްޖެ އަތުވެއްޖެއެވެ.
ރިޝްމީ ރާއްޖެ އައިއިރު އޭނާއަށް މަރުހަބާ ކިޔުމަށް އޭނާގެ އާއިލާގެ މީހުންނާއި ފިލްމީ ދާއިރާގައި ހަރަކާތްތެރިވާ ބައެއް ފަންނާނުން ވެލާނާ އިންޓަނޭޝަނަލް އެއާޕޯރޓަށް ގޮސް ތިއްބެވެ.
ރިޝްމީއަށް އެންމެ މޮޅު ބަތަލާގެ އެވޯޑު ލިބުނީ މިއަހަރުގެ ސާކް ފިލްމު ފެސްޓިވަލްގައި އޭނާގެ ފިލްމު "ވިޝްކާ" އިންނެވެ. މި ފިލްމު ޕްރޮޑިއުސްކޮށްފައި ވަނީ ވެސް ރިޝްމީއެވެ. ރިޝްމީގެ "ވިޝްކާ" ގައި އޭނާގެ އިތުރުން ފެނިގެންދަނީ ރަވީއާ އަހުމަދު ސައީދެވެ.
"ވިޝްކާ" އަކީ މި ފަހަރުގެ ސާކް ފެސްޓިވަލްގައި ރާއްޖެއިން ބައިވެރިކުރިވި ހަމަ އެކަނި ފިލްމުވެސް މެއެވެ.
ސާކް ފިލްމު ފެސްޓިވަލް ބާއްވާފައިވަނީ ސްރީލަންކާގެ ކޮލަމްބޯގައެވެ. މިމަހުގެ 21 އިން 25 އަށް ކުރިއަށް ގެންދިޔަ މި ފިލްމު ފެސްޓިވަލްގައި ސާކްގެ އެހެން ގައުމުތަކުން ވަނީ 16 ފީޗާ ފިލްމު ހުށަހަޅާފައެވެ.
މީގެ ކުރިން، ދިވެހި ފިލްމީ ތަރިއަކަށް ސާކް ފިލްމު ފެސްޓިވަލްގައި އެންމެ މޮޅު އެކްޓަރުގެ މަގާމުވެސް ލިބިފައިވެއެވެ. އެއީ 2014 ވަނަ އަހަރު ފިލްމް "އިނގިލި" އިން އިސްމާއީލް ރަޝީދު (ކޮޕީ އިއްސެ)އަށެވެ.
"ވިޝްކާ" ޕްރިމިއާ ކޮށްފައިވަނީ މިއަހަރުގެ މާޗް މަހުގެ 8 ވަނަ ދުވަހުގައެވެ. މި ފިލްމުގެ ޝޯތަކެއް އޮލިމްޕަހުގައި ދެއްކުމަށް މިހާރުވެސް ދަނީ ޓިކެޓް ވިއްކަމުންނެވެ.
