ކަސައުޓީ ޒިންދަކީގެ ޕްރޮމޯއަށް ރޮނިތު އާއި ޝްވެތާ މަރުހަބާ ކިޔައިފި

އަންނަ އޮގްސްޓް މަހު ސްޓާ ޕްލަސް އިން ފެށުމަށް ހަމަޖެހިފައިވާ ސިލްސިލާ ޑްރާމާ "ކަސައުޓީ ޒިންދަކީ" ގެ އާ ސިޒަންގެ ޕްރޮމޯ ވަނީ ދައްކާލާފައެވެ.

މި ސީރިއަލްގެ ޕްރޮޑިއުސަރ އޭކްތާ ކަޕޫރު އެނާގެ އިސްޓަރގްރާމްގައި މި ޕްރޮމޯ ޝެއަރ ކުރުމުން 2001 އިން 2008 އަށް ސްޓާޕްލަސް އިން ދެއްކި ކާމިޔާބު ސީރީޒް ކަސައުޓީ ޒިންދަގީކީ ގެ ލީޑް ރޯލުން ފެނިގެންދިޔަ ދެ ތަރިން ކަމަށްވާ ޝްވޭތާ ތިވާރީ އާއި ރޮނިތު ރޯއީ ވަނީ އައު ޝޯއަށް އޭކްތާ އަށް މަރުހަބާ ކިޔާފައެވެ.

އެކްތާ އިންސްޓަގްރާމްގައި ޝޭއަރ ކޮށްފައިވާ ކަސައުޓީގެ ޕްރޮމޯ އަށް ޝްވެތާ ކޮށްފައިވާ ކޮމެންޓްގައި ވަނީ ޓައިޓް ލަވަ ވަރަށް ހިތްގައިމު ކަމަށާއި އައު ޝޯ އަށް މަރުހަބާކިޔާ އޯލްދަ ބެސްޓް ކިޔާފައެވެ.

އަދި ރޮނިތު ވެސް ވަނީ އެ ޑްރާމާ ސީރީޒްގައި ބައިވެރިވާ ހުރިހާ ފަރާތްތަކަށް " އޯލް ދަ ބެސްޓް" ކިޔާފައެވެ. މީގެ އިތުރުން ރޮނިތު ބުނެފައިވަނީ ކަސައުޓީގެ އާ ސީރިއަލްއެއް ހެދުމުން އޭނާ އަށް ވުރެ ބޮޑަށް އުފާވާނެ މީހަކު ނުހުންނާނެ ކަމަށެވެ. އަދި އެ ޝޯ ގެ އެންމެ މަންޒަރެއް ނަމަވެސް ކުޅެން ދިނުމަށް އޭނާ ވަނީ އެދިފައެވެ.

ސަތާރަ އަހަރަށް ފަހު ފަށާ ކަސައުޓީގެ އާ ސީރީޒް އިން ޕްރޭނާގެ ރޯލުން ފެނިގެންދާނީ އެރިކާ ފެނާންޑޭޒް އެވެ. އަދި އަނޫރާގް ބާސޫގެ ރޯލުން ފެނިގެން ދާނީ ޕާރތު ސަމްތާން އެވެ.