ބޮލީވުޑްގެ ތަރި އަނުޝްކާ ޝަރުމާ އާއި ކްރިކެޓް ކުޅުންތެރިޔާ ވިރާތު ކޯލީގެ ކައިވެންޏަށް ފަހު ހަނީމޫން ދުވަސްތައް ނިންމާލައި އަނުޝްކާ އަލުން ޝޫޓިންތައް ފަށައިފިއެވެ.

އަނުޝްކާގެ ހަނީމޫނަށް ފަހު އޭނާ ގުޅިފައި ވަނީ ޝާހުރުކްޚާން ލީޑު ރޯލުން ފެނިގެންދާ "ޒީރޯ"ގެ ޝޫޓިންއާއެވެ.

އޭނާ އެ ފިލްމުގެ ޝޫޓިން ފެށުމުން ޒީރޯގެ ޓީމުން ވަނީ އޭނާއަށް މަރުހަބާކިޔާފައެވެ. އިންސްޓަގްރާމަށް އަނުޝްކާ ލާފައިވާ އެ ފޮޓޯގައި ވަނީ އޭނާއަށް އެހާ ރީތިކޮށް އެކި މާތަކުން މަރުހަބާ ކިޔާފައި ވާތީ ފިލްމުގެ ކޯސްޓާރުންނަށާއި ފިލްމުގެ ކުރޫއަށް ޝުކުރު އަދާކޮށްފައެވެ.

"ޒީރޯ" އަކީ ކޮމެޑީ ފިލްމެކެވެ. މި ފިލްމުގެ ސްކްރީން ޕްލޭ ލިޔެފައި ވަނީ ހިމަންޝޫ ޝަރްމާއެވެ. "ޒީރޯ" ޑައިރެކްޓް ކުރަނީ އާނަންދް އެލް ރާއިއެވެ. އެ ފިލްމުގައި ލީޑު ރޯލުން ފެނިގެންދާނީ ޝާހުރުކްޚާނާއި ކެޓްރީނާ ކައިފްގެ އިތުރުން އަނުޝްކާ އެވެ.

މިއީ 2012 ވަނަ އަހަރު ނެރުނު "ޖަބްތަކް ހޭ ޖާން" އަށް ފަހު މި ތިން މީހުން އެކީގައި ފެންނާނެ ފުރަތަމަ ފިލްމެވެ. މި ފިލްމުގެ ޓީޒާ މިހާރު ނެރެފައިވާއިރު ޓީޒާ އިން ފެނިގެންދަނީ ޝާހުރުކް ކުރު މީހެއްގެ ގޮތަށެވެ. ޒީރޯގައި ސްޕެޝަލް އެޕިއަރެންސްގެ ގޮތުގައި ސަލްމާން ޚާން، ދީޕިކާ ޕަދުކޯން، ރާނީ މުކްރަޖީ، ކާޖޮލް، އާލިއާ ބަޓް، ސްރިދޭވީ، ކަރިޝްމާ ކަޕޫރު އަދި ޖޫހީ ޗަވްލާ ފެނިގެންދެއެވެ.