ކުށުގެ ދުނިޔޭގެ ރާނީގެ ގޮތުގައި ގިނަ ބަޔަކު ގަބޫލުކުރާ އިންޑިއާގެ ރައްޔިތެއް ކަމަށްވާ ހަސީނާ ޕާކަރްގެ ހަޔާތުގެ މައްޗަށް އުފައްދާފައިވާ ފިލްމު "ހަސީނާ" އަށް ލިބޭ ކާމިޔާމު ހީކުރިވަރަށް ވުރެ ކުޑަކަމަށް ރިޕޯޓްތައް ބުނެފިއެވެ.

މިދިޔަ ހުކުރު ދުވަހު ރިލީޒް ކުރި މި ފިލްމަށް ބެލުންތެރިންގެ މާބޮޑު ތަރުހީބެއް އަދި ލިބިފައެއް ނުވެއެވެ.

އެފިލްމަށް ސިނަމާތަކުގައި އެޅުވި ފުރަތަމަ ދުވަހު ލިބުނީ 1.87 ކުރޯޑް ރުޕީސްއެވެ. ދެވަނަ ދުވަހު ލިބުނީ 2.60 ކުރޯޑް އަދި ތިންވަނަ ދުވަހު 4.47 ކުރޯޑް އިންޑިއަން ރުޕީސްއެވެ.

މި ފިލްމު ނެރުމާއެކު ކްރިޓިސްޓުން ވަނީ މި ފިލްމަކީ ހީކުރިވަރަށް ވުރެ ދަށް ފެންވަރުގެ ފިލްމެއްކަމަށް ބުނެފައެވެ.

މި ފިލްމުގައި ހަސީނާ ގެ ރޯލު ކުޅެފައިވަނީ ޝްރަދާ ކަޕޫރެވެ. "ހަސީނާ" ގެ ޓްރެއިލާ ނެރުމާއެކު އެންމެން ވެސް ހީކޮށްގެން ތިބީ ޝްރަދާ މި ފިލްމުގައި އަދާކޯށްފައިވާ ރޯލު ރަނގަޅުވާނެ ކަމަށެވެ. އެހެން ނަމަވެސް އޭނާއަށް ހަސީނާ ގެ ރޯލު ރަނގަޅަށް އަދާކޮށްފައި ނުވާ ކަމަށް ކްރިޓިސްޓުން ވަނީ ބުނެފައެވެ. އަދި ފިލްމު މިހާތަނަށް ބަލާފައިވާ މީހުންގެ ފާޑު ކިޔުންތައް ވެސް އޭނާ އަށް ވަނީ އަމާޒުވެފައެވެ.

މި ފިލްމުން ޝްރަދާ ފެނިފައި ވަނީ 17 އަހަރާއި 55 އަހަރާއި ދެމެދުގެ އެކި އަހަރުތަކުގެ ގޮތަށެވެ.

"ހަސީނާ" ޑައިރެކްޓް ކޮށްފައިވަނީ އަޕޫރްވަލް ލަކިއާ އެވެ.