އޮލިމްޕަހުގެ ޓިކެޓް ކައުންޓަރުގައި ކަރަންޓް ނެތުމުގެ ސަބަބުން، މިމަހުގެ 27 ގައި އަޅުވަން ހަމަޖެހިފައިވާ ފިލްމު "ހައްދު"ގެ ޓިކެޓް ވިއްކުމަށް ދަތިވެފައިވާ ކަމަށް ފިލްމުގެ ކެމެރާމަން އިބްރާހީމް ވިޝާން (ކަނޑި) ބުނެފިއެވެ.

ހައްދު ފިލްމުގެ އާ ޝޯތަކުގެ ޓިކެޓް އޮލިމްޕަހުން ވިއްކަން ފަށަން ހަމަޖެހިފައި އޮތީ މިމަހުގެ 5 ވަނަ ދުވަހުން ފެށިގެންނެވެ.

ކަނޑި ބުނީ އޮލިމްޕަހުން ޓިކެޓް ނުވިއްކޭތީ ފޯނުކުރުމުން ޓިކެޓް ގެންގޮސްދޭ ކަމަށެވެ. ކަނޑި ބުނީ އޮލިމްޕަހުން ޓިކެޓް ވިއްކެންދެން 7710088 އަށް ގުޅުމުން ޓިކެޓް ލިބޭނެ ކަމަށެވެ. ޓިކެޓް ބުކްކުރަން ބޭނުންވާ ފަރާތްތަކަށް ޓިކެޓް ބުކްކުރުމުގެ ފުރުސަތު ވެސް އޮންނާނެ ކަމަށެވެ. އޮލިމްޕަހުގެ ޓިކެޓް ކައުންޓަރަށް ކަރަންޓް އަންނާނެ ދުވަހެއް އަންގާފައި ނުވާ ކަމަށް އޭނާ ބުންޏެވެ.

ނެޝަނަލް ސެންޓަ ފޯ ދި އާޓްސްގެ މީޑިއާ ކޯޑިނޭޓަރ އިބްރާހިމް ސައީދު ވިދާޅުވީ އޮލިމްޕަހުގެ ޓިކެޓް ކައުންޓަރުން ކަރަންޓް ގޮސްފައި ވަނީ ވަރަށް ގަދައަށް ވާރޭވެހި އެތަނުގެ ބޯޑަކަށް ފެންއެޅިގެން މިމަހުގެ 4 ވަނަ ދުވަހު ކަމަށެވެ. އެކަން ހައްލުކުރުމުގެ މަސައްކަތް ސްޓެލްކޯއާ ގުޅިގެން ކުރަމުންދާ ކަމަށާއި ކަރަންޓް ލިބެންދެން އޮލިމްޕަހުގެ ކެންޓީނަށްވާ ސަރަހައްދުގައި ޓިކެޓް ވިއްކުމަށް އެންސީއޭ އިން ބުނެފައިވާނެ ކަމަށެވެ.

"ހައްދު" ރިލީޒްކޮށްފައި ވަނީ  ސެޕްޓެމްބަރުމަހުގެ 6 ވަނަ ދުވަހުގައެވެ. މިހާތަނަށް މާލެ އާއި ހުޅުމާލޭގައި މިހާތަނަށް މިފިލްމުގެ 54 ޝޯ ވަނީ ދައްކާފައެވެ. ރާއްޖޭގެ ރަށްރަށުގައި މިފިލްމުގެ 89 ޝޯ ދައްކާފައިވާއިރު ރިސޯޓުތަކުގައި 10 ޝޯ ވަނީ ދައްކާފައެވެ.

ފިލްމުގެ ތަރިންގެ ރޯލުން ފެނިގެން ދަނީ މުހައްމަދު ރަޝީދު (ދަރާ)، މަރިޔަމް ޝަކީލާ، އާރިފާ އިބްރާހީމް، ފައުޒިއްޔާ އަދި މަރިޔަމް ހަލީމް، މަރިޔަމް އައްޒަ، އައިމިނަތު ރިޝްފާ އަދި މި ދާއިރާއަށް އަލަށް ތައާރަފްވާ ޝިބާން އަހުމަދު، އަލީ އާޒިމް (ދޮން އައްޔަ) އާއި އަހުމަދު ނަޖާހެވެ.