މެއި މަހުގެ 24 އާއި 25 ސަރުކާރު ބަންދު ދުވަސްތަކެއްގެ ގޮތުގައި ހަމަޖައްސައިފި
އަޟްޙާ ޢީދުގެ ބަންދާ ގުޅިގެން މި މަހުގެ 24 އާއި 25 ސަރުކާރު ބަންދު ދުވަސްތަކެއްގެ ގޮތުގައި ރައީސުލްޖުމްހޫރިއްޔާ ހަމަޖައްސަވައިފިއެވެ. މި ނިންމެވުމާއެކު، މުވައްޒަފުންނަށް އާއިލާއާއެކު ވަގުތު ހޭދަކުރުމަށް މި މަހުގެ 22 އިން 30 އަށް މެދުނުކެނޑި ނުވަ ދުވަހުގެ ޗުއްޓީއެއް ލިބޭނެ. ޢީދު ބަންދަށްފަހު ސަރުކާރުގެ އޮފީސްތައް އަލުން ހުޅުވޭނީ މި މަހުގެ 31 ވާ އާދީއްތަ ދުވަހު.
އީދާ ގުޅިގެން މާލޭގެ މަޖީދީ މަގު އީދުގެ ލައިޓްތަކުން ދިއްލާލާފައި | ނިޝާން އަލީ / މިހާރު
މި ހިނގާ މެއި މަހުގެ 24 ވާ އާދީއްތަ ދުވަހާއި، މެއި 25 ވާ ހޯމަ ދުވަހަކީ ސަރުކާރު ބަންދު ދުވަސްތަކެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބުދަ ދުވަހު ހަމަޖައްސަވައިފި އެވެ.
މި ނިންމެވުމާއެކު، ސަރުކާރުގެ މުވައްޒަފުންނަށް ޢީދު ބަންދުގެ ގޮތުގައި ދިގު ޗުއްޓީއެއް ލިބިގެންދާނެ އެވެ.
ރައީސުލްޖުމްހޫރިއްޔާގެ އޮފީހުން ނެރުނު އިޢުލާނެއްގައި ބުނެފައިވަނީ، މި ދެ ދުވަސް ސަރުކާރު ބަންދު ދުވަސްތަކެއްގެ ގޮތުގައި ހަމަޖެއްސެވީ އަޟްޙާ ޢީދުގެ ބަންދާ ގުޅިގެން ކަމަށެވެ. މިގޮތަށް ހަމަޖެއްސެވުމުގެ މައިގަނޑު މަޤްޞަދަކީ، ޢީދު ބަންދުގައި މުވައްޒަފުންނަށް އެމީހުންގެ ޢާއިލާތަކާ އެކު ވީހާވެސް ގިނަ ވަގުތު ހޭދަކުރުމުގެ ފުރުޞަތު ފަހިކޮށްދިނުމާއި، މެދުނުކެނޑި ބަންދު ދުވަސްތަކެއް މުވައްޒަފުންނަށް ލިބޭނެ ގޮތް ހަމަޖައްސަވައި ދެއްވުމެވެ.
މި ނިންމެވުމާ ގުޅިގެން، މި މަހުގެ 22 ވާ ހުކުރު ދުވަހުން ފެށިގެން މި މަހުގެ 30 ވަނަ ދުވަހުގެ ނިޔަލަށް ސަރުކާރު ބަންދުވާނެ އެވެ. ކަލަންޑަރުގައިވާ ގޮތުން މިއަހަރުގެ އަޟްޙާ ޢީދު ދުވަހަކީ މި މަހުގެ 27 ވާ ބުދަ ދުވަހެވެ.
ރައީސް އޮފީހުގެ އިޢުލާނުގައިވާ ގޮތުން، ޢީދު ބަންދަށްފަހު ސަރުކާރުގެ އޮފީސްތައް ދެން އަލުން ހުޅުވޭނީ މެއި 31 ވާ އާދީއްތަ ދުވަހު އެވެ.
