ފަހުމު ނުވި ރައީސް މުއިއްޒުގެ އާރްޓީއައި ސިޔާސަތު

މިހާރުގެ ރައީސް، ޑރ. މުހައްމަދު މުއިއްޒު ވެރިކަމަށް އަރައިވަޑައިގަންނަވަން އެންމެ ގިނައިން ވިއްކީ ދޮގާ މަކަރާ ހީލަތް ކަމަށް ރައްޔިތުންގެ ތެރެއިން ގިނަ ބަޔަކު ދަނީ ބުނަމުންނެވެ. ވެރިކަމުގެ ދަހިވެތިކަމުގަ ހިންގި މުޑުދާރު "އިންޑިއާ އައުޓް" ކެމްޕެއިނާ ގެންގުޅުނު ހުސްގޮޑީގެ މަތިން އަދި ދިވެހިރައްޔިތުން ހަނދާނެއް ނުނެތެ އެވެ. ވެރިކަމަށް ވަޑައިގެން ފުރަތަމަ ދުވަހުން ފެށިގެން ރައީސް މުއިއްޒު ގެންދަވަނީ ދިވެހިރައްޔިތުންނަށް އޮޅުވާލަން އެއްކަމަކާ ގުޅޭގޮތުން އެކި އިރު އެކި ލަވަ ކިޔުއްވަމުން ކަމަށް ރައްޔިތުން ދަނީ ބުނަމުންނެވެ. 

ވެރިކަމަށް ވަޑައިގެން 5 ޑިސެމްބަރު 2023 ގަ ބޭއްވި ނޫސްވެރިންގެ ބައްދަލުވުމެއްގަ ރައީސް މުއިއްޒު ވިދާޅުވީ މި ސަރުކާރުގެ މައުލޫމާތުތައް ނުުލިބިގެން، މައުލޫމާތު ހޯދުމާއި ލިބިގަތުމުގެ ހައްގުގެ ގާނޫނުގެ ދަށުން، ރައިޓް ޓު އިންފޮމޭޝަން (އާރްޓީއައި) ފޯމު ހުށަހަޅަން ޖެހޭ ހިސާބަށް ނުދާނެ ކަމަށެވެ. ނިއްކުރިފުޅުމަށްޗަށް ރުލެއްވެސް އަރުވާނުލާ ރައީސް މުއިއްޒު ވިދާޅުވި މި ވާހަކަ ހިތާދެކޮޅަށް ވެސް ބައެއް ރައްޔިތުން އޭރު ގަބޫލުކުރި އެވެ. ނަމަވެސް ރައީސް އޮފީސް ވެސް ހިމެނޭހެން ސަރުކާރާ ގުޅޭ އެކި މައުލޫމާތު ހޯދަން ރައްޔިތުން ފޮނުވާ އާރްޓީއައި ތަކަށް ވާގޮތެއް ނޭނގެ އެވެ. އެނގޭހާވެސް ކަމަކީ ސަރުކާރުގެ އިދާރާތަކުން މައުލޫމާތު ނުލިބިގެން ދުވަހެއް ދުވަހަކަށް ރައްޔިތުންގެ ޝަކުވާތައް އިތުރުވާކަމެވެ.

ފެނިގެން ދިޔައީ މައުލޫމާތު ދިމުމަށް ދެކޮޅުހަދާ، ދައުލަތުގެ ބައެއް ފަރާތްތަކުން ޝަރުއީ ކޯޓުތަކަށް މައްސަލަ ހުށަހެޅި މައްސަލަ އެވެ. ހޯމް މިނިސްޓަރު އަލީ އިހުސާން ވިދާޅުވީ މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން އަންނަ ހުށަހެޅުންތަކަށް ޖަވާބު ފޯރުކޮށްދިނުމަށް މި ވަގުތު ވަރަށް ބޮޑު ހަރަދެއް ހިނގާ ކަމަށާއި އެ ކަމަށް އަގެއް ނެގުން ރަނގަޅު ކަމަށެވެ. ރައީސް އޮފީހުން މައުލޫމާތު ދެއްވަން ދެކޮޅު ހައްދަވާ ގާނުނާ ހިލާފުވުމުން ވެސް ދައުލަތުގެ ބަންޑާރަނައިބު އަހުމަދު އުޝާމް އަށް ގޯސްވީ ގާނުނީ އިމުގެ ތެރެއިން މައުލޫމާތު ހޯދުމަށް ހުށަހަޅާފަރާތްތަކެވެ. އެ ހިސާބުން ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) އަށް ވެސް  ކަމުނުދިޔައީ ސަރުކާރުގެ ކަންކަމާ ގުޅޭ މައުލޫމަތު ހޯދުމަށް ހުށަހެޅުމެވެ. 

ކަން މިހެން އޮތް އިރު ރައީސް މުއިއްޒު ސާފުކޮށް ވިދާޅުވެފަވަނީ މައުލޫމާތެއް ނުލިބިގެން ދައުލަތުގެ އެއްވެސް މުއައްސަސާއަކަށް ދިވެހިރައްޔިތުން އާރްޓީއައި ހުށަހަޅަން ނުޖެހޭނޭކަމެވެ. ނަމަވެސް ރައީސް މުއިއްޒުގެ މިސަރުކާރަކީ ދިވެހި ތާރީހުގައި ވެސް ރައްޔިތުންނަށް އެންމެ ބޮޑަށް ސައްހަ މައުލޫމާތު ސިއްރުކޮށް އޮޅުވާލި ސަރުކާރު ކަމަށް އިދިކޮޅު ފަރާތްތަކުން ދަނީ ބުނަމުންނެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނު އޮންނަ ގޮތުން، ދައުލަތުގެ އިދާރާތަކުން މައުލޫމާތު ދޭންޖެހެނީ ހަމައެކަނި މީހަކު އެދުމުންނެއް ނޫނެވެ. އެ ގާނޫނު ލާޒިމުކުރާ ގޮތުގައި، ވަކި މައުލޫމާތުތަކެއް އިސްވެ އަމިއްލައަށް އާންމުކުރަން ޖެހެ އެވެ. ނަމަވެސް، މިއަދާ ހަމައަށް އައިއިރު ރައީސް މުއިއްޒުގެ ސަރުކާރުގެ އެންމެ ވުޒާރާއަކުން ވެސް، އިސްވެ މައުލޫމާތު ހާމަކުރުމަށް ގާނޫނުގައި ކަނޑައަޅާފައިވާ އެންމެ ދަށް މިންގަނޑަށް ވެސް އަމަލުކޮށްފައެއް ނުވެ އެވެ. މިހާތަނަށް ސަރުކާރުގެ 76 އިންސައްތަ މައްސަލަތަކަށް ޖަވާބެއް ދީފައި ނުވާ ކަމަށް ތަފާސްހިސާބުތަކުން ދައްކަ އެވެ.

ރައީސް މުއިއްޒުގެ ސަރުކާރަށް 3 އަހަރު ވާން ކައިރިވެފަ ވާއިރު މައުލޫމާތު ހޯދަން ހުށަހަޅާ އާރްޓީއައި ތަކުން ރެކުމަށް ދަނީ ތަފާތު އުޒުރުތައް ދައްކަމުންނެވެ. ނަމަވެސް އާރްޓީއައި ތަކަށް ޖަވާބު ނުދޭތީ ހުށަހަޅާ ކަންބޮޑުވުންތައް އެތައް ދުވަހަކު ދިފާއު ކުރުމަށް ފަހު، އެންމެ ފަހުން އާރްޓީއައި ތަކަށް ޖަވާބު ނުދެވޭކަން ރައީސް ޑރ މުޙައްމަދު މުއިއްޒު ވެސް ވަނީ ޤަބޫލު ކުރައްވާފަ އެވެ. އޭރު ކިޔުންވި ލަވަ މުޅިން ބަދަލު ވެފަ ވާކަމަށް އެމަނިކުފާނު ވަނީ އިއުލާންކުރައްވާފަ އެވެ. 

ހޯމަ ދުވަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ، މައުލޫމާތު ނުދެވޭ އާރްޓީއައިތައް ހުރިކަމަށެވެ. އަދި އެކަން ކުރިއަށް ގެންދިއުން އަވަސް ކުރުމަށް މަސައްކަތް ކުރައްވާކަމުގަ އެވެ. ނަމަވެސް ރައްޔިތުން ބުނަނީ ފޮރުވާނެ އެއްވެސް އެއްޗެއް ނޯންނާނެ ކަމަށް ވިދާޅުވެ ވެރިމަަށް އައި މީހުން، ދައުރު ދެބައިވެގެންދާއިރު ވެސް އަވަދިނެތި އުޅެނީ ކަންކަމުގަ މަތިއަޅާ ފޮރުވަން ކަމަށެވެ. އޭރު އާރްޓީއައި އާ ގުޅޭ ގޮތުން ރައީސް މުއިއްޒު ވިދާޅުވި ބަސްފުޅު ފަހުމު ނުވާކަމަށެވެ.