"އައިޝާ" ޑޮކިއުމެންޓްރީގެ ވާހަކަ ނުދެއްކުމަށް އިލެކްޝަންސް ކޮމިޝަނުން އެމްޑީޕީއާއި ޕީއެންއެފް އަށް އަންގައިފި
10 މެއި 2026 | އާދީއްތަ 19:15"އައިޝާ" ޑޮކިއުމެންޓްރީއާ ގުޅޭ އެއްވެސް ވާހަކައެއް ނުދެއްކުމަށް ކްރިމިނަލް ކޯޓުން ކުރި އަމުރަށް ސަމާލުވުމަށް އިލެކްޝަންސް ކޮމިޝަނުން އެމްޑީޕީއާއި ޕީއެންއެފްއަށް އަންގައިފި. ކޯޓުގެ އަމުރުގައިވަނީ މައްސަލައިގެ ޝަރީޢަތް ނިމެންދެން އެ ވީޑިއޯ ދައުރުނުކުރުމަށާއި، ކުށުގެ ޝިކާރައަކަށްވީ މީހާއާ ގުޅޭ އެއްވެސް ވާހަކައެއް ސީދާކޮށް ނުވަތަ ނުސީދާކޮށްވެސް ނުދެއްކުމަށް. މުޖުތަމައުގެ އަޚްލާޤީ މިންގަނޑުތައް ހިފެހެއްޓުމަށް ނެރުނު މި އަމުރާ ޚިލާފުވުމަކީ ކޯޓުގެ ހުރުމަތް ކެނޑުން ކަމުގައި ބެލެވޭނެ ކަމަށްވެސް ކޮމިޝަނުން ވަނީ ހަނދާންކޮށްދީފަ.
އެމްޑީޕީ އިން ބޭއްވި މުޒާހަރާއެއްގެ ތެރެއިން. | ރާއްޖެ އެމްވީ
ކްރިމިނަލް ކޯޓުގެ އަމުރާ އެއްގޮތަށް "އައިޝާ" ޑޮކިއުމެންޓްރީގެ ވާހަކަ ނުދެއްކުމަށް އިލެކްޝަންސް ކޮމިޝަނުން އެމްޑީޕީއާއި ޕީއެންއެފް އަށް އަންގައިފި އެވެ.
"އައިޝާ" ޑޮކިއުމެންޓްރީ އާއި ގުޅިގެން ކްރިމިނަލް ކޯޓުން އާދީއްތަ ދުވަހު ނެރުނު އަމުރާއެކު އިލެކްޝަންސް ކޮމިޝަނުން ދެ ޕާޓީއަށް ފޮނުވި ސިޓީގައި ބުނެފައިވަނީ ކްރިމިނަލް ކޯޓުގެ ގަޒިއްޔާގައި ދައުވާ ކުރެވިފައިވާ ހާދިސާއާއި ގުޅުން ހުރި ވީޑިއޯ ޑޮކިއުމެންޓްރީ މުޖްތަމައުގެ ތެރޭގައި ދައުރު ނުކުރުމަށާއި، އެ ޑޮކިއުމެންޓްރީގައި ގެނެސްދީފައިވާ އެއްވެސް ވާހަކައެއް ސީދާ ގޮތުންނާއި ނުސީދާ ގޮތުން ވިޔަސް ނުދެއްކުމަށެވެ. އަދި އެ ޑޮކިއުމެންޓްރީއާ ގުޅުގައި މައްސަލައިގެ ހަސްމަކާއި ނުވަތަ ކުށުގެ ޝިކާރައަކަށްވީ މީހާގެ އެއްވެސް ވާހަކައެއް ނުދެއްކުމަށް އަމުރުކޮށްފައިވާ ކަމަށެވެ.
އަދި މިގަދަ ކޮންމެ ކަމަކީ ކޯޓުގެ ހުރުމަތް ކެނޑުންކަމުގައި ބެލިދާނެ އަމަލެއް ކަމަށް ކްރިމިނަލް ކޯޓުގެ އަމުރުގައި ބަޔާންކޮށްފައިވާތީ، އެމްޑީޕީ އަދި ޕީއެންއެފް އިން ހިންގާ ސިޔާސީ ހަރަކާތްތައް ހިންގުމުގައި މިކަމަށް ސަމާލުވެ ކޯޓު އަމުރުގެ ހުދޫދުގެ ތެރެއިން ސިޔާސީ ހަރަކާތް ހިންގުމަށް އަންގާ ކަމަށް އިލެކްޝަންސް ކޮމިޝަންގެ ސިޓީގައި ބުނެފައިވެ އެވެ.
"އައިޝާ ޑޮކިއުމެންޓްރީ" ގެ ވާހަކަ ސީދާކޮށް ވެސް ނުސީދާކޮށް ވެސް ދެއްކުން މަނާކޮށް "މުޅި ރާއްޖެ" އަށް އަމުރެއް ނެރެފި
ކްރިމިނަލް ކޯޓުން ނެރުނު އަމުރުގައި "މުޅި ރާއްޖެ" އަށް އަމުރު ނެރެ ބުނެފައިވަނީ މި މައްސަލައިގައ ކޯޓުން ވަކިގޮތެއް ކަނޑައަޅަންދެން ދަޢުވާ ކުރެވިފައިވާ ހާދިސާއާ (އައިޝާ ޑޮކިއުމެންޓްރީ) ގުޅުންހުރި ވީޑިއޯ ޑޮކިއުމަންޓަރީ މުޖުތަމަޢުގެ ތެރޭގައި ދައުރު ނުކުރުމަށާއި، މި ޑޮކިއުމަންޓަރީގައި ގެނަސްދީފައިވާ އެއްވެސް ވާހަކައެއް ސީދާ ގޮތުންނާއި ނުސީދާ ގޮތުންވިޔަސް ނުދެއްކުމަށާއި، ޝަރީޢަތަށް ހުށަހެޅިފައި މިވާ ޑޮކިއުމަންޓަރީ އާ ގުޅުވައި މައްސަލައިގެ ޙަސްމަކާއި ނުވަތަ ކުށުގެ ޝިކާރައަށްވީ މީހާ ގެ އެއްވެސް ވާހަކައެއް ނުދެއްކުމަށް އަމުރުކޮށްފައިވެ އެވެ.
އަދި މިބާވަތުގެ މައްސަލަތަކަކީ ޤާނޫނު އަސާސީގެ 42 ވަނަ މާއްދާގެ (ނ) ގެ (1) ވަނަ ނަންބަރުގައި ބަޔާންކުރާ މުޖްތަމަޢުގެ އަޚްލާޤީ އުސޫލުތައް ހިފެހެއްޓުމުގެ ގޮތުން، އާންމުކޮށް ހުޅުވާނުލައި ސިއްރު ކޮށްގެން ކުރިއަށް ގެންދެވޭނެ ޝަރީޢަތްތަކެއް ކަމުގައިވާއިރު، މައްސަލާގައި ހުށަހަޅާފައިވާ ލިޔުންތަކާއި ޝަރީޢަތާއި ގުޅުންހުރި މަޢުލޫމާތުތައް ނުފެތުރުމަށް އަމުރުކޮށް. މިފަދަ ކޮންމެ ކަމަކީ ކޯޓުގެ ޙުރުމަތް ކެނޑުންކަމުގައި ބެލިދޭނެ އަމަލެއްކަމުގައި އަންގާ ކަމަށް އަމުރުގައި ބުނެފައިވެ އެވެ.
