ރާއްޖޭގެ ރަށްތައް އާދަޔާ ހިލާފަށް ދަނީ ފަޅުވަމުން، މިއީ ރައްޔިތުންގެ އަތުން މިގައުމު ގެއްލިގެންދާނެ ކަމެއް: ނަޝީދު
ކުރީގެ ރައީސް ނަޝީދު ވިދާޅުވީ ރާއްޖޭގެ ރަށްތައް އާދަޔާ ހިލާފަށް ފަޅުވަމުންދާތީ އެކަމުގެ ކަންބޮޑުވުން ފާޅުކުރައްވައި، ސަރުކާރުގެ ސިޔާސަތުތަކުގެ ސަބަބުން ޖަޒީރާވަންތަކަން ގެއްލެމުންދާ ކަމަށް. މީހުން ޖަމާކުރުމުގެ ބަދަލުގައި ރަށްރަށުގައި ވަސީލަތްތައް ގާއިމުކުރުމުގެ މުހިންމުކަން ފާހަގަކުރައްވައި، އަތޮޅު ކައުންސިލްތައް އުވާލުމާއި ރަށްރަށުން އާބާދީ މަދުވުމަކީ ގައުމުގެ މުސްތަގުބަލަށް އޮތް ނުރައްކަލެއްގެ ގޮތުގައި އެމަނިކުފާނު ސިފަކުރެއްވި. އެހެންކަމުން މިފަދަ ނިންމުންތަކާ މެދު ރައްޔިތުން ފުންކޮށް ވިސްނައި، ގައުމުގެ ހައްގުގައި ނުކުތުމަށް ނަޝީދު ވަނީ ގޮވާލައްވާފައި.
އާދިއްތަ ދުވަހުގެ ރޭ މާފަންނު ރައްޔިތުންނާއެކު ބޭއްވެވި ބައްދަލުކުރެއްވުމުގައި ކުރީގެ ރައީސް މުހައްމަދު ނަޝީދު ވާހަކަ ދައްކަވަނީ. | ރާއްޖެއެމްވީ
ރާއްޖޭގެ ރަށްތައް އާދަޔާ ހިލާފަށް ފަޅުވަމުންދާ ކަމަށާއި، މިއީ ރައްޔިތުންގެ އަތުން މިގައުމު ގެއްލިގެންދާނެ ކަމެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އާދިއްތަ ދުވަހުގެ ރޭ މާފަންނު ރައްޔިތުންނާއެކު ބޭއްވެވި ބައްދަލުކުރެއްވުމުގައި ނަޝީދު ވިދާޅުވީ މާލޭ ރައްޔިތުންގެ އެންމެ ބޮޑު ޝަކުވާއަކީ އަބަދުވެސް ބޯހިޔާވަހިކަމުގެ ދަތިކަމާއި، މާލެ ތޮއްޖެހުމުގެ ޝަކުވާ ކަމަށެވެ. އަދި މިޝަކުވާތައް މާލެއިން އަޑު އިވޭއިރު ރަށްރަށުގެ ކައުންސިލްތަކާ ބައްދަލުވުމުން އެމީހުން ވެސް މާލެއާ ވަރަށް ގުޅޭ ޝަކުވާތައް ކުރާ ކަމަށް ނަޝީދު ވިދާޅުވި އެވެ.
ރާއްޖޭގެ މިހާރުގެ ހާލަތަށް އިޝާރާތް ކުރައްވައި ނަޝީދު ވިދާޅުވީ ރާއްޖޭގެ ރަށްތައް މަޑުމަޑުން ފަޅު ވަމުންދާ ކަމަށާއި، މިއީ ކަންބޮޑުވާ ބޮޑު މައްސަލައެއް ކަމަށެވެ. އަދި މިކަމުގެ ސަބަބުން ދިވެހީންނަށް ތަނަވަސްކަން ނުލިބޭނެ ކަމަށް ނަޝީދު ވިދާޅުވި އެވެ.
ރާއްޖޭއަކީ އަތޮޅުތަކެއްގެ މައްޗަށް އެކުލެވިފައިވާ ޖަޒީރާ ގައުމެއް ކަމަށްވާއިރު، މިސަރުކާރު އަތޮޅުތައް އުވާލާފައިވާތީ އެކަމަށް ވެސް ނަޝީދު ވަނީ ފާޑު ވިދާޅުވެފަ އެވެ. ނަޝީދު ވިދާޅުވީ އަތޮޅުތައް އުވާލުމުން ވެސް ރާއްޖެއަށް ބޮޑު ބަދަލެއް އަންނާނެ ކަމަށެވެ.
އަޅުގަނޑު މިދިޔައީ މިސާލަކަށް ކިނބިދޫއަށް އިހަކަށް ދުވަހު ގޮސްފައި މިއައީ. ކޮޅުމަނޑުލު ކިނބިދޫއަށް. އެތަނުގައި މިހާރު ގްރޭޑް 1 ނެތް. ކުދީން ނެތިގެން. މިއަންނަ އަހަރު ގްރޭޑް 2 ނޯންނާނެ. އޭގެ އަނެއް އަހަރު ގްރޭޑް 3 ނޯންނާނެ. އޭގެ އަނެއް އަހަރު ގްރޭޑް 4 ނޯންނާނެ. ހިސާތަކު ކިނބިދޫއެއް ނޯންނާނެ. ރާއްޖޭގެ ރަށްތައް އާދަޔާ ހިލާފު ބާރު މިނެއްގައި ފަޅުވަމުން އެބަ ދޭ. ނެތެމުން އެބަ ދޭ. މިއީ ވަރަށް ބޮޑު ކަންބޮޑުވުމެއް. ކިނބިދޫ ކައުންސިލް މެންބަރުން އަޅުގަނޑުގާތުގައި ބުނީ 65 ކިނބިދޫ އާއިލާއަށް މާލޭގައި ވަޒަންވެރިވުމުގެ ފުރުސަތު ދިނީމާ އޭގެ ސަބަބުން ކިނބިދޫ އެކީގައި ފަޅުވެ މިދަނީއޭ. ސަރުކާރުތަކުގެ ސިޔާސާތަކަށް ވެފައި އެބައޮތް މާލޭ ކައިރިއަށް ހުރިހާ ރާއްޖޭގެ ރައްޔިތުން ގެނެސް އެއްކުރުން. ރާއްޖެތެރެ އުވާލުން. މި ޖަޒީރާ ގައުމުކަން އަޅުގަނޑުމެންގެ އަތުން ނިގުޅައި ގަތުން. އެނގިލައްވާނެ މިހާރު އަތޮޮޅު ކައުންސިލް މިހާރު އެވަނީ އުވާލާފައި. އެހެންވީމަ އަތޮޅުތައް އަޅުގަނޑުމެންނަށް މި ގެއްލުނީ.ކުރީގެ ރައީސް މުހައްމަދު ނަޝީދު
މީގެ އިތުރުން ނަޝީދު ވިދާޅުވީ މިސަރުކާރުގެ ސިޔާސަތު ދެކޮޅު ނުޖެހޭ ކަމަށާއި، މަސައްކަތް ކުރަނީ މާލެއަށް ނުވަތަ މާލެ ކައިރިއަށް ރައްޔިތުން ގެނެސް ތޮއް ޖެހުން ކަމަށެވެ. ނަމަވެސް މީހުން ދިރިއުޅޭ މަދުރައްތައް ވަރަށް ބޮޑަށް ހިއްކާ ކަމަށާއި، އެއީ ކޮން ބޭނުމެއްގައި ކުރާ ކަމެއްތޯ ނަޝީދު ސުވާލު އުފެއްދެވި އެވެ.
އޭގެ މިސާލެއްގެ ގޮތުގައި ނަޝީދު ނެންގެވީ ތ. ގާދިއްފުއްޓެވެ. އެރަށުގައި ވަޒަންވެރިވެ އުޅެނީ ވަރަށް މަދު ބައެއް ކަމަށް ނަޝީދު ވިދާޅުވި އެވެ.
ނަޝީދު ވިދާޅުވީ މިކަންކަމާއި ރައްޔިތުން ވިސްނައި، ގައުމުގެ ހައްގުގައި ނުކުންނަން ޖެހޭ ކަމަށެވެ.
