އެމްޑީޕީގެ ޗެއަރޕާސަން ކަމަށް ކުރިމަތިލުމުގެ ފުރުސަތު ހުޅުވާލައިފި
އެމްޑީޕީގެ ޗެއަރޕާސަން ހޮވުމަށް ބާއްވާ އިންތިޚާބަށް ކުރިމަތިލުމުގެ ފުރުޞަތު މެއި މަހުގެ 2 ވަނަ ދުވަހުގެ ނިޔަލަށް ހުޅުވާލާފައިވާއިރު، މި އިންތިޚާބު ބޭއްވުމަށް ތާވަލުކޮށްފައިވަނީ 12 ޖޫން 2026 ގައި. މި މަޤާމަށް ކުރިމަތިލާ ފަރާތްތަކުގެ ކިބައިގައި ރައްޔިތުންގެ މަޖިލީހުގެ އިންތިޚާބަށް ކުރިމަތިލާ މީހެއްގެ ހުންނަންޖެހޭ ޝަރުތުތައް ފުރިހަމަވާންޖެހޭނެ ކަމަށް އެ ޕާޓީން ބުނޭ. މިހާތަނަށް މި އިންތިޚާބުގައި ވާދަކުރައްވާނެކަން ކުރީގެ ރައީސް މުޙައްމަދު ނަޝީދާއި، މީކާއިލް އަޙްމަދު ނަސީމްގެ އިތުރުން އަލްހާން ފަހުމީ ވަނީ ހާމަކުރައްވާފައި.
އެމްޑީޕީގެ ޗެއަރޕާސަންގެ މަގާމަށް މިހާތަނަށް ވާދަކުރަން ޝައުގުވެރިކަން ފާޅުކުރެއްވި ބޭފުޅުން (ކ-ވ) ރައީސް ނަޝީދު، އަލްހާން އަދި މީކާއިލް | ރާއްޖެ އެމްވީ
އެމްޑީޕީގެ ޗެއަރޕާސަން ކަމަށް ކުރިމަތިލުމުގެ ފުރުސަތު ހުޅުވާލައިފި އެވެ.
އެމްޑީޕީ އިން ބުނީ ޗެއަރޕާސަންގެ މަޤާމަށް ކުރިމަތިލުމުގެ ފުރުޞަތު ބުދަ ދުވަހު (22 އެޕްރީލް 2026) އިން ފެށިގެން 02 މެއި 2026 ވާ ބުދަ ދުވަހުގެ މެންދުރު 2:00 ހަމައަށް ހުޅުވާލާފައިވާ ކަމަށެވެ.
އެގޮތުން އިންތިޚާބަށް ކުރިމަތިލުމުގެ ޝަރުތުތަކުގެ ތެރޭގައި ޕާޓީގެ މެންބަރެއްކަމުގައިވުމާއި، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 73 ވަނަ މާއްދާ އާއި ރައްޔިތުންގެ މަޖިލީހުގެ އިންތިޚާބުގެ ޤާނޫންގެ 8 ވަނަ މާއްދާގައިވާ ގޮތުގެ މަތިން ރައްޔިތުންގެ މަޖިލީހުގެ އިންތިޚާބަށް ކުރިމަތިލާ މީހެއްގެ ހުންނަންޖެހޭކަމަށް ބަޔާންކުރާ އެންމެހާ ޝަރުތުތައް ހަމަވުން ހިމެނެ އެވެ.
އަދި ޕާޓީގެ ފަރާތުން ކުރިމަތިލުމަށް އެދޭ މެންބަރުން، ގޫގުލް ފޯމް މެދުވެރިކޮށް ހުށަހެޅުމަށް އެމްޑީޕީއިން ވަނީ އެދިފަ އެވެ. އަދި ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަންގެ ކުށާއި ދަރަނީގެ ރިކޯޑު އަދި މޯލްޑިވްސް ކަރެކްޝަނަލް ސާރވިސްއިން ފުރިހަމަކޮށްފައިވާ ކުށުގެ ރިކޯޑު މިފޯމާއިއެކު ހުށަހަޅަންޖެހޭނެ އެވެ.
މިއިންތިޚާބު އޮންނާނީ 12 ޖޫން 2026 ވާ ހުކުރުދުވަހުގެ މެންދުރު 2:30 ން ރޭގަނޑު 8:00 އަށެވެ.
ޗެއަރޕާސަން އިންތިހާބުގެ ޓައިމްލައިންގައިވާ ގޮތުން ވޯޓު ލެވޭނީ 22 އެޕްރީލް އާ ހަމައަށް ޕާޓީގެ މެންބަރެއްގެ ގޮތުގައި ތިބޭ މެންބަރުންނަށެވެ. މީގެ އިތުރުން ކެންޑިޑޭޓުންގެ ލިސްޓް ކެންޑިޑޭޓުންގެ ނަންބަރާއެކު އާންމު ކުރާނީ 3 މެއިގަ އެވެ. އަދި އެދުވަހު ވޯޓުލުމުގެ ހައްގު ލިބިގެންވާ މެންބަރުންގެ ދަފްތަރަށް ޝަކުވާ ހުށަހެޅުމުގެ ފުރުސަތު 3 ދުވަސް ވަންދެން ދެވޭނެ އެވެ.
މި އިންތިހާބަށް މިހާތަނަށް 3 ފަރާތަކުން ކުރިމަތިލުމުގެ ޝައުގުވެރިކަން ވަނީ ފާޅުކޮށްފަ އެވެ. އެއީ ކުރީގެ ރައީސް މުހައްމަދު ނަޝީދު، ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް އަދި ކުރީގެ މަޖިލިސް މެންބަރު އަލްހާން ފަހުމީ އެވެ.
