މަސައްކަތް ފެށީ މި ވެރިކަން ބަދަލުކުރަން، އެހެންކަމަކާއި ވިސްނާނީ ވެސް ވެރިކަން ބަދަލުކޮށްފައި: ރައީސް ނަޝީދު
އެމްޑީޕީގެ ޗެއާޕާސަންގެ އިންތިޚާބަށް އައްޑޫ ސިޓީގައި ކެމްޕެއިން ކުރައްވަމުން ގެންދަވާ ކުރީގެ ރައީސް މުހައްމަދު ނަޝީދު ވިދާޅުވީ، ރާއްޖެ ވަޑައިގަތީ މިހާރު އޮތް ވެރިކަން ބަދަލުކުރުމުގެ މަގްސަދުގައި ކަމަށް.
ކުރީގެ ރައީސް ނަޝީދު މިހާރު އައްޑޫ އަށް ކުރައްވަމުންދާ ދަތުރުފުޅުގެ ތެރެއިން. | ސޯޝަލް މީޑިއާ
މަސައްކަތް ފައްޓަވާފައި ވަނީ ރައީސް ޑރ.މުހައްމަދު މުއިއްޒުގެ މި ވެރިކަން ބަދަލުކުރަން ކަމަށާއި، އެހެންކަމަކާއި ވިސްނާނީ ވެސް ވެރިކަން ބަދަލުކުރެއްވުމަށް ފަހުގައި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު އެފަދައިން ވިދާޅުވީ މިހާރު އެ މަނިކުފާނު ޗެއަރޕަރސަންގެ އިންތިޚާބުގެ ކެމްޕެއިން އަށް އައްޑޫ އަށް ކުރައްވާ ދަތުރުފުޅުގެ ތެރެއިން ހޮނިހިރު ދުވަހު ބައެއް އާއްމުންނާއި ބައްދަލުކުރައްވާ ވާހަކަދައްކަވަމުންނެވެ. ރައީސް ނަޝީދު ވިދާޅުވީ ގާނާގައި ކުރިން ހުންނެވި ވަޒީފާ ދޫކުރައްވާފައި ރާއްޖެ ވަޑައިގަންނަވަން ޖެހުނީ އެ މަނިކުފާނާއި އެ މަނިކުފާނުގެ ދަރިންގެ ގައުމަށް މި ގައުމު ވާއިރު ގައުމުގެ ކަންކަން ނުރަނގަޅުކޮށް ހިނގާތީ ކަަމަށެވެ.
"އެކަން އިރާދަކުރެއްވިއްޔާ ކުރާނަން. ވެރިކަން ބަދަލުކުރަން އަޅުގަނޑު އައީ. ވަންދެން އަޅުގަނޑު ހަމަ ގައިމު ވެސް ހުންނާނަން. އެކަން ކޮށްފަ އަޅުގަނޑު އެހެންކަމަކާއި ވިސްނާނީ ވެސް." ނަޝީދު ވިދާޅުވި އެވެ.
މި ވެރިކަން ހިނގަމުންދާ ގޮތް ރަނގަޅު ނޫންކަމަށް ރައީސް ނަޝީދު ވާހަކަދައްކަވާފައިވާ އިރު އެ މަނިކުފާނު ވަނީ ގައުމުގެ ކަންކަން ރަނގަޅުކުރުމަށް އެންމެ ރަނގަޅު ޕްލެޓްފޯމަކީ އެމްޑީޕީ ކަމަށް ފާހަގަކުރައްވާފަ އެވެ. އަދި މި ވެރިކަމުގައި އާއްމުންނަށް ރަނގަޅަށް ކަންކަން ނުހިނގާ ކަމަށް ފާހަގަކުރައްވާ ރައީސް ނަޝީދު ވަނީ އެކި ޕްލެޓްފޯމްތަކުގައި ވެރިކަން ބަދަލުކުރުމަށް މަސައްކަތް ކުރުމަށް ވަކާލާތުކުރައްވާފަ އެވެ.
އިދިކޮޅު މައި ޕާޓީ، އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބު އަންނަ ޖޫން މަހުގެ 12 ވަނަ ދުވަހު ބޭއްވުމަށް ނިންމާފައި ވާއިރު އެ އެ އިންތިޚާބުގައި ވާދަކުރައްވާނެކަން ކުރީގެ ރައީސް ނަޝީދު އާއި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމްގެ އިތުރުން ކުރީގެ މަޖިލިސް މެންބަރު އަލްހާން ފަހުމީ އެވެ. މި ބޭފުޅުން މިހާރު އަންނަނީ އިންތިހާބަށް ކެމްޕެއިން ވެސް ކުރައްވަމުންނެވެ.
