ދައުލަތުގެ އިހުމާލުން ކުޑަކުއްޖަކު ނިޔާވުމުން: ޖަވާބުދާރީ ވުމުގެ ބަދަލުގަ ސަރުކާރުން ކަމުން ރެކެނީ

މި ސަރުކާރު ވެރިކަމާ ހަވާލުވި ފަހުން ރާއްޖޭގެ ސިއްހީ ނިޒާމު ބޮއްސުންލައި، ރައްޔިތުންނަށް ބޭނުންވާ އަސާސީ ސިއްހީ ހިދުމަތްތައް ހޯދުމުގައި ބޮޑެތި ގޮންޖެހުންތަކަކާ ކުރިމަތިލާން ޖެހިފައިވާ ކަމަށް ބުނެ އާންމުންގެ ބޮޑެތި ޝަކުވާތަކެއް ވަނީ އަމާޒުވެފަ އެވެ. ރާއްޖެ އާއި ރާއްޖޭން ބޭރުން ސަރުކާާރުގެ ބޭސްފަރުވާ ކުރުމުގެ ނިޒާމުގެ ތެރެއިން ފަރުވާހޯދުމާއި، ދާއިމީ ބަލިތަކަށް ބޭނުންވާ ހާއްސަ ބޭހާއި ސިއްހީ އާލާތްތައް ހޯދުމުގައި ނިކަމެތި ރައްޔިތުން އުފުލަންޖެހޭ ތަކުލީފުތައް އިންތިހާއަށް އިތުރުވެފައިވާއިރު، މިފަދަ ކަންކަމުގައި ޒިންމާ ނަގާނެ ދައުލަތުގެ އިދާރާއެއް ނެތް ކަމުގެ ކަންބޮޑުވުން ވަނީ ބޮޑުވެފަ އެވެ.

މިފަދަ އިހުމާލުތަކުގެ ސަބަބުން ދާދި ފަހުން ހިނގާދިޔަ ހިތާމަވެރި ހާދިސާ އަކީ މުޅި ގައުމު ސިއްސުވާލި ކަމެކެވެ. ސެރެބްރަލް ޕަލްސީ ތަހައްމަލް ކުރަމުންދިޔަ އުމުރުން އެންމެ ހަ އަހަރުގެ އަޒާން ނިޔާވީ، އޭނާ ދިރިހުރުމަށް ކޮންމެހެން ބޭނުންވާ ފީޑިން ޓިއުބެއް ހޯދުމަށް އެތައް މަހެއް ވަންދެން ކުރި މަސައްކަތް ނާކާމިޔާބުވެގެންނެވެ. އެންސްޕާ މެދުވެރިކޮށް އެ ހޮޅިކޮޅު ގެނެސްދިނުމުގެ ހުއްދަ ނުލިބި އަށް މަސް ދުވަސް ވެގެންދިޔައިރު، އެސްޓީއޯ އަށް ވެސް އަދި ސިއްހީ ވުޒާރާއަށް ވެސް އެ ކުއްޖާގެ ފުރާނަ ސަލާމަތްކުރުމަށް އެދެވޭ މަސައްކަތެއް ކުރެވިފައެއް ނުވެ އެވެ.

އަޒާންގެ މަންމަ ސޯޝަލް މީޑިއާގައި ހިއްސާކޮށްފައިވާ މައުލޫމާތުތަކަށް ބަލާއިރު، ސަރުކާރުގެ މައި ހޮސްޕިޓަލް އައިޖީއެމްއެޗްގެ ސްޓޮކުން އެ ހޮޅިކޮޅު ވަނީ ހުސްވެފަ އެވެ. އަދި އަމިއްލަ ފާމަސީތަކުން ވެސް އެ ލިބޭކަށް ނެތެވެ. މީގެ ކުރިން އެސްޓީއޯ ފާމަސީން ބޭސް ސިޓީ އަށް ލިބެން ހުންނަ މި ހޮޅިކޮޅަކީ އިންޑިއާ އިން ގާތްގަނޑަކަށް 100 ޑޮލަރަށް ލިބޭ އެއްޗެކެވެ. ނަމަވެސް އެންސްޕާ އިން ހޮޅި ކޮޅު ގެންނަން ހުއްދަ ނުދީގެން އެސްޓީއޯ ފާމަސީއިން އެ ހޮޅިކޮޅު ނުގެނެސްދީ އުޅެނިކޮށް އެ ކުއްޖާ ވަނީ ނިޔާވެފަ އެވެ.

މި ހިތާމަވެރި ހާދިސާއާ ގުޅިގެން ސަރުކާރުގެ ޖަވާބުދާރީވުން ހުރީ އާންމުން އިތުރަށް ކަންބޮޑުވާ ފަދަ ގޮތަކަށެވެ. މިކަމާ ގުޅޭގޮތުން ސުވާލު ކުރުމުން ހެލްތް މިނިސްޓަރު ޑރ. އަބްދުﷲ ނާޒިމް ވިދާޅުވީ، އެފަދަ ވާހަކަތަކަކީ މީޑިއާތަކުގައި ދައްކަންޖެހޭ ވާހަކަތަކެއް ނޫން ކަމަށެވެ. ދައުލަތުގެ އިދާރާތައް ފެއިލްވެ ކުޑަކުއްޖަކު ނިޔާވުމުން އެކަމުގައި އިހުމާލުވި ފަރާތްތައް ހޯދައި ފިޔަވަޅު އެޅުމުގެ ބަދަލުގައި، މިނިސްޓަރުގެ ވާހަކަފުޅުތަކުން ފެނިގެންދިޔައީ ޒިންމާއިން ރެކެން އުޅޭ މަންޒަރު ކަމަށް ގިނަ ބަޔަކު ދަނީ ބުނަމުންނެވެ.

މިނިސްޓަރު ނާޒިމް އިތުރަށް ވިދާޅުވީ އެ ހާދިސާއަކީ ވަކި ސަބަބަކާ ގުޅިގެން ހިނގި ކަމެއް ކަމަށް ބުނުމަކީ ކުރެވޭނެ ކަމެއް ނޫން ކަމަށާއި، އެކަމުގެ ތަފްސީލީ މައުލޫމާތު ދިނުމަކީ ފޯރަމްތަކުގައި ދައްކަންޖެހޭ ޒާތުގެ ވާހަކައެއް ނޫން ކަމަށެވެ. ނަމަވެސް ސިއްހީ ހިދުމަތްދޭ ތަންތަނުން ރަނގަޅު ކުރަންޖެހޭ ކަންކަން ރަނގަޅު ކުރާނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ.

މި ހާދިސާއިން ފެނިގެންދަނީ ރާއްޖޭގެ ބޭސްފަރުވާގެ ނިޒާމު އިންތިހާއަށް ބަލިކަށިވެ، ރައްޔިތުން އުފުލަންޖެހޭ ތަކުލީފުތައް އިންތިހާ އަށް އިތުރު ވެފައިވާ މިންވަރެވެ. އިދާރާތަކުން ޒިންމާ އަދާނުކުރުމުގެ ސަބަބުން މައުސޫމް ފުރާނައެއް ގެއްލިގެން ދިޔައިރު ވެސް، ސަރުކާރުން މަސައްކަތް ކުރަމުންދަނީ ހަގީގަތް އޮޅުވާލައި ޖަވާބުދާރީވުމުން ރެކުމަށް ކަމަށް ބުނެ އާންމުންގެ ފާޑުކިޔުން ވަނީ ސަރުކާރަށް އަމާޒުވެފަ އެވެ.