މީޑިއާ އޮފީހެއް ރެއިޑްކުރި ވަގުތު ކޮމިޝަން ހަނު، ކުއްލިއަކަށް ނެރުނު ޤަވާއިދުން ބުނެދިނީ ނޫސްވެރިންގެ ހަރަކާތްތައް ބަލަމުންދާކަމާއި، ނަތީޖާ ހިތިވާނެކަން!
އަދަދު ނޫހުގެ ނިއުސްރޫމަށް ފުލުހުން ވަދެ ބަލައި ފާސްކުރި މައްސަލައިގައި މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން ހަނުހުރުމަށްފަހު، ނޫސްތައް ބޮޑެތި އަދަދުތަކުން ޖޫރިމަނާކުރެވޭ ގަވާއިދެއް އާންމުކުރުމުން ގިނަ ބައެއްގެ ފާޑުކިޔުން އެ މުއައްސަސާއަށް ވަނީ އަމާޒުވެފައި. މިއީ ނޫސްވެރިކަން މިނިވަންކުރުމުގެ ބަދަލުގައި ނޫސްވެރިންނަށް ބިރުދައްކައި މީޑިއާތައް ކޮންޓްރޯލްކުރުމަށް ކުރާ މަސައްކަތެއްގެ ގޮތުގައި ނޫސްވެރިން ދަނީ ސިފަކުރަމުން.
ނޫސް މަޖައްލާތަކާއި ބްރޯޑްކާސްޓަރުން ކޮންޓްރޯލްކުރަން ސަރުކާރުން އުފެއްދި މީޑިއާ ކައުންސިލްގެ މެންބަރުން. | މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން
މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން އުފެއްދީ ނޫސްވެރިކަމުގެ މިނިވަންކަން ރައްކާތެރިކޮށް، ނޫސްވެރިކަމުގެ އަޚުލާގީ މިންގަނޑުތައް ހަރުދަނާކޮށް، މީޑިއާގެ ދާއިރާ ބަލަހައްޓާ މިނިވަން މުއައްސަސާއަކަށް އެ މުއައްސަސާ ވާނެކަމުގެ ވައުދާއެކުގައެވެ.
އެހެން އެ ވައުދުތަކަކީ އެއްވެސް އޮއްޓަރެއް ނެތް ފޫނެތް ވާހަކަތަކެއްކަމަށް އޭރުވެސް ނޫސްވެރިންނާއި އާންމުން ވެސް ދިޔައީ ބުނަމުންނެވެ. އެކަމުގެ ހެކިތައް މިއަދު ވެސް ދަނީ ފެންނަމުންނެވެ.
އޮންލައިން ނޫހަކުން ހެދި ޑޮކިއުމެންޓަރީއަކާ ގުޅިގެން ކޯޓު އަމުރެއްގެ ދަށުން ފުލުހުން އެ ނޫހުގެ ނިއުސްރޫމަށް ވަދެ، އެތަން ފޮޓޯނަގައި، ކޮމްޕިއުޓަރު ސިސްޓަމްތައް ޗެކްކޮށް، އަދި އިލެކްޓްރޯނިކް ބައެއް އާލާތްތައް ފުލުހުންގެ ބެލުމުގެ ދަށަށް ގެންދިޔައިރު އެ ކޮމިޝަން ކޮބައިތޯ ނޫސްވެރިން ދިޔައީ ސުވާލު ކުރަމުންނެވެ.
އެންމެ ކުޑަމިނުން އެ ކޮމިޝަނުން އެކަމުގައި ބުނަނީ ކީކޭތޯ ބަލަން ނޫސްތަކުން އެހުމުން ވެސް ކޮމިޝަން އިސްކުރީ ހަނު ހުރުމަށެވެ. މީޑިއާގެ މިނިވަންކަން ދިފާއުކޮށް ނެރުނު ކުއްލި ބަޔާނެއް ނެތެވެ. ނިއުސްރޫމަކަށް ފުލުހުން ވަނުމުން އެކަމާ ކަންބޮޑުވުން ފާޅެއް ނުކުރެއެވެ. ބިރުވެރިކަމެއްގެ ތެރޭގައި މަސައްކަތް ކުރަމުންދާ ނޫސްވެރިންނަށް ދިން އެއްވެސް ޔަގީންކަމެއް ނެތެވެ. އޮތީ ހަމައެކަނި ހަނުހުރުމެވެ.
މިހާރު، އެ ހަނުހުރުމުގެ މާނަ ދަނީ ސާފުވަމުންނެވެ.
އަދަދު ނޫހަށް ފުލުހުން ވަނުމާ ގުޅިގެން އުފެދުނު ނުތަނަވަސްކަން ބޮޑުވެފައި ވަނިކޮށް، ހަމަ އެ ދަނޑިވަޅު ކޮމިޝަނުން ވަނީ މީޑިއާގެ މަސައްކަތްތެރިންނާ ގުޅޭ ޝަކުވާތައް ބަލާނެ ގާނޫނީ އޮނިގަނޑު އާންމުކޮށްފައެވެ. ކޮމިޝަނުން އާންމު ކުރި ޤަވާއިދަކީ ނޫސް މަޖައްލާތައް އެއްލައްކަ ރުފިޔާއާ ހަމައަށް ޖޫރިމަނާކޮށް، ކޮންޓެންޓު ހުއްޓުވޭގޮތަށް ނޫސްތަކާމެދު ފިޔަވަޅު އެޅުމުގެ ޤަވާއިދެވެ.
ދެން ނޫސްވެރިން ދެކެންވީ މިއީ އިއްތިފާޤެއްކަމަށްތޯއެވެ؟ ނޫނެކެވެ. މިއީ ނޫސްވެރިންނަށް ބިރުދެއްކުމުގެ ގޮތުން ދިން އިންޒާރެކެވެ. މިއީ ގަސްދުގައި ދިން މެސެޖެކެވެ. އެއީ ނޫސްވެރިންގެ ހަރަކާތްތައް ބަލަމުންދާ ކަމުގެ މެސެޖެކެވެ. ފާޑުކިޔައިފިނަމަ އޭގެ ނަތީޖާ ހިތްދަތިވާނެ ކަމުގެ މެސެޖެކެވެ. އަދި ނޫސްވެރިކަން ރެގިއުލޭޓް ކުރުމުގެ ބާރު، ބިރުދެއްކުމުގެ ހަތިޔާރަކަށް ބަދަލުވެފައިވާ ކަމުގެ މެސެޖެކެވެ.
ރާއްޖޭގެ ގިނަ ނޫސްވެރިން އެ މުއައްސަސާއަށް "މީޑިއާ ކޮމިޝަން" ކިޔުމުގެ ބަދަލުގައި ކިޔަމުންދަނީވެސް "ކޮންޓްރޯލް ކޮމިޝަން" އެވެ. އެކަން ކޮމިޝަންގެ އަމަލުތަކުންވެސް ސާފުކޮށް ދަނީ ފެންނަމުންނެވެ.
މި ނަން އެ މުއައްސަސާއަށް ނިސްބަތްވީ އެއްވެސް ސަބަބެއް ނެތިއެއް ނޫނެވެ.
ހަގީގީ މިނިވަން ކޮމިޝަނެއް ނަމަ، އެއް ހަގީގަތެއް ގަބޫލުކުރާނެއެވެ. އެއީ ނޫސްވެރިންނަށް ބިރުދައްކައި ހިސާރު ކުރަމުންދާއިރު، ހަނުހުރެގެން ނޫސްވެރިކަމުގެ މިންގަނޑުތައް ދިފާއު ނުކުރެވޭނެ ކަމެވެ. އެ ކޮމިޝަނުގެ ވާޖިބަކީ ނޫސްވެރިންގެ ހިތްތަކުގައި ބިރުވެރިކަން އުފެއްދުމެއް ނޫނެވެ.
