ޗުއްޓީއަށްފަހު މަޖިލީހުގެ ޖަލްސާތައް ބުރާސްފަތި ދުވަހު ފަށަނީ
ރައްޔިތުންގެ މަޖިލީހުގެ 2025 ވަނަ އަހަރުގެ 3 ވަނަ ދައުރުގެ ފުރަތަމަ ޖަލްސާ 2 އޮކްޓޯބަރު 2025 ގައި ބާއްވަން ނިންމައިފި
ދިވެހިރާއްޖޭގެ ރައްޔިތުންގެ މަޖިލިސް
ރައްޔިތުންގެ މަޖިލީހުގެ 2025 ވަނަ އަހަރުގެ 3 ވަނަ ދައުރުގެ ފުރަތަމަ ޖަލްސާ ބުރާސްފަތި ދުވަހު ބާއްވަން ނިންމައިފި އެވެ.
2 އޮކްޓޯބަރު 2025 ގައި ބާއްވަން ނިންމާފައިވާ މި ޖަލްސާގެ އެޖެންޑާ އަދި ހާމަކޮށްފައިނުވާއިރު، ޖަލްސާގެ އެޖެންޑާ ފަހުން ހިއްސާކުރާނެކަށް މަޖިލީހުން ވަނީ މައުލޫމާތު ދީފައެވެ.
ޗުއްޓީއަށްފަހު މަޖިލީހުގެ ޖަލްސާތައް ބުރާސްފަތި ދުވަހު ފަށަން ނިންމާފައިވާއިރު، ސަރުކާރުން ބޭނުންވާ ބައެއް ބިލިތައް ފާސްކުރުމަށްޓަކާ ދައުރުން ބޭރުގައި މަޖިލީހުގެ 4 ޖަލްސާއެއް ބާއްވާފައިވެއެވެ. ދައުރުން ބޭރުގައި ބޭއްވި ޖަލްސާތަކުގައި އެންމެ އިސްކަމެއްދީގެން މަޖިލީހުން ކުރި މަސައްކަތަކީ ދިވެހިރާއްޖޭގެ މިނިވަން މީޑިއާ ނެތިކޮށްލުމަށްޓަކާ ހީލަތްތެރިކަމާއެކު ސަރުކާރުން މަޖިލީހަށް ވައްދާފައިވާ ބިލު ފާސްކުރުމެވެ.
މިބިލު ފާސްކޮށްފައި މިވަނީ މަޖިލީސް ފެށިނީއްސުރެ ޖަލްސާ ނިމެންދެން މި ބިލު ފާސްނުކުރުމަށް ގޮވާލާ މަޖްލިސް ދޮށުގައި ގިނަ އަދަދެއްއްގެ ނޫސްވެރިންނާއި އާއްމު ރައްޔިތުން ވަނީ މުޒާހަރާ ކުރަމުންދަނިކޮށެވެ.
މުޒާހަރާ ރޫޅާލުމަށް ފުލުހުން ވަނީ ހާލަތާ އެކަށީގެންނުވާ ބާރުގެ ބޭނުންކޮށްފައެވެ. ބައެއް ނޫސްވެރިންގެ ބޮލަށް ކަކުލުން އަރައި، އަތް އަނބުރައި، އަންނައުނަށް ގެއްލުންދީ، ހަށިގަނޑުން ލޭ އޮހޮރުވާލާފައިވެއެވެ.
މި ބިލު ފާސްކުރުމާއެކު ދިވެހިރާއްޖޭގެ ނޫސްވެރިކަމުގެ މިނިވަންކަން އެތައް ޒަމާނެއް ފަހަތައް ޖެހޭނެ ކަމަށް ގިނަ ބަޔަކު ފާހަގަކުރެއެވެ. އަދި އިދިކޮޅު ފަރާތްތަކުން ވިދާޅުވާ ގޮތުގައި މިއީ ވަރުގަދަ ޚުދުމުހުތާރު ވެރިކަމެއް އުފައްދަވަން ރައީސް މުއިއްޒު ކުރައްވާ މަސައްކަތްތަކުގެ ތެރެއިން ފާސް ކުރި ބިލެކެވެ. މި ބިލުގެ ސަބަބުން ދިވެހި ރައްޔިތުންނަށް ލިބިފައިވާ ހިޔާލު ފާޅުކުރުމުގެ މިނިވަންކަން ވެސް އެތައްގޮތަކުން ހަނިވާނެކަމަށް ގާނޫނީ ގޮތުން ތަޖުރިބާކާރު ފަރާތްތަކުން ފާހަގަ ކުރައްވާފައިވެ އެވެ.
ބިލު މަޖިލީހުން ފާސްކުރިތާ އެއްދުވަސް ފަހުން ރައީސް ޑރ. މުހައްމަދު މުއިއްޒު ވަނީ މި ބިލު ތަސްދީގުކޮށް، ރާއްޖޭގެ މިނިވަން މީޑިއާއާއި ރައްޔިތުންނަށް މިނިވަން ކަމާއެކު ބަސް ބުމުގެ ހައްގު ކަފުންކޮށް ވަޅުލާފައެވެ. މިނިވަން މީޑިއާ ނެތިކޮށްލުމަށް މި ގާނުނު ފާސްކުރުމުގެ ސަބަބުން އދ، އިގިރޭސިވިލާތް، އެމެރިކާ އަދި ކެނެޑާ ހިމެނޭހެން އެކި ގައުމުތަކުންނާއި ބައިނަލްއަގުވާމީ ޖަމިއްޔާ ޖަމާއަތްތަކުން ވަނީ ކަންބޮޑުވުން ފާޅުކުރައްވާފަ އެވެ.
