އަންނަ މާޗު މަހުން ފެށިގެން ކޮންމެ ހަފްތާއެއްގެ ހޯމަ ދުވަހު ނޫސްވެރިންނާ ބައްދަލު ކުރާނަން: ރައީސް މުއިއްޒު
ރައީސް މުއިއްޒު ވިދާޅުވީ، މާޗު މަހުން ފެށިގެން ކެބިނެޓްގެ ކޮންމެ ވަޒީރަކު ހަފްތާއަކު އެއްފަހަރު އެއްގަޑިއިރަށް ނޫސްވެރިންނާ ބައްދަލު ކުރައްވާނެ ކަމަށް. އަދި ވިދާޅުވީ މި ބައްދަލުވުންތަކުގެ ތާވަލު ރައީސް އޮފީހުން ހާމަ ކުރަމުން ގެންދާނެ ކަމަށް. ރައީސް މުއިއްޒުގެ ސަރުކާރަށް ދެ އަހަރަށްވުރެ ގިނަ ދުވަސް ވެގެންދާއިރު، މިހާތަނަށް އެމަނިކުފާނު ނޫސްވެރިންނާ ބައްދަލު ކުރެއްވީ ދެ ފަހަރު.
ރައީސް ޑރ.މުހައްމަދު މުއިއްޒު ކެބިނެޓް ވަޒީރުންނާއެކު | ރައީސް އޮފީސް
އަންނަ މާޗު މަހުން ފެށިގެން ކޮންމެ ހަފްތާއެއްގެ ހޯމަ ދުވަހު ނޫސްވެރިންނާ އެއްގަޑިއިރަށް ބައްދަލު ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ބުރާސްފަތި ދުވަހު ރިޔާސީ ބަޔާން އިއްވަވަމުން ރައީސް މުއިއްޒު ވިދާޅުވީ މިޑީޔާއާ ގާތް ގުޅުމެއް ބާއްވާނެ ކަމަށާއި، އިތުރަށް ގުޅުން ބަދަހި ކުރުމަށްޓަކައި މާޗު މަހުން ފެށިގެން ކޮންމެ ހަފްތާއެއްގެ ހޯމަ ދުވަހުގެ ހެނދުނު 10:00ން 11:00ށް ނޫސްވެރިންނާ ބައްދަލު ކުރައްވާނެ ކަމަށެވެ.
މީޑިއާ އަޅުގަނޑު ގާތް ރަހުމަތްތެރި ގުޅުން އިތުރަށް ގާތް ކުރުމަށްޓަކައި މީޑިއާ އަށް ސީދާ އަޅުގަނޑު މައުލޫމާތު ދިނުމުގެ ގޮތުން މިއަހަރުގެ މާޗު މަހުން ފެށިގެން އާއްމު އުސޫލެއްގެ މަތިން އިރާދަކުރެއްވިއްޔާ ކޮންމެ ހަފްތާއެއްގެ ހޯމަ ދުވަހުގެ ހެނދުނު 10:00ން ފެށިގެން 11:00ށް ނޫސްވެރިންނާ އަޅުގަނޑު ބައްދަލު ކުރާނަން. ދަތުރެއް ކުރަން ޖެހުން ނުވަތަ ބަންދު ދުވަހަކާ ދިމާވުން ނުނީ އެ ނޫން ވެސް ޝެޑިއުލްއަށް ބަދަލު އަންނަ ކަމެއް މެދުވެރި ނުވާހާ ހިނދަކު އިރާދަކުރެއްވިއްޔާ މިކަން މިގޮތުގައި ކުރުމުގައި ދެމި ހުންނާނެ ވާހަކަ ދަންނަވަން.ރައީސް ޑރ. މުހައްމަދު މުއިއްޒު
މީގެ އިތުރުން ރައީސް މުއިއްޒު ވިދާޅުވީ، މާޗު މަހުން ފެށިގެން ކެބިނެޓްގެ ކޮންމެ ވަޒީރަކު ހަފްތާއަކު އެއްފަހަރު އެއްގަޑިއިރަށް ނޫސްވެރިންނާ ބައްދަލު ކުރައްވާނެ ކަމަށެވެ. އަދި ވިދާޅުވީ މި ބައްދަލުވުންތަކުގެ ތާވަލު ރައީސް އޮފީހުން ހާމަ ކުރަމުން ގެންދާނެ ކަަމަށެވެ.
އަންނަ މާޗު މަހުން ފެށިގެން ކޮންމެ ހަފްތާއެއްގެ ހޯމަ ދުވަހު ނޫސްވެރިންނާ އެއްގަޑިއިރަށް ބައްދަލު ކުރައްވާނެ ކަމަށް ރައީސް މުއިއްޒު ވިދާޅުވިއިރު، އިންތިޚާބީ ރައީސްގެ ގޮތުގަައި ހުންނަވާ 2023 ވަނަ އަހަރުގެ ނޮވެމްބަރު މަހުގެ 13 ވަނަ ދުވަހު ސޯޝަލް ސެންޓަރު ގައި ބޭއްވި ނޫސްވެރިންގެ ގުންޒަރުގައި ވާހަކަ ދައްކަވަމުން ރައީސް މުއިއްޒު ވިދާޅުވީ މައުލޫމާތު ހޯދުމަށް އާރްޓީއައި ލާން ނުޖެހޭނެ ކަމަށެވެ. ނަމަވެސް މިހާރު އާރްޓީއައި ނުލައި ގިނަ ސުވާލުތަކަށް ޖަވާބެއް ނުލިބެ އެވެ.
ރައީސް މުއިއްޒުގެ ސަރުކާރަށް ދެ އަހަރަށްވުރެ ގިނަ ދުވަސް ވެގެންދާއިރު، މިހާތަނަށް އެމަނިކުފާނު ނޫސްވެރިންނާ ބައްދަލު ކުރެއްވީ ދެ ފަހަރު އެވެ. އެއީ 5 ޑިސެންބަރު 2023 ގައި ބޭއްވި ނޫސްވެރިންގެ ބައްދަލުވުމުގެ އިތުރުން 2025 ވަނަ އަހަރު ނޫސްވެރިކަމުގެ މިނިވަންކަމުގެ ދުވަހު ރެކޯޑު ހެދުމަށް ބޭއްވި ނޫސްވެރިންގެ ބައްދަލުވުމެވެ. އޭގެފަހުން މިއަދާ ހަމައަށް ނޫސްވެރިންނާ އެމަނިކުފާނު ބައްދަލު ކުރައްވާފައިނުވެ އެވެ.
