ނޫސްވެރިން ކުރި މުޒާހަރާގައި ފުލުހުން އަމަލު ކުރި ގޮތް އެންއައިސީން ބަލަން ފަށައިފި
މީޑިއާ ކޮންޓްރޯލް ކުރުމުގެ ބިލާ ދެކޮޅަށް މުޒާހަރާކުރި ނޫސްވެރިންނަށް ފުލުހުން އަނިޔާކުރި މައްސަލަ އެންއައިސީން ވަނީ ބަލަން ފަށާފަ
ސެޕްޓެމްބަރު މަހުގެ 16 ވަނަ ދުވަހު ނޫސްވެރިން ކުރި މުޒާހަރާގެ ތެރެއިން: ނޫސްވެރިން ކުރި މުޒާހަރާގައި ފުލުހުން އަމަލު ކުރި ގޮތް އެންއައިސީން ވަނީ ބަލަން ފަށާފަ
ސަރުކާރުން މީޑިއާތައް ކޮންޓްރޯލް ކުރުމަށް މަޖިލީހަށް ހުށަހެޅި ބިލު ފާސް ކުރި ދުވަހު، ނޫސްވެރިން މަޖިލިސް އިދާރާ ކުރިމަތީ ކުރި އިހްތިޖާޖުގައި ފުލުހުން ހަލާތާ ނުބައްދަލު ބާރު ބޭނުން ކުރި ކަމަށް ތުހުމަތު ކުރެވޭ މައްސަލަ ނޭޝަނަލް އިންޓެގްރިޓީ ކޮމިޝަން (އެންއައިސީ)ން ބަލަން ފަށައިފި އެވެ.
މިދިޔަ ހަފްތާގެ އަންގާރަ ދުވަހު ދައުރުން ބޭރުން މީޑިއާ ކޮންޓްރޯލް ބިލު ފާސް ކުރަން ބޭއްވި ޖަލްސާއާ ދިމާކޮށް ނޫސްވެރިންނާއި އާންމުން މުޒާހަރާ ކުރި އެވެ. އެ މުޒާހަރާ ރޫޅާލުމުގައި ފުލުހުން ވަނީ ބައިވެރިންނަށް އެކި ވަރުގެ އަނިޔާތައް ދީ، ނޫސްވެރިން މުޒަހަރާ ކަވަރު ކުރުމަށް ވެސް ހުރަސް އަޅައިފަ އެވެ.
މިކަން ހިނގިތާ ހަފްތާއަކަށް ވުރެ ގިނަ ދުވަސް ފަހުން، އެންއައިސީން އަންގާރަ ދުވަހު ވަނީ އެކްސްގައި ޕޯސްޓެއްކޮށް، މައްސަލަ ބަލަމުންދާ ކަމަށް ބުނެފަ އެވެ.
އިހްތިޖާޖު ރޫޅާލުމުގައި ފުލުހުން ހަލާތާ ނުބައްދަލު ބާރުގެ ބޭނުންކޮށްފައިވާ ކަމަށާއި ގާނޫނާއި ގަވައިދާ ހިލާފަށް ފުލުހުން އަމަލުކޮށްފައިވާ ކަމަށް ބުނެ، މީސްމީޑިއާގައި ފުލުހުންގެ މައްޗަށް ކުރެވޭ ތުހުމަތުތައް ނޭޝަނަލް އިންޓަގްރިޓީ ކޮމިޝަންގެ ގާނޫނުގެ 37 ވަނަ މާއްދާގެ ދަށުން ބެލުމަށް ކޮމިޝަނުން ނިންމާފައިވެ އެވެއެންއައިސީ
އެ ޕޯސްޓުގައި ހަވަލާދީފައިވާ މާއްދާގައި ބުނަނީ ގާނޫނު ތަންފީޒުކުރާ އިދާރާ ނުވަތަ ގާނޫނު ތަންފީޒުކުރާ އިދާރާގެ މުވައްޒަފެއްގެ މައްސަލައަކާ ގުޅޭ މައުލޫމާތު ކޮމިޝަނަށް ލިބިއްޖެ ހާލަތުގައި އެ މައްސަލަ ބެލުމަކީ އާންމުވެގެންވާ މަސްލަހަތެއް އޮތް ކަމެއް ކަމުގައިވާ ނަމަ ކޮމިޝަންގެ އަމިއްލަ އިސްނެގުމުގައި އެ މައްސަލައެއް ތަހުގީގުކުރުމުގެ ބާރު ކޮމިޝަނަށް ލިބިގެންވާ ކަމަށެވެ.
އެންއައިސީގެ އަމިއްލަ އިސްނެގުމަށް މި މައްސަލަ ބަލަން ފަށާފައިވާއިރު، ފުލުހުން ވަނީ އެ ދުވަހު އިހުތިޖާޖު ރޫޅާލި ގޮތް ދިފާއުކޮށް ވާހަކަ ދައްކައިފަ އެވެ. ފުލުހުން ބުނި ގޮތުގައި، އިހްތިޖާޖު ރޫޅާލުމުގައި ބޭނުންކޮށްފައި ވަނީ އެންމެ ކޫޑަ ބާރު ކަމަށެވެ.
ފުލުހުން އެހެން ބުނި ނަމަވެސް ބައެއް ފުލުހުން އެ ދުވަހު އަމަލުކޮށްފައިވަނީ ވަރަށް އަނިޔާވެރިކޮށް ކަމަށް އެ ތަނުގައި ހަރަކާތްތެރިވި ނޫސްވެރިން ބުނެ އެވެ.
މުޒަހަރާ ތެރެއިން ބިޑި އަޅުވައިގެން ދެ މީހަކު ފުލުހުން ހައްޔަރު ކުރި އެވެ. އޭގެ ތެރެއިން އެކަކީ ނޫސްވެރިޔާ ލީވާން އަލީ ނަސީރެވެ. ފުލުހުން ލީވާން ހައްޔަރު ކުރި ވަގުތު އަނިޔާ ކުރި ކަމަށް އޭނާ ވަނީ ބުނެފަ އެވެ.
